1 Пётро 1:1-25
1 Мэ, о Пётро, лэ Исусоско лэ Христоско апостало, пистросарав кодэлэнди, ко времено жувэл па вся По́нто, Гала́тия, Кападо́кия, Азия* и Вифи́ния.
2 О Дэл, о Дад, витидя тумэн па пэско баро гиндо и стердя тэ авэн свынти пэстирэ зорэса, кай тумэ тэ кандэн лэс и тэ ашэн вужэ через лэ Исусоско лэ Христоско рат.
Мэк о Дэл инке май фартэ здиқэл пэр тумэндэ па пэско баро ковло ди и дэл мирно жызня.
3 Мэк жал лашо алав пэ амарэ Барэ Хуласко лэ Исусоско лэ Христоско Дэл и Дад, важ кода кай во, кай фартэ одяло, дя амэнди нэви жызня*. Акана амэ можэм па чачимастэ тэ надеисавас* через кода, кай жунделя о Исусо Христос.
4 Амэ арақаделям упалэ, кай амэнди тэ дорэсэлпэ и жызня, сави найтерни, наймаӷримэ и найримомэ. Кадэя блаӷословения аштярэл по небо тумэн,
5 кодэлэн, ко патял и кас через када о Дэл фэрий пэстирэ зорэса, кай тэ спасый. Во стерэла када андэ послиднё время.
6 Кочай тумэ фартэ лошавэн, хоть тумэнди и прижалпэ дэсави время тэ мучинпэ, пока пэрэандярэн разно ԥаримос.
7 Вся када трэбуй, кай через тумаро патяимос, саво ашэля май састо, тумэндар тэ марэл и бах и патив и кай пала тумэндэ тэ жал лашо алав, кала сыкадёла о Исусо Христос. Кацаво патяимос пэбутэстэ май куч, чем о сомнак, саво можно тэ стрин, хоть во и прожыля* через и яг.
8 Тумэ любин лэ Христос, хоть никала лэс на диқлэ. Тумэ на диқэн лэс и акана, но патян андэр лэстэ, и тумэ фартэ бахталэ и лошалэ,
9 пока тумэ через пэско патяимос старыинпэ тэ домардён и спасения.
10 Лэ Дэвлэстирэ особи мануша, савэ ԥэнэнас, кай во трэбуй тэ здиқэл пэр тумэндэ па пэско баро ковло ди, внимательно розуӷанэнас и старыинаспэ тэ полэн вся пала кадэя спасения.
11 Вонэ камэнас тэ полэн, кала и сар лэ Христоса терэлапэ вся кадя, сар через лэндэ ԥэнэнас о свынто зор, — кай о Христос лэла тэ мучийпэ, ай потом ашэла ашунгло.
12 О Дэл дя тэ полэн кадэлэ особонэ манушэнди, кай вонэ терэнас и дила най важ пэстэ, ай важ тумэндэ. Кода, пала со вонэ пистросардэ, тумэ уӷанглэ кодэлэндар, ко росԥэнэнас тумэнди и лащи новость через о свынто зор, саво сас дино па небо. Акэ када фартэ камэн тэ полэн и анӷелоря.
13 Важ када мэк тумари годи авэл ӷотово каринг и дила, старыинпэ здраво тэ гиндон. Надеинпэ пэ лэ Дэвлэско баро ковло ди, па саво во здиқэла пэр тумэндэ, кала сыкадёла о Исусо Христос.
14 Сар кандинэ бэяцэ, будэр на́ домэкэн пэсти тэ жувэн* кадя, сар камэлас тумаро ди, кала тумэ инке на ӷанэнас лэ Дэвлэс.
15 Но авэн свынти андэ вся пэстири дила, сар свынто о Дэл, саво тумэн ақардя,
16 важ кода кай пистромэ: «Авэн свынти, важ кода кай мэ свынто».
17 Если тумэ мангэнпэ лэ Дадэсти, саво справедливо сындой кажнонэс па лэстири дила, тоди, сар мануша, савэ времено жувэн андэ кадэя люма, сыкавэн пэ дила, кай тумэ даран лэ Дэвлэстар.
18 Ай тумэ ӷанэн, кай тумэнди лэ ԥурэндар* дорэсляпэ и жызня, савятар нинай нисаво толко, и кацавя жызнятар тумэ сас спасымэ* най через кода, со тернёл, — через о руп или о сомнак,
19 ай через лэ Христоско кучутно рат — через вужо бакроро, андэ саво нинай дош.
20 Пала лэстэ ӷанэнас инке жы каринг кода, сар появисайля о миро, но во авеля андэ послидни деса кадэла времяти ради тумэндэ.
21 Через лэстэ тумэ патян андо Дэл, саво жундярдя лэс и стердя тэ авэл ашунгло, кай тумэ тэ надеинпэ по Дэл и тэ патян андэр лэстэ.
22 Кала тумэ приашунделэ каринг о чачимос, тумэ ашэлэ вужэ и важ када анда ди полюбисардэ ек еқэс, сар ԥрала. И акана старыинпэ фартэ и всаворэ́ одеса тэ любин ек еқэс.
23 Важ кода кай о Дэл дя тумэнди нэви жызня*, най кодэлэстар, со тернёл, ай кодэлэстар, со на тернёл, через о алав лэ жундэ и лэ вечнонэ Дэвлэстар,
24 сар пистромэ: «Всаворэ мануша — сар чар, и вся лэндири бах — сар цвито пэ мал. И чар зашутёл, и о цвито роспэрэлпэ,
25 но о алав лэ Иеговастар* вечно». И кадэва алав — када и лащи новость, сави тумэнди сас росԥэнди.
Сноски
^ Или «упалэ тэ арақадювас».
^ Или «амэндэ исин жунди надия».
^ Или «ашэля вужо».
^ Или «тэ парудён».
^ Или «па традицыи».
^ Ворта «витиндэ».
^ Или «тэ арақадён упалэ».
