1. Сави любовь май бари аврэндар? Росԥэнэн. (Диқэн и картинка англа статья.)

О ИЕГОВА када кодэва, кастар жал и любовь (1 Иоан. 4:7). Любовь, сави ритярдёлпэ пэ Дэвлэстирэ принципоря, када агапе и када подарко лэ Дэвлэстар. Кадэя любовь май бари аврэндар. Кала кай о мануш исин кацави любовь, во камэл, кай кас во любий, тэ авэл вся время паша лэстэ. Но главно вой дицол андэ лащи дила, кала мануш терэл лашимос аврэнди и на аштярэл, кай лэсти пала када тэ дэн варисо. Андэ ек справочнико ԥэнэнпэ, кай любовь агапе, дицол кати пэ дила. Через кадэя любовь о мануш камэл тэ сыкавэл ла пэ дила. Кала амэн кадя любин или кала амэ кадя любисарас и на аштярас, кай амэнди пала када тэ дэн варисо, тоди андэ амари жизня ашэл май бут радость и исин васо тэ жувас.

2, 3. Сар о Иегова сыкадя пэ дила, кай любий и на аштярэл, кай лэсти пала када тэ дэн варисо?

² О Иегова фартэ любий лэ манушэн. Када дицол даже андэ дила, сави во стердя, сар инке нэ создал лэ Адамос и  ла Ева. Во стердя и Ԥув, сави сас райкано цэр важ и мануша, кай вонэ трэбуй сас най кати тэ жувэн, ай тэ радосавэн ла жизняти. О Иегова стердя када най важ пэстэ, ай важ амэндэ, кай амэнди тэ авэл драго. Через кадэя любовь о Иегова закамля тэ подарий пэстирэ бэятонэнди, савэ жувэн пэ ԥув, тэ жувэн вечно андо раё, саво о Иегова важ лэндэ стердя.

³ После кода, сар о Адамо и Ева вазглэпэ против Иегова, во пэ дила сыкадя, кай любий и на аштярэл, кай лэсти пала када тэ дэн варисо. О Иегова само драго сыкадя пэстири любовь. Во ӷанэнас, кай дэсавэ андар лэндирэ бэятцэ авэна благодарни пала лэстири любовь. Важ када во стердя, кай май англэ тэ витинэл лэн лэ грехостар и ла смэртятар (Быт. 3:15; 1 Иоан. 4:10). Кодэлэ моментостар, кала о Иегова дя алав, кай авэла кодэва, ко спасыя, важ лэстэ и цэмин уже сас потинди (Иоан. 3:16). Сар же амэ благодарни лэ Иеговасти, важ кода кай во любий и на аштярэл, кай лэсти пала када тэ дэн варисо.

4. Андар со дицол, кай и найгрешни мануша могут тэ любин и тэ на аштярэн, кай лэнди пала када тэ дэн варисо?

⁴ О Дэл создал амэн кацавэнца, сар во. Важ када амэ можем пэ дила тэ сыкавас, кай любисарас и на аштярас, кай амэнди пала када тэ дэн варисо. Через о грехо, саво пэрэжыля пар мэндэ, амэ ашэлям грешни и акана амэнди ԥарэс тэ любисарас. Но амэ всаек можем када тэ терас. О Авелё сыкадя пэ дила, кай любий лэ Дэвлэс, кала андя само лащи жертва анда кода, со лэстэ сас и на аштярэлас, кай лэсти пала када тэ дэн варисо (Быт. 4:3, 4). Через кацави любовь о Ноё закамля бут бэрша тэ росԥэнэн кода, со ԥэндя о Дэл лэ манушэнди, савэ жувэнас паша лэстэ, хоть вонэ и на камэнас тэ ашунэн (2 Пет. 2:5). Важ о Авраамо и любовь каринг о Иегова, сас само важно андэ жизня. Во сыкадя када пэ дила, кала камля тэ анэн андэ жертва пэстирэ шавэс лэ Исаакос. Во стердя кадя, сар лэсти ԥэндя о Иегова (Иак. 2:21). Амэ камас тэ терас, сар кадэла мурша, савэ кандэнас лэ Дэвлэс даже тоди, кала лэнди сас ԥарэс, и тэ сыкавас пэ дила, кай любисарас и на аштярас, кай амэнди пала када тэ дэн варисо.

5. Сар амэ тэ сыкавас пэ дила чачуни любовь?

⁵ Со када чачуни любовь? Андэ Библия ԥэнэнпэ, кай амэ тэ любисарас «най кати пэ дума и алавэнца, но и пэ дила и па чачимастэ» (1 Иоан. 3:18). Хэба на трэбуй тэ сыкавас пэстири любовь алавэнца? Трэбуй (1 Фес. 4:18). Но и любовь, када най кати шукарнэ алава, ай инке ла трэбуй тэ сыкавас пэ дила. И када трэбуй тэ терас тоди, кала амарэ ԥралэнди и ԥэянди трэбуй варисо. Лэнди на поможына кати и лашэ алава (Иак. 2:15, 16). Кадяжэ через и любовь каринг о Иегова и каринг и мануша, амэ камас най кати тэ мангас лэ Дэвлэс тэ бишалэл манушэн, савэ стидэн урожаё, но и екжэнэ тэ отдас вся время, кай тэ росԥэнас аврэнди важ о Дэл (Матф. 9:38).

6, 7. а) Со када найчачуни любовь? б) Росԥэнэн пала кодэла, ко притерэнаспэ, кай любинас.

⁶ О апостоло Иоанно пистросардя, кай амэнди трэбуй тэ любисарас «пэ дила и па чачимастэ». Вижал, амари любовь трэбуй тэ авэл чачуни (Рим. 12:9; 2 Кор. 6:6). Нащи тэ ԥэнэс пэ амари любовь, кай вой чачуни, если амэ кабуто лас пэр пэстэ маска и притераспэ, кай любисарас.  Но хэба исин найчачуни любовь? Нинай. Када най любовь, а хохаимос.

⁷ Уӷанаса пала кодэла, ко притерэнаспэ, кай любинас. Андо Эдемско садо о Сатана притерэласпэ, кай терэл вся важ и Ева, кай латэ тэ авэл вся драго. Но па чачимастэ во притерэласпэ и гиндояс кати пала пэстэ (Быт. 3:4, 5). И дружба лэ Ахитофелости каринг о Давидо сас найчачуни. О Ахитофело придя лэ царёс, кала поля, кай кадэлэстар лэстэ может варисо тэ авэл (2 Сам. 15:31). Кадяжэ адес терэн и отступникоря и авэр мануша, савэ камэн кай тэ роспэрэлпэ и собрания. Вонэ притерэнпэ, кай любин аврэн, но пала лэндирэ шукарнэ алава, савэнца вонэ малин, исин кода кай вонэ важ пэстэ варисо тэ лэн (Рим. 16:17, 18).

8. Пала со трэбуй тэ пушэс пэстар?

⁸ Пала найчачуни любовь сындосарэн, важ кода, кай вой кати шолпэ пэ любовь через сави о мануш бут пэр со жал. Кацави любовь может тэ хохавэл лэ манушэн, но най лэ Иеговас. О Иисусо ԥэндя, кай «строго спушэла» кодэлэндар, кастэ найчачуни любовь (Матф. 24:51). Лэ Иеговастирэ служителя на камэн, кай лэндэ тэ авэл найчачуни любовь. Важ кода, драго авелоп тэ пушэс пэстар: «Вся время мэ па чачимастэ любисарав? Или дэкала мэ гиндосарав кати пала пэстэ и хохавав, кай любисарав?» Давайте подаса дума пала девять моменторя, сар тэ сыкавас пэ дила, кай любисарас па чачимастэ.

9. Со амэ закамаса тэ терас, если любисарас па чачимастэ?

⁹ Терэн лашимос, даже кала пала када нико на уӷанэна. Кала варикасти анда собрания трэбуй помощь, амэ терас вся, кай тэ поможысарас лэнди кадя, кай тэ на шас сама пэр пэстэ. (Адиносар Матфея 6:1—4 *). О Анания и Сапфира стердэ най кадя. Кала вонэ динэ пэстирэ ловэ андэ собрания, вонэ закамлэ, кай пала када тэ уӷанэн и линэ тэ ԥэнэн, кай динэ май бут, чем сас. Пала кода кай вонэ хохадэ, о Дэл мардя лэн (Деян. 5:1—10). Если амэндэ исин чачуни любовь, амэ закамаса тэ поможысарас анда вся оди амарэ ԥралэнди и ԥэянди анда собрания и тэ на аштярас, кай вонэ тэ ӷанэн кода, со стердям, кай тэ хвалин амэн. Кадэлэсти амэ можем тэ сытювас кай и ԥрала, савэ поможын Руководящему совету, кай тэ терэн и литература, андэ сави росԥэнэнпэ пала Дэл. Вонэ на терэн кадя, кай пэр лэндэ тэ шон сама и на ԥэнэн никасти, сави терэн книга, брошюра, статья или инке варисо.

10. Сар амэ можем пэрви тэ стас патив пэ авэр?

¹⁰ Пэрви стон патив пэ авэр. (Адиносар Римлянам 12:10 *). О Иисусо сыкадя амэнди, сар тэ стас патив пэ авэр, кай амэ тэ сытювас лэстар. Во стодя патив пэ апостолоря, кала халадя лэнди и пэрнэ (Иоан. 13:3—5, 12—15). Амэ трэбуй бут, со тэ терас, кай тэ на заваздас о шэро, сар о Иисусо и тэ поможысарас аврэнди.  И апостолоря най вся полинэ анда кода, со стердя о Иисусо. Вонэ полинэ када кати тоди, сар лэнди динэ свято духо (Иоан. 13:7). Амэ сыкавас, кай стас патив пэ мануша тоди, кала на гиндосарас, кай амэ май лашэ аврэндар, важ кода кай амэндэ май лащи образование, амэ май барвалэ или амэнди динэ тэ терас дила важ и собрания, сави на динэ аврэнди (Рим. 12:3). Кала варикас хвалин, амэ радосавас пала кодэва мануш. Амэ на холявас, даже если лэс хвалин, важ кода кай амэ лэсти поможысардям или амэнди здэлпэ, кай амэ кадяжэ када затердям.

11. Васо трэбуй тэ хвалисарас анда оди?

¹¹ Анда оди хвалин лэ ԥралэн и лэ ԥэян. Родэн, пала со тэ хвалин ек еқэс. Андэ Библия ԥэнэнпэ, кай если амэ хвалисарас, када подритярэл аврэн (Эф. 4:29). Но кала амэ хвалисарас, трэбуй тэ терас када анда оди. Если тэ на терас када анда оди, тоди амэ ласа тэ малисарас аврэн, важ кода кай амэнди кадэлэстар варисо тэ авэл или на подԥэнаса, кала када трэбуй (Прит. 29:5). Если амэ хвалисарас манушэс, ай пала думэ дас дума найдраго, када сыкавэл, кай амэндэ найчачуни любовь. О апостоло Павло никала кадя на терэлас. Лэ Павлостири любовь сас чачуни. Кала о Павло пистросардя письмо лэ христианонэнди, савэ жувэнас андо Коринфо, во хвалияс лэн анда оди (1 Кор. 11:2). Но вонэ най вся правильно терэнас, и во лэнди ԥэндя пала када ворта, но ковлэс (1 Кор. 11:20—22).

12. Со ек кай и чачуни любовь и кала прилас лэ манушэн пэстэ?

¹² Шон сама и авэн ради, кала прилэн лэ манушэн. О Иегова камэл, кай амэ тэ на авас жадни, ай тэ дас анда оди лэ ԥралэнди и лэ ԥэянди анда собрания кода, со амэндэ исин. (Адиносар 1 Иоанна 3:17 *). Но амэ трэбуй правильно тэ гиндосарас, васо прилас лэ манушэн. Пуш пэстар: «Кас мэ май часто прилав, мэрнэ другонэн, лэ христианонэн, савэ бут со терэн важ и собрания или кодэлэн, кастар амэндэ варисо может тэ авэл? Или мэ дав анда оди кода, со мандэ исин лэ ԥралэнди и лэ ԥэянди, савэн драго на ӷанав или савэ нэ могут манди варисо тэ дэн?» (Луки 14:12—14). Ай со если варико анда христианоря екжэно дошало, кай лэстэ нисо нинай или во на ԥэндя амэнди «наис», важ кода кай шутям лэс сама? О Иегова ԥэнэн амэнди: «Шон сама и авэн ради, кала прилэн лэ манушэн, и на холявэн» (1 Пет. 4:9). Сар ту кадя терэса,  ту авэса бахтало. Кацаво может тэ авэл кати тоди, кала правильно гиндос, васо камэс тэ поможыс аврэнди (Деян. 20:35).

13. а) Кала может тэ авэл фартэ ԥарэс тэ поможыс кодэлэнди, кастэ варисо на вижал? б) Со амэ можем тэ терас, кай тэ поможысарас кодэлэнди, кастэ варисо на вижал?

¹³ Поможын кодэлэнди, кастэ варисо на вижал. Алава анда Библия: «Поможын кодэлэнди, кастэ варисо на вижал, на холявэн ни пэр кастэ» поможына тумэнди тэ диқэн, чачуни тумэндэ любовь чи най (1 Фес. 5:14). Бут кодэлэндэ, кастэ и вера ашэля най кацави, сар сас, времяса упалэ ашэля бари. Но дэкала амэнди трэбуй тэ аштярас и тэ на холявас, важ кода кай дэсавэнди ԥралэнди и ԥэянди вся время трэбуй тэ поможысарас. Амэ можем тэ росԥэнас лэнди алава анда Библия, савэ лэн подритярэна, тэ ақарас лэн пэ служения или тэ виашунас лэн. Но амэнди на трэбуй тэ гиндосарас пала амарэ ԥрала и ԥэя анда собрания, кай варикастэ вся время драго вся вижал, ай варикастэ най. Важ кода кай кажнонэстэ исин, со драго вижал и со най. Даже о апостоло Павло ԥэндя, кай лэстэ бут со на вижалас (2 Кор. 12:9, 10). Важ када амэнди кажнонэсти трэбуй, кай амэнди тэ поможын ԥрала и ԥэя анда собрания.

14. Со трэбуй тэ терас, кай тэ авэл мирно лэ ԥралэнца и лэ ԥэянца анда собрания?

¹⁴ Терэн вся, кай тэ авэл мирно. Амэ терас вся, со андэ амаро зор, кай тэ авэл мирно амарэ ԥралэнца, даже тоди, кала амэнди здэлпэ, кай амэн най кадя полинэ или обжылэпэ кадя, сар амэ на затердям. (Адиносар Римлянам 12:17, 18 *). Если амэ варикас холярдям, амэнди трэбуй тэ ԥэнас «простисар». Но када трэбуй тэ  терэс анда оди. Вместо кода, кай тэ ԥэнэс: «Найдраго, кай кадя вижыля», можешь тэ ԥэнэс, кай андэ кода, со стердяпэ дошало и ту. Можно тэ ԥэнэс: «Простисар, кай мэ холярдэм тут кацавэ алавэнца». Тэ терэс, кай тэ авэл мирно, фартэ трэбуй и андо ери. О хулай и хулаи на трэбуй англа мануша тэ терэн муй, кай лэндэ вся драго, а цэрэ тэ на дэн дума ек аврэса, или тэ акушэнпэ, тэ страминпэ, тэ дэн амрая и тэ марэнпэ.

15. Сар амэ можем тэ сыкавас, кай анда оди простисарас аврэн?

¹⁵ Простин анда вся оди. Если варико амэн холярдя, амэ простисарас кадэлэ манушэс, и на ритярас пэр лэстэ холи. Ласа «тэ любисарас и тэ на холявас пэ ек аврэс» и тэ терас вся, кай тэ авэл мирно. Амэ ласа анда вся оди тэ простисарас даже кодэлэн, ко на поля, кай варисоса холярдя амэн (Эф. 4:2, 3). И любовь «на адиной, скати разоря амэн холярдэ». Кай тэ простисарас анда оди, амэнди трэбуй андэ гиндоря тэ парашас тэ рисавас каринг кода, со сас (1 Кор. 13:4, 5). Кала амэ ритярас и холи, амэ можем тэ хасарас най кати амари дружба лэ ԥралэнца и лэ ԥэянца, но и лэ Иеговаса (Матф. 6:14, 15). Если амэ мангаспэ пала кодэла, ко стердя варисо най кадя против амэндэ, амэ сыкавас, кай анда вся оди простисардям лэн (Луки 6:27, 28).

16. Со амэндэ трэбуй тэ авэл андо ди, кала амэнди дэн тэ терас дила андэ служения лэ Иеговасти?

¹⁶ Авэн готови тэ отдэн пэско. Кала амэнди дэн тэ терас варисави дила андэ служения лэ Иеговасти, амэнди трэбуй тэ сыкавас пэ дила, кай амэ анда оди любисарас амарэн ԥралэн и ԥэян и терас драго аврэнди, а най пэсти (1 Кор. 10:24). Кала и распорядителя пэ конгрессоря зажан андо зало, сар инке и двэри на ԥэрнаделэпэ важ и мануша, кадэла ԥрала на терэн кадя, кай тэ залэн пэсти и важ пэско ери само лашэ ҭана. Но вонэ часто ашавэн кадэла ҭана важ авэр. И распорядителя терэн драго аврэнди, ай най пэсти, важ кода кай вонэ на аштярэн, кай лэнди тэ дэн варисо пала када. Можем амэ лэндар тэ сытювас?

17. Со стерэла кодэва, ко любий па чачимастэ аврэн, кала стердя баро бэзэх?

¹⁷ Росԥэнэн пала грехоря, важ савэ нико на ӷанэн и будэр на терэн лэн. Дэкала христианино, гаравэл кодэва баро бэзэх, саво стердя важ кода кай лажал или дарал тэ стерэл, кай аврэнди авэла ԥарэс (Прит. 28:13). Но кодэва, ко гаравэл о бэзэх, на любий аврэн, важ кода кай када анэн найлашимос пэсти и аврэнди. Через када вся и собрания может тэ хасарэл лэ Дэвлэско духо и тэ хасарэл миро андэ собрания (Эф. 4:30). Если о мануш, саво стердя баро бэзэх, любий па чачимастэ аврэн, во жала кай и старейшиноря, кай вонэ тэ поможын лэсти (Иак. 5:14, 15).

18. Пэ скати важно чачуни любовь?

¹⁸ Любовь май бари всаворэстар (1 Кор. 13:13). Кала амэ сыкавас пэ дила, кай любисарас па чачимастэ, амэ жас пала Христос и терас кадя, сар о Иегова, савэстар жал и любовь (Эф. 5:1, 2). О Павло пистросардя: «Если... мандэ нинай любовь, тоди мэ, нисо» (1 Кор. 13:2). Давайте и май дур тэ любисарас аврэн най кати алавэнца, но и «пэ дила и па чачимастэ»!