Со поможыя, кай тэ авэл интересно тэ адинос и Библия и кай када тэ анэн лашимос? Роздиқам панч лашэ советоря.

Арак ҭан, кай тути авэла драго тэ адинос. Виарак спокойно лашо ҭан, кай нисо тут тэ на отвлекает тэ адинос. Лашо вудуд и свижо воздухо поможына тути драго тэ гиндос пала кода, со адинос.

Мэк тутэ авэн правильни гиндоря, кала адинос. И Библия, када письмо Кодэлэстар, ко дя амэнди и жызня. Важ када тэ адинос ла трэбуй кадя, сар бэято ашунэл пэстирэ любящёнэ дадэс. Если ту гиндос найдраго пала Библия или тути варисо андэр латэ на чалёл, парув пэстирэ гиндоря, кай о Дэл моӷ тэ сытярэл тут (Псалом 25:4).

Мангпэ англа кода, сар тэ адинос. Андэ Библия запистромэ лэ Дэвлэстирэ гиндоря, важ када, амэнди трэбуй лэстири помощь, кай тэ полас лэн. О Дэл ԥэндя, кай «дэла о свынто духо кодэлэнди, ко мангэл лэс» (Луки 11:13). О свынто духо поможыя тути тэ полэс, сар гиндой о Дэл. Прожала время и о свынто духо дэла май драго тэ полэс «дажэ бари лэ Дэвлэстири мудрость» (1 Коринфянам 2:10).

Кала адинос, гиндосар пала када. На лэпэ тэ адинос фартэ бут, кати важ кода, кай тэ проадинос. Гиндосар пала кода, со адинос. Пуш пэстар. Саво о мануш, пала саво мэ проадиносардэм? Сости мэ моӷу лэстар тэ сытював?

Стов цэли. Кай тэ на гиндос, кай адинос и Библия евья, родэ андэр латэ кода, со стерэла тири жызня май лащи. Акэ савэ цэли ту можэш тэ стос. Май бут тэ уӷанэс пала Дэл. Тэ парудёс андэ лащи риг или тэ ашэс лашэ хуласа или хулаяса. Тоди арак дэсавэ стихоря, савэ поможына тути тэ домардёс кадэла цэли *.

Кадэла панч советоря поможына тути тэ лэспэ тэ адинос. Но сар тэ стерэс, кай тэ авэл май интересно тэ адинос и Библия? Пала када подаса дума андэ авэр статья.