Андэ Библия кати еқвар пистромэ пала татуировки. Када андэ книӷа Левит 19:28: «На терэн пэсти татуировки». Кадэва законо о Дэл дя лэ израильтянонэнди важ кода, кай вонэ тэ на шонпэ пэ авэр народоря, савэ вимарэнас пэсти пэ тила алава и знакоря пэстирэ дэвлэнди (Второзаконие 14:2). Адес и христианоря на ритярэн кодэва Законо, саво о Дэл дя важ израильтяноря. Но через кодэла законоря амэ можэм май драго тэ полас и принцыпоря, пэ савэ трэбуй тэ шас сама и адес.

Можно лэ христианонэнди адес тэ терэн и татуировки или тэ рисуин пэ тила?

 И библейски стихоря, савэ исин андэ кадэя статья, поможына тумэнди тэ погиндон пала кадэва вопросо.

•   Кала и жувля вурядёнпэ, о Дэл камэл, «кай када тэ авэл скромно и годяса» (1 Тимофею 2:9). Када кадяжэ поджал и важ и мурша. Амэнди трэбуй тэ гиндосарас пала авэр, кай амаро выборо тэ на задевает аврэндирэ чуства. Ай кадяжэ тэ на шас фартэ бут сама пэр пэстэ.

•   Варико када терэл, кай тэ чуствуют пэс май уверено или камэн тэ сыкавэн, кай лэнди всаек, со гиндон авэр. Ай авэр камэн тэ доԥэнэн, кай вонэ екжэнэ хулая па пэстири тила. Но андэ Библия ԥэнэнпэ: «Отдэн лэ Дэвлэсти пэстири тила сар жэртва, сави жунди, свынто и уӷодно лэсти, и служын лэсти годяса» (Римлянам 12:1). Погиндон пала алава «служын лэсти годяса». Со када значит? Погиндосар, васо ту камэс тэ стерэс татуировка? Просто важ кода кай када модно? Или можэт камэс тэ сыкавэс, кай ту подритярэс варисавэ манушэн, савэ терэн татуировки. Но на бистэр, кода, со ту щяс камэс, можэт потом парудёла, но па тила када ужэ на стриса. Если ту полэса васо ту камэс тэ стерэс татуировка, тоди ту прилэса годявэрни ришэния (Притчи 4:7).

•   «Кодэла, ко старыинпэ тэ стерэн, лэндэ вся вижала, ай савэ грабин, лэн аштярэл чорымос» (Притчи 21:5). Часто мануша грабинпэ тэ стерэн татуировка, ай потом жалеют пала када. Ай кала удаляют татуировка, када дуқанэс и ашэл барэ ловэ. Щяс часто предлаӷают кацави услуӷа, кай тэ удалин и татуировка, и бут мануша камэн када тэ стерэн, хоть када и ашэл куч. Када сыкавэл, кай часто мануша, савэ стердэ варикала татуировка, потом жалеют пала када.