O Isus phendea: „Va vazdela-pe națiunea contra națiunea hai regato contra regato. Va avena bare izdraimata phuveache hai anda iech than ande aver țâra hamasco hai bare nasfalimata”. (Luca 21:10, 11) Cadea sar le linii pa iech nai cheren iech amprenta, sa cadea, sea cadal evenimentea ande iech than cheren iech corcoro semno. Hai cadea sar iech amprenta digitalo sicavel con si iech jeno, sea cadal evenimentea cai întâmplon-pe ande sa codo timpo, sicaven că „o Regato le Devlesco silo pașă”. Pherdile-pe ciaces sea cadal evenimentea ande sa codo timpo, pe sea i phuv? Te dichas le dovezi.

1. RĂZBOAIA

Ando bărș 1914, sas iech războio cai ci mai sas ji atunci. Le istorici phenen că o bărș 1914 sas o bărș cai parudea i istoria le manușenghi, anda codoia că astardea o Iechto Războio Mondialo. Ande cado războio folosisarde-pe zurales but arme sar niciechdata ji atunci, sar avenas: tancuri, bombe, mitraliere hai gaze toxice. Pala codoia, avilea o Duito Războio Mondialo, ande savo folosisarde-pe bombe atomice. De atunci, sea o timpo sas războaia ande diferime thema pe sea i phuv, ande save milioanea manușa hasarde penghi viața.

2. IZDRAIMATA PHUVEACHE

I revista Britannica Academic phenel că ande fiesavo bărș, cam 100 izdraimata phuveache cheren „bare pagube”. O servicio de prospectare geologică andal Statele Unite phenel că, pala le rapoartea andal palutne 100 bărșa, ajucăras-ame ca, ande fiesavo bărș, te aven cam 16 bare izdraimata phuveache”. Unii phenen că ci si mai but izdraimata phuveache, tha că acana si aparatea mai lașe cai sicaven-le sea. Tha, o ciacimos si că le bare izdraimata phuveache pa sea i phuv, anen but ducha hai mudaren mai but manușa sar oricana.

 3. BOCHALIMOS

O bochalimos cai si aghies pe sea i phuv cărdilea anda le but marimata, corupția, criza economico, că i phuv ci mai del pesco rodo hai anda codoia că le manușa ci jianen te încăren tela o controlo le paruimata meteo. Iech raporto anda o Programo Alimentaro Mondialo catar o ONU anda 2018 phenel: „Pi phuv, 821 milioanea manușen silen țâra hamos; mașcar lende 124 milioanea manușen nai-len chanci so te han”. Ande fiesavo bărș, meren cam 3,1 milioanea șiave anda codoia că ci silen so te han. Ando bărș 2011, cam 45% anda le șiave cai mule, mule bochatar.

4. NASFALIMATA HAI EPIDEMII

Iech revista anda i Organizația Mondialo anda o Sastimos phenel: „O secolo 21 nachlea deja prin bare epidemii. Avile parpale nasfalimata cai sas andal timpuri purane, sar si i holera, i ciuma hai i febra galbeno, hai avile neve nasfalimata, sar si SARS [o Sindromo respirator acut sever], i gripa pandemică, MERS [o Sindromo respirator anda o Oriento Mijlociu], Ebola hai Zika.” Hai i palutni sas i pandemia de COVID-19. Chiar cana le manușa sicade hai le medici dine penghi zor caște sichion mai but andal nasfalimata, von ci arachle tratamentea anda lende.

5. IECH LUCRAREA DE PREDICARE PE SEA I PHUV

O Isus dea duma vi anda aver buchi cai cherel partea anda o semno: „Cadai vestea lași anda o Regato va avela phendi pe sea i phuv sar mărturia anda sea-l națiuni. Hai atunci va avela o sfârșito”. (Matei 24:14) Chiar cana le manușen silen bare pharimata, mai but sar 8 milioanea manușa pe sea i phuv den duma anda i vestea lași anda o Regato le Devlesco ande mai but sar 1 000 șiba ande 240 thema hai teritorii. Iech lucrarea sar cadaia ci mai sas niciechdata pi phuv.

Le evenimentea cai cheren partea anda o semno phendo le Isusostar pheren-pe tela amare iacha. So însemnol cadaia anda amende? Te anas ande amari goghi so phendea o Isus: „Cana va dichena cadal buchia că întâmplon-pe, te jianen că o Regato le Devlesco silo pașă”. (Luca 21:31)

O semno dino le Isusostar hai le calcule cărde pala i Biblia ajutin-ame te hachiaras că o Del cărdea o Regato ando cerii ando bărș 1914. a Sa ande codo bărș, vo șiutea sar Rege pesche Șiaves, o Isus Cristos. (Psalmo 2:2, 4, 6-9) Na pa but timpo, o Regato le Devlesco va raila pe sea i phuv, va chosela sea le coaver guvernea cai așen lesche contra hai va cherela i phuv iech paradiso, cai le manușa va traina anda sea o timpo.

Na pa but timpo, va pherela-pe so phendea o Isus ande pesco manglimos: „Te avel chio Regato. Te cărdiol-pe chi voia, cadea sar ando cerii, vi pi phuv”. (Matei 6:10) Tha so cărdea o Regato de cana astardea te rail, anda o bărș 1914? Hai so daisaras te ajucăras te cherel o Regato cana va raila opral sea le manușa?