Vhanu lava dumbekaka va dumbiwa hi vapswali, vanghanu ni vatholi vavu. Va landzra minawu, va hetisisa swidumbiso swavu nakone minkama hinkwayu va khanela ntiyiso.

Ka swiyimu swin’wana, ntsrhunxeko lowu u wu kumaka u wu kuma hi kola ka leswi va ku dumbaka.

“Ndlela leyinene ya ku yentxa leswaku vapswali vaku va ku dumba, i ku kombisa leswaku u kulile nakone wa byi tiva wutihlamuleli byaku, ku nga li loko va li kone ntsena kambe ni loko va nga li kone.”​—Sarahi.

NSINYA WA NAWU WA BIBELE: ‘Tikambani.’​—2 Ba-le-Korinte 13:5.

Loko u djula leswaku va ku dumba, mavonela lama landzrelaka ma nga ku pfuna.

Khanela ntiyiso. Loko u tsrhama hi ku khanela madzrimi, vhanu va nge he ku dumbi. Kambe loko u dumbeka ni ku khanela ntiyiso—​ngopfungopfu loko u yentxe xihoxo​—vhanu va ta ku dumba.

“Swa nabyala ku dumbeka loko mintxhumu yi ku fambela ha hombe. Kambe loko u dumbeka nambi loko mintxhumu ya kone yi ta ku yentxa u voneka ingiki a wu munene, vhanu va ta ya va ku dumba swinene.”​—Caiman.

NSINYA WA NAWU WA BIBELE: ‘Hi navela ku tifambela hi ku lulama matlhelo hinkwawu’​—Va-Heberu 13:18, Bibele Dra Kuxwenga.

Vana lwa dumbekaka. Ka nkambisiso wun’wana wa le Estados Unidos, vatholi va 78 wa tipursentu va hlaye leswaku ku dumbeka i “wun’we ya mintxhumu yizrazru ya lisima swinene leyi komponi yi yi yimelaka loko yi thola mhunu.” Loko u dumbeka swoswi, swi ta ku pfuna ni loko kutani u kulile.

“Vapswali vanga va swi xiya loko ni hetisisa wutihlamuleli byanga ni ku yentxa mintizro ya le kaya na va nga ni landzrelelanga. Loko ni yentxa tanu, va ta ya va ni dumba swinene.”​—Sarah

NSINYA WA NAWU WA BIBELE: ‘Ndzre ku tsralela hi ku dumba ku yingiseta kwaku, ndzri swi tivaka leswaku u ta yentxa ni ku tlula leswi ndzri ku byelaka.’​—Filemon 21.

Lehisa mbilu: Swa nabyala ku vona loko mizri wa mhunu wu kula hi ku kahlula, kambe a swi nabyali ku xiya loko hakunene a kulile a miyanakanyweni.

“Leswaku vapswali vaku ni van’wana va ku dumba swi teka nkama nakone swi djula u tikazrata. Kambe loko u hetisisa wutihlamuleli byaku, swi ta yentxa leswaku va ku dumba hi ku famba ka nkama.”—Brandon

NSINYA WA NAWU WA BIBELE: ‘Yambalani . . . a ku tiyisela.’​—Ba-le-Kolosa 3:12.