A WUNANGA a byi hamba xiyenge xa lisima ngopfu swinene ka Vaisrayele. A Bibele minkama yinyingi dzri vulavula hi switxhayatxhayana swa ku siyanasiyana ni ku yimbelela hi mazritu. Xiyenge lexikulu xa Bibele xi vumbiwa hi tinsimu. Hi xikombiso Amapsalma, Lisimu dzra Solomoni, ni Swidzrilo. Buku ledzri vulavulaka hi wutomi a minkameni ya Bibele dzri hlaya leswaku “swi tikomba na swi li livaleni leswaku a Vaisrayele a va tizrisa wunanga ka mintizro ya ku siyanasiyana a wuton’wini byavu”.

Wunanga ka wutomi bya siku ni siku. A Vaisrayele a va kombisa matitwela yavu hi ku txhaya wunanga. (Eza. 30:29) Vavasati a va txhaya swingomana, va yimbelela wunanga hi ku nyonxa nakone a va kina ka minkhuvu ya ku fana ni loko mhunu wa kukazri a bekiwa kuva hosi, loko masotxha ma buya na ma hlulile a yimpini kumbe ka minkhuvu yin’wana ya wugandzreli.(Abaṭ. 11:34; 1 Sam. 18:6, 7; 1 Tih. 1:39, 40) A va Israyele a va tlhela va yimbelela akuva va kombisa ku vaviseka loku a va ku twa loko va feliwile. (2 Makr. 35:25) McClintock ni Cyclopedia dzra kukazri swi hlaya leswaku handle ka ku ganaganeka “Vaheberu nakunene a va byi zrandzra wunanga”.

Tihosi ta Israyele a ti byi zrandzra wunanga. Hi xikombiso hosi Sawulo a vitane Davhida a ndlwini ya wuhosi akuva a mu txhayela arpa. (1 Sam. 16:18, 23) Hi ku famba ka nkama loko Davhida a ve hosi, a hambe switxhayatxhhayana, a khandha tinsimu ta ku xonga a tlhela a lulamisela vhanu akuva va yimbelela a tempeleni dzra Yehovha. (2 Makr. 7:6; Amo. 6:5) Hosi Solomoni a a ni vayimbeleli va xisati a ndlwini yake ya wuhosi.—Ekles. 2:8.

Wunanga a wugandzrelini. Xa lisima ngopfu hi leswaku Vaisrayele a va tizrisa wunanga a wugandzrelini bya Yehovha. Akuva u va ni muvono, 4.000 wa vavanuna a va txhaya switxhayatxhayana a tempeleni dzra Yerusalema. (1 Makr. 23:5) A va txhaya matimbale, switende, swipalapala ni maarpa. (2 Makr. 5:12) Kambe a ku nga li vone ntsena lava a va gandzrela Yehovha hi ku yimbelela. Vaisrayele vanyingi a va yimbelela loko va li ka liyendzro dzra ku ya ka minkhuvu ya lembe a Yerusalema. Byin’we bya wunanga lebyo a byi vitaniwa Tinsimu Ta Ku Tlhantuka. (Amaps. 120-134) Hi ku ya hi leswi tsraliwiki mayelanu ni Vayuda, a Vaisrayele a va yimbelela Amapsalma ya Haleli a kumbe lisimu dzra ku dzrumisa Yehovha hi nkama lowu a ku tlangeliwa Paxkwa.

A ku yimbelela swa ha tama swi va swa lisima ngopfu ka vhanu va Xikwembu Nkulukumba. (Yak. 5:13) Ku yimbelela swi hamba xiyenge xa wugandzreli byezru. (Efe. 5:19) Loko hi yimbelelela Yehovha tinsimu xikan’we swi hi tsrhindzretela kusuhi ni vamakwezru. (Kol. 3:16) Nakone leswo swa hi tiyisa loko hi kumana ni swikazratu. (Mint. 16:25) Handle ka ku ganaganeka, ku yimbelela i ndlela leyinene ya ku kombisa lipfumelo ni lizrandzru ledzri hi nga na dzrone ha Yehovha.