Im-him. Bibele dzri swi beka livaleni leswaku Xikwembu Nkulukumba a vumbe vhanu ku patsra ni ‘tinxaka’ ta ku hambanahambana ta swihazri ni swimila. * (Genesis 1:12, 21, 25, 27; Apfuletelo 4:11) Bibele dzri hlaya leswaku vhanu hinkwavu va huma ka Adamu na Evha, vapswele vezru va ku sungula. (Genesis 3:20; 4:1) Bibele a dzri swi seketeli leswaku Xikwembu Nkulukumba a tizrise ku titumbulukela ka mintxhumu akuva a vumba mixaka ya ku hambanahambana ya wutomi, leswi minkama yin’wana swi vitaniwaka dondzro ya ku titumbulukela ka mintxhumu hansi ka nkongomiso wa Xikwembu. Mhaka hi leswaku, a ku na ntxhumu ndzreni ka Bibele lowu lwisanaka ni leswi tintlhazri ti swi hlayaka mayelanu ni ku txintxa txintxa loku nga vaka kone ka mintxhumu leyi hanyaka.

•  Xana Xikwembu Nkulukumba a tsrhike mintxhumu yi titumbulukela?

•  Xana ku titumbulukela ka mintxhumu ka yelana ni leswi Bibele dzri swi hlayaka?

•  Xana a wuswikoti bya kuva swimila ni swihazri swi kota ku titxintxa swi titwananisa ni swiyimu, byi kombisa leswaku leswo i ku titumbulukela?

Vhanu lava liki Xikwembu Nkulukumba e tsrhika mintxhumu yi titumbulukela, a va swi koti ku tlhamuxela leswaku swi yentxisa kuyini. Hi ku ya hi Encyclopedia Britannica, vhanu van’wana va pfumela leswaku Xikwembu Nkulukumba a kongomisa misava hi xiwelo.

Dondzro ya ku titumbulukela ka mintxhumu hansi ka nkongomiso wa Xikwembu yi patsra leswi:

• Hinkwaswu leswi hanyaka swi hume ka vakokwana va hinkwezru khalekhale swinene.

• Ntxhumu lowu hanyaka wu nga titxintxa hi ku helela wu va ntxhumu wun’wana lowu hanyaka.

• Xikwembu Nkulukumba hi yene a yentxaka hinkwaswu leswo.

Dondzro ya ku titumbulukela ka mintxhumu hansi ka nkongomiso wa Xikwembu, yi djula ku hlaya leswaku wudzrunguli lebyi nga ka Genesis a hi ntiyiso. Nambitanu, Yesu a vulavule hi wudzrunguli bya Genesis swanga mintxhumu leyi humeleliki hakunene. (Genesis 1:26, 27; 2:18-24; Matewu 19:4-6) Bibele dzri hlaya leswaku na Yesu a nga si na ta misaveni, a hanye matilweni na Xikwembu Nkulukumba nakone a patsrekile ka ku pfuna Xikwembu Nkulukumba ku tumbuluxa mintxhumu hinkwayu. (Yohan 1:3) Xileswo, a mhaka ya kuva Xikwembu Nkulukumba a tsrhike mintxhumu yi titumbulukela akuva ku va ni wutomi, a yi yelani ni leswi Bibele dzri swi dondzrisaka.

Bibele a dzri hlayi leswaku ku nga va ni ku txintxatxintxa kungani a xikazri ka ntxhumu lowu hanyaka. Nakone a dzri phikisi mhaka ya leswaku swimila ni swihazri swa ku hambanahambana leswi hambiwiki ha Yehovha, swi nga txintxa kumbe ku titwananisa ni swiyimu ka mimbangu leyimpswha. Nambi leswi van’wana va vonaka leswaku leswo i ku titumbulukela ka mintxhumu, a ku na ntxhumu wun’wana wa wumpswha lowu hanyaka wu humaka.