‘ÄE LA re a‘häe la fakse ‘äe la‘la‘ạu ‘e sal ta ‘e ta terȧn lȧg mahat. Ar ne lȧg ta hele‘uena la lahlah. Mer ta kamat la tā, fü‘ ta palkā, ma kotä uạs ta vil malol. ‘Äe la‘ mij pạu la ao ta utut la ‘äe la ū e. Ma ta ‘äe räe se ta rihap het ‘e far ne sal ta. Iạ moumou, ka mamas, ma lelei la sur sin. ‘Oaf ti‘ut tạu se ‘ou huga ‘e reko ‘äe pola noh ū ‘e täe!

² ‘Is noh ‘e ao ne lȧg maha. Te‘ ne te ne täe ‘e rȧnte‘ ‘ut ma kikia se muạ la raksa‘. Ka ma ‘on utut la ‘äe la pola ū e, utut ne la sại‘ạkia ‘äe ‘e te mamạru. Ka ut teset? A‘häe se te ne Puk Ha‘a ‘ea: “Gou la fäeag‘ȧk Jihova ma ‘eag, Ia ‘otou ūaga ka ‘otou koro. ‘Otou ‘Ạitut ne gou tua‘nȧk sin.”—Salamo 91:2.

³ A‘häe se te ta‘ag! Jihova, Iạ ne fup‘ȧk tē ma Puer Purer se rȧnte‘ ma lạgi, la pola ū ‘is ‘e te‘ ne te mamạru. Iạ la po sema la matạ‘ se ‘isa, ‘e reko ‘on ne‘ne‘i ti‘ se‘ ‘e ta famorit, ne ‘e ta tēet ma, ne la re la mane‘ạkia ‘is. Ne kepoi ka la ma ‘on tēet la mane‘ȧk ‘is, ka Jihova la po sema la ‘ut‘ạkia te‘ ne te raksa‘ ‘atakoa. Tes tä ‘is la re la Jihova täla ‘os uạga? ‘Is kop la tua‘nȧk pạu se ia. Ma hoi‘ȧk, Fäeag ‘on ‘Ạitu fas‘ȧk se ‘isa ma ‘eag: “Ka ȧf‘ȧk ‘aus ‘e hanis ‘on ‘Ạitu.” (Puk ‘on Juta 21) Aier pạu, ne ‘is kop la noh mou ‘e hanisit se ‘Ạitu,‘e ‘os matạ‘uạg ne ‘os hanisi la se uf ‘e ta avat ma ‘os Ö‘fa faklạgi. Ma kota ‘is po la aier‘ȧk ne iạ ta ‘os uạgat. Ka ‘is la sok‘ȧk tapen hanis te‘is?

AIER‘ȦK MA TẠRIA HANIS ‘ON ‘ẠITU

⁴ ‘Os la noh mou ‘e hanis ‘on ‘Ạitu,‘is kop la ‘inea ma aier‘ȧk pạu hanis ‘on Jihova ne kel‘ȧk vạhia se ‘isa. A‘häe‘ȧk te he his ne ‘äe rak vạhia ‘e Puk Ha‘a, ma hạiasoag ne täe ‘e puk hete‘is. ‘E reko iạ ne Fup‘ȧk Tē Jihova, iạ na se ‘isa rȧnte‘ la ta‘ag ‘os hanuạ helavat la ‘is la noho e. Iạ na se ‘on laloga tela‘a ma tạnu, ma te ne pōom ‘e pear ta, mȧür helav ‘on te‘ ne mạnmạnu, ma ut keleag lelei. ‘E reko iạ ne ‘On‘on Puk Ha‘a, iạ ‘Ạitu, kel‘ȧk ‘on asa, ma te lelei ka ‘es‘ao se ‘isa. Ma ati‘ se‘, ‘on Kel‘ạkiạg se ‘isa ne iạ nāam ‘on Le‘et ne iạ hanis sin se rȧnte‘ la mamauạ ma al ‘e reko ‘is. (Jone 3:16) Ma tes ta ‘on fuạg ne te fakhanis ta‘ag se ‘isa? Iạ na se ‘isa ‘ạiröt‘ạkiget se mȧür ‘oaf‘ofa ne ta‘ ‘ut‘utum ‘og.

⁵ ‘Os ‘ạiröt‘ạkiget se mạuri tape‘ma, täe kikia ‘e te hoi‘ạkit ne ‘Ạitu a‘sok vạhia. Jihova fu‘ȧk vạhia ta matantūut ‘e hevạni, Pure‘agat ne Mesaie ta la pure. Iạ täla a‘ofia mamaua ma la re rȧnte‘ la parataisi. ‘Äe la a‘häe sin! ‘Is la pola noh fürmariạ ma ‘oaf‘oaf se ao se ‘es tohiget. (Salamo 37:29) Ka ‘e ‘on ‘i‘i ‘Ạitu na vạhia muạ‘ạkiga se ‘isa ‘e ‘os la noh lelei. Iạ na tape‘ma se ‘isa tefakhanisit,‘e ‘on va‘ön‘ạkiạg ne ‘is la hạifäegag ma iạ ‘e ‘os ro‘ạitu ‘e av het ma. Te‘is sal he his ne Jihova kel‘ȧk vạhia ‘on hanisi, se famör ‘atakoa ma tape‘ma se ‘äea.

⁶ Saio‘ ‘es‘ao pạut la ‘äe la re a‘häe sin te‘is: Ka gou la tȧr tapen hanis ‘on Jihova? Iris ma‘oi la ‘ea, “Gou kop la hanis ‘e Jihova la fakma se ‘on hanisit se goua.” Tei ka ‘äe a‘häe tape‘? Jisu ‘eag ne te‘is fäeag fas‘ȧk pumuet ‘e te‘ ne fäeag fas‘ȧk ‘atakoa: “‘Äe la ‘oaf se Jihova, ‘ou ‘Ạitu, ‘e ‘ou huạg ‘atakoa, ma ‘e ‘ou ‘at ‘atakoa, ma ‘e ‘ou a‘häe ‘atakoa.’’ (Mataio 22:37) ‘Äe ma hün ma‘oi aier pạu la ‘äe la hanis ‘e Jihova ‘Ạitu. Tei ka ‘ou hanis ta‘a se Jihova, ‘äe la pola ‘ea ne ‘äe hanis ‘e iạ ‘e lal ne ‘ou huga, ‘ou a‘häe ma ‘ou ‘ata?

⁷ ‘E reko te ne kel‘ȧk vạhia ‘e Puk Ha‘a, ‘ou hanisi se ‘Ạitu ti‘ se‘ ‘e a‘häe. Aier, ‘ou a‘häe hanisit se Jihova iạ te ‘es‘aot, ka ‘ou a‘häe ta‘ag ta kamatag ne hanis airet se ia. Huạl ne ‘apör heta ‘es‘ao se ‘on la fup‘ȧk ne ta ‘apör hūut ne la hue‘ȧk hue. Nono ka ‘äe pa ‘es ta ‘apör het, ma tei ka ‘äe la ‘oaf kepoi ka le‘et la na se ‘äea ta huạl ne ‘apör het? ‘Äe kal ‘oaf ra! Tatạu sema, se ‘on kamatag ne ‘ou hanisit se Jihova ‘Ạitu. Puk Ha‘a ‘ea: “Ne te‘is hanisit se ‘Ạitu te‘is—la ‘is la ȧf‘ạkia ‘on fäeag fas‘ạki. Ma ‘on fäeag fas‘ạki kat häeag ‘e noa ra.” (1 Jone 5:3) Fakse te aier ne rak‘ȧk vạhia, ‘os hanisit se ‘Ạitu ‘is kop la hue‘ȧk hue lelei. Kop la kel‘ȧk ‘e garue.—Mataio 7:16-20.

⁸ ‘Is kel‘ȧk ‘os hanisi se ‘Ạitu ‘e ao ne ‘is noh a‘fại se ‘on foho ma garue‘ạkia ‘on ‘amnạki. ‘Eake te noanoat la re‘ia. Foh ‘on Jihova ös kikia la re‘ia ‘os mạuri la noh ‘oaf‘oaf ma fürmariạ. (Aisea 48:17, 18) ‘Os noh a‘fạit se muạ‘ạkiạg ‘on Jihova ‘is kel‘ȧk se ‘os Ö‘fa faklạgi ‘os ‘oaf aire ma ‘uạ‘uạ‘ạki ‘e reko te ne iạ re se ‘isa. Te kelea‘ehanisit ‘e reko mea‘mea‘ ne famori ‘e rȧnte‘ ne kel‘ȧk ‘oris ‘ofa ma ‘uạ‘uạ‘ạki. ‘Is kat ‘oaf ra la fakse iris ‘i, iris ne noh ‘e avat ne Jisu ‘e rȧnte‘. Jisu a‘ne‘ne‘ȧk iris saghul ne po ‘e lepear ta, ka le‘ ‘eseat ‘e iris ‘i ho‘im ma ‘uạ‘uạ‘ȧk se ia. (Luke 17:12-17) Taf pạu ne ‘is ‘oaf la fakse le‘et ne ‘oaf ma ‘uạ‘uạ‘ạki, ka ‘eake iris siav ne tore!

⁹ Foh tes hoi‘ȧk ‘e foh ‘on Jihova ta ‘is kop la noh a‘fại sin? ‘Is hạifäegag vạhia se te ma‘oi ne täe ‘e puk hete‘is, ka ‘is la sạkior hoi‘ȧk se te he his ‘i. ‘Os noh a‘fạit se foh ‘on ‘Ạitu, la po la hạiasoag se ‘isa la ‘is la fumou se hanis ‘on ‘Ạitu.

‘UT LA ‘EL MA KIKIA SE JIHOVA

¹⁰ ‘Os rakoag ne te‘ ne te ne täe ‘e Jihova iạ te pumuạ pạut ‘e ‘os la ‘ut a‘elet se iạ. Iạ tēet ne kat nonoj ra la fu‘. Nono ka ‘äe ‘e sisi ‘e ta pög mạtit pạut, a‘mahmahanan ‘äe ‘e ta rạhit, ma tei ka ‘äe la fue‘ la puạl ne rȧh ta la tuk a‘riri‘ la öf? ‘Igke‘. ‘Äe la na ‘ại te‘te‘ la rȧh ta la sun ka la puạl a‘lelei. ‘Ou mȧur ta täe kikia ‘e ‘ou matạ‘uạg ne rȧh ta la nono puạl! ‘E reko ‘ại te‘te‘e iạ ta re rȧh ta la puạl lelei, ma la fakma se “hai‘ineag ma ‘Ạitu” re ‘os hanisi se Jihova la ne‘ne‘ pạu.—Fäeag ‘Es Fuạga 2:1-5.

¹¹ Jisu pa ‘es la iris ne tạupir se iạ la sap la mou se ‘oris hanisit se Jihova ma ‘on Fäeag helav ka aire la noh mȧür ka ne‘ne‘. ‘E vạhiạg ne ‘on fu hoi‘ȧk ta, Jisu rak‘ȧk te se le‘ ruạ ‘e iris ‘on tisạipeli, hün se fäeag parofesại ‘e ‘on rerege ne täe ‘e Puk Ha‘ Hiperiu ta ne iạ a‘soko. Tes ta ‘on ‘es‘ao? Ma kota iria ‘ạl‘ạligen ‘e le‘et se le‘et: “Ka ‘eake ‘otar huga sun ‘e avat ne ia fäefäega e se ‘itara ‘e lag sal ta, ka suisuia ‘on fuạg ne Puk Ha‘a se ‘itara?”—Luke 24:32.

¹² ‘E avat ne ‘äe rak mumuạ te ne Puk Ha‘a ‘ea aire, ma tei ka ‘ou huga kamat la sun ‘e reko ti‘ ne ‘ou ‘ofa ma ririfet ‘e ‘ou hanisit se ‘Ạitu? Taf pạu ne te ta‘ag sok aier se ‘äeag. Iris ma‘oi agtạu tape‘ vạhia. Tēet ne ‘is la re ‘e ‘on ‘i‘i, ‘is la ȧf‘ȧk hanis ta‘ag la noh mȧür ma hạiasoag la fup ma kikia. ‘Is kat ‘oaf ra la tạupir se ag ne rȧnte‘ ‘e terani te ‘i. Jisu rak‘ȧk vạhia: “Ma ‘e rēko ag se nonojo la fup la ti‘, te‘is, hanis ‘on lelea‘ ma‘oi täla matit‘ia.” (Mataio 24:12) ‘Äe la matạ‘ tapen se ‘ou hanisit se Jihova ma te aier ne täe ‘e Puk Ha‘a la noh mȧur ‘e ‘äeag?

¹³ Na vahia la rak te ma kikia ‘e ‘ou pa hai‘ineagat ma Jihova ma Jisu Karisto. (Jone 17:3) A‘häe a‘lal se te ne ‘äe rak ‘e Fäeag ‘on ‘Ạitu ma sạio‘ se ‘äea: ‘Ka tes ta gou rak ‘e reko Jihova ‘Ạitu? Ka hün hoi‘ȧk tes ta rē e gou la gou la hanis ‘e iạ ‘e ‘atakoa ne ‘otou huga, a‘häe ma ‘otou ‘ata?’ (1 Timoti 4:15) ‘Ou a‘häe‘ȧk a‘lal ne te ‘i la po la re ‘ou hanisi se Jihova la ne‘ne‘ ma kikia.

¹⁴ Sal hoi‘ạkit ne ‘is la äf‘ȧk ‘os hanisi se Jihova la mȧur lelei, ‘is la ro‘ạit hạisokoag. (1 Tesalonaika 5:17) ‘E Väe 17 ne puk hete‘is, ‘is rak vạhia ne ro‘ạitu iạ tefakhanis a‘pumuạ‘ạkit ne ‘Ạitu nāam. Fakse hạikạinagag fakfamori re ‘e av het ma, ma ‘os hạikạinagagat ma Jihova mȧur lelei kikia ‘e ‘os ro‘ạitu se iạ ‘e te‘ ne terạni. Iạ te se nonojot la ‘is la fu‘ȧk a‘vȧh ‘os ro‘ạitu—ne tēet ne fȧ‘ la hat ka kat ‘es fuạg ra, ne ro‘ạitut ne kat leum ra ‘e ‘ot huga. ‘Is kop la fäeag se Jihova la fakse le‘ mea‘mea‘ het ne la fäeag se ‘on ö‘fa meavhanisit. ‘Is ‘oaf la fäeag hạiȧf‘ạkiạg,‘e av het ma, ka la aier ‘e ‘ou huga. (Salamo 62:8) Aier, rak Puk Ha‘a ma ro‘ạit aier ne huga, iriạ te ‘es‘ao pạut ‘e ‘os agaga ma titi‘ạkiga ma hạiasoag tape‘ma la ‘is la fumou ‘e hanis ‘on ‘Ạitu.

NOH ‘OAF‘OAF ‘E ‘OU TITI‘ẠKIGA

¹⁵ Rak Puk Ha‘a ma ro‘ạitu ta garue‘ạkiạg ne titi‘ạkiga ne ‘is la po la re ‘e ao ne ‘it ‘esea het. ‘E ‘on ‘i‘i ‘is la ‘io se ta titi‘ạkiạg het ne re ‘e muạ ‘on famör ma‘oi: fäeag‘ạkiạg se famori ‘os mā ma pilifi. Tei ka ‘äe fäeag‘ȧk vạhia ‘ou mā ma pilifi se iris ‘e ‘on rerege? Nono ka aier, ma ‘äe ‘oaf‘oaf ‘e reko ạlạlum‘ạkiạg helavat ne ‘äe po. (Luke 1:74) ‘E avat ne ‘is fäeag‘ȧk te ne ‘is rak vạhia hün se Jihova ‘Ạitu, ma hele‘uen la ‘is la a‘sokoa garue a‘pumuạ‘ạkit ne na se te‘ ne iris ne rot fakKaristo aire—‘on la marag‘ạkiạg ne rog heg ne Pure‘ag ‘on ‘Ạitu.—Mataio 24:14; 28:19, 20.

¹⁶ Räe ‘on ‘apostol ta Paula se ‘on garue te is la te a‘pumuạ‘ạkit, ma koroa pumuet. (2 Korinita 4:7) Fäeag‘ạkiạg ne Jihova ‘Ạitu ma ‘on ‘amnạki se famori, iạ ta garuet ne pumuạ pạu ‘e ta garue hoi‘ạkit ne ‘äe la re. ‘Ou garuet se Iạ ne Iamlam pạu, ma ạlạlum‘ạkiạg ne ‘is la po, kal po ra ‘e ta kạinag garue hoi‘ạkit. Ma ‘e ‘ou reag ne garue te‘is ‘äe hạiasoag iris ne huạg aire la ‘ut a‘el se ‘os Ö‘fa faklạgi, ma iris la po la la‘ ‘e salat se mȧür se ‘es a‘ofige! Ka tei ka ma ‘on garuet la fakse garue te‘is? Ma tape‘ma, ‘e ‘ou marag‘ạkiạg ne Jihova ma ‘on Fäega ‘ut‘ȧk ma kikia ‘ou mā ma pilifi ma a‘ne‘ne‘ȧk ma kikia ‘ou hanisi se iạ. Ma Jihova ‘oaf ma tȧr ‘ou garue fe‘eni. (Hiperiu 6:10) ‘Ou re a‘lelei hạisokoag ne garue te‘is hạiasoagan ‘äe la fumou ‘e hanis ‘on ‘Ạitu.—1 Korinita 15:58.

¹⁷ Iạ te ‘es‘ao pạut la ‘is la a‘häe‘ȧk marag‘ạkiạg ne Pure‘ag ta la garuet ne pa ‘es mij pạu la re. Puk Ha‘a ‘ea: “Ia ‘äe la marag‘ạkia fäeag ‘on ‘Ạitu; nā ‘äe sin ‘e ‘on ava.” (2 Timoti 4:2) Po ‘e tes ta pa ‘es mij pạu ‘e ‘on ‘i‘i? Puk Ha‘a foar se ‘isa: “Terȧn ti‘ ‘on Jihova ‘elemea ka leu mij pạum tape‘ma.” (Sefanaia 1:14) ‘I, ao heta ‘el pạu la Jihova la a‘ofia te‘ ne te ne av te‘is. Te te‘is kop la fäeag‘ȧk mij pạu se famori! Iris kop la ‘inea ne te‘is ‘on ava la hilia Jihova la ‘Oris Uạga. Av fakmür ta “kal fep ra.”—Hapakuki 2:3.

¹⁸ Jihova pa ‘es la ‘is la agag se iạ ‘e ‘os teteag‘esea ma iris ne rot fakKaristo aire. Ta hün het ne ‘on fäega rak‘ȧk: “Ma lelei la ‘is la hạia‘häe‘ạkigen ‘is la ragrag ‘is se mäeav hanisi ma garue lelei; ma ‘is la se roua ‘os tautaunạ‘i la fak ma se ag ‘on famör ‘e ‘on rerege; ‘is la fäefäeag tok ma, ma rē a‘ti se‘ la fak ma ne ‘aus räe se ‘ut‘utugam ne terȧn ta.” (Hiperiu 10:24, 25) ‘E av ne ‘is tạutạunȧ‘ ma iris ne mā ma pilifi ‘e ‘os tạunȧ‘ fakKaristo ‘is po ạlạlum ‘e ‘os la voivoi‘ȧk ma agagat se ‘Ạitut ne ‘is hanis sin. ‘Is tape‘ma ‘ut‘ȧk ma kikia ‘os mā se ‘Ạitu ma fäeag a‘ne‘ne‘ạkia le‘et se le‘et.

¹⁹ ‘E av ne ‘is teteag‘esea ma iris ne agag se Jihova,‘is hạia‘ne‘ne‘ạkigen ‘os hanisi ma hạikạinagaga ‘e laloag ne kạurotuga. Te ‘es‘ao pạut la ‘is la ‘io se te lelei ne täe ‘e le‘et ma le‘et, la fakse Jihova ne ‘io kikia se te lelei ne täe ‘e ‘isa. ‘Äe se a‘häe ne iris ne teag ‘esea ma ‘äe ‘e ‘ou mā ma pilifi ne iris famör ‘atakoa. A‘häe‘ȧk ne famör ‘atakoa kat tatạu ra ‘e ‘oris mȧür fak‘ata, ma te‘ ne ‘is ‘atakoa re te sar. (Kolosa 3:13) Fe‘en ma kikia la hai‘ineag a‘lelei ma iris ne ‘oaf aier se Jihova ma ‘äe täla räea ‘ut ne ‘ou mȧür fak‘ata. ‘I, ma ‘ou agagat se Jihova ma ‘ou hensạsiạg fa fak‘ata ma iris hạina la hạiasoag se ‘äea la fumou ‘e hanis ‘on ‘Ạitu. Ka Jihova ạlạlum‘ȧk tapen iris ne agag aier se iạ la fumou ‘e ‘on hanisi?

FE‘EN LA PO “MȦÜR AIER TA”

²⁰ Jihova ạlạlum‘ȧk ‘on famör ea‘ aire ‘e mạuri, ka kạinag mȧür tapenet? Tei ka ‘äe mȧür aier ‘e ‘on ‘i‘i? Ma‘oit ‘e ‘isa la ‘ea ‘i. ‘E reko ‘is huạg, ‘ate ma ‘iom. Ma taf pạu ne ‘is mȧür. ‘E ao ne ‘is ‘oaf‘ofa e, ma ‘is po la ‘ea ne, “Te‘is ‘on ‘atakoa ne mȧür aier ta!” Ka Puk Ha‘a kel‘ạkim a‘häe ‘es‘ao pạut, ne kat ‘es ra ta famorit ‘e ‘on ‘i‘i mȧür aier.

²¹ Puk Ha‘a fas‘ȧk pạu se ‘isa la “sap a‘mou se mȧür aier ta.” (1 Timoti 6: 19) Fäeag ‘i kel‘ạkim ne “mȧür aier ta” iạ tēet ne ‘is kạt‘ȧk ‘e pa ‘ese ‘e avat ne tore. ‘I, ma ‘e ao ne ‘is la ‘atakoa e, ma ‘is la mȧür la fakse te ne rak‘ȧk vạhia, ‘e reko ta‘ag ‘amnȧk ‘on ‘Ạitu se mȧür ‘on famori ‘e ‘on kamatag pạu. ‘E terạnit ne ‘is la noho e ‘e rȧn parataias te‘ ‘e mȧür lelei fürmaria ma ‘oaf‘ofa, ma ta‘“mȧür aier ta” — mȧür se ‘es tohiget. (1 Timoti 6: 12) Tei ka ia ‘eake ‘ạiröt‘ạkiạg helavat?

²² ‘Is la po tapen la “sap a‘mou se mȧür aier ta”? Te ‘esea ma se te ne Paula fas‘ȧk se lelea‘ rot fakKaristo, “la iris la rē tē lelei tape‘ma,” ma “la tē fuạmamạu ‘oris reag ne garue lelei.” (1 Timoti 6:18) Taf pạu ne täe kikia ‘e ‘isa ‘e ‘os garue‘ȧk ne fäeag aier ne ‘is rak vạhia ‘e Puk Ha‘a. Ka tei ka Paula ‘ạligen ‘os la poag “ne mȧür aier ta” täe kikia ‘e ‘ou garue lelei? ‘Igke‘, se te helav ne ‘is la po täe kikia ‘e “hanis fakkeres” ‘on ‘Ạitu. (Roma 5:15, NW) Jihova ‘oaf la ạlạlum‘ȧk iris ne agag aier se iạ. Iạ pa ‘es la ‘äe la noh‘ȧk ‘e “mȧür aier ta.” Ma kạinag mȧur ‘oaf‘oaf, furmariet ma kat ‘es tohiget ra, ta ‘e muạ se te ‘ ne iris ne fumou ‘e hanis ‘on ‘Ạitu.

²³ Te‘ ne ‘is ‘atakoa nonoj pạu la sạio‘ se ‘isa, ‘Tei ka gou agag se ‘Ạitu la fakse te ne iạ kel‘ȧk vạhia ‘e Puk Ha‘a?’ Nono ka ‘is la po la ‘ea ‘i ‘e te‘ ne terạni, ma ‘is la‘ ‘e salat ne nonojo. ‘Is la po la ‘ea pạu ne Jihova ta ‘os uạga. Iạ la pȧr ‘on famör ne agag aier se ia ‘e av mamạr ka noanoa ne mȧür te‘is. Jihova täla sại‘ạkia ma ho‘am ‘is se mȧür fo‘ou a‘helavat ne ta ‘ut‘utum ‘og. Iạ la te ne ‘oaf airet la ‘is la kel se av ta‘ag! Ma te ne ririfet se ‘isa ‘e ‘os hiliạg ne te nonoj ta ‘e av fakmür te‘is! Nono ka ‘äe hil te lelei ‘e ‘on ‘i‘i, ma ‘äe la po la ‘oaf‘oaf ‘e “mȧür aier ta,” ne Jihova ‘Ạitu ‘amnȧk‘ȧk sin, mȧür se ‘es a‘ofiget!