‘Ạit aier tä iạ ta Fup‘ạkia te‘ ne te ‘atakoa. Iạ kat ‘es kamatag ra ma kat ‘es a‘ofiget ra. (Salamo 90:2) Iạ tä Hü ne rog hegut ne täe ‘e Puk Ha‘ heta. (1 Timoti 1:11) ‘E reko ‘Ạitu tä na‘ia mạuri se ‘isa, ma ‘is kop la titi‘ȧk se iạ ‘esea.​—Hat Kel‘ȧk Tē 4:11.

 Kat ‘es ra ta famorit kel vạhia se ‘Ạitu ‘e reko iạ ‘Ata, ma ‘on fuạga iạ tä mȧür lamlamat ‘e te‘ ne tē mȧür fak for ‘atakoa ne täe ‘e rȧnte‘. (Jone 1:18; 4:24) Ka ‘eake ta‘ma‘ie, ‘is la pola ‘inea ag pumuạ ‘on ‘Ạitu ‘e te‘ ne te ‘atakoa ne iạ fup‘ạki. La fak se, hue ne ‘ại tutu, ma hosa kel‘ạkia se ‘isa ‘on hanisi ma ‘on poto. Ti‘ ne rȧnte‘ ma lạgi ma te‘ ne te ne täe ‘e ‘on laloga rak‘ạkia se ‘isa ‘on ne‘ne‘i.​—Hat Roma 1:20.

 ‘Is pola rak te ma‘oi hün se ag pumuạ ‘on ‘Ạitu ‘e ‘os hatag ne Puk Ha‘ heta. La fak se, iạ rak‘ȧk se ‘isa te ne ‘Ạitu ‘oaf sin ma te ne iạ kat ‘oaf ra sin, ‘on aga se famori, ma te ne ia la re se te tutu ne soksoko.​—Hat Salamo 103:7-​10.

 Jisu ‘eag: “Otomis Ö‘fāat täe ‘e lagi! ‘Ou asa la ȧf‘ȧk la ma‘ma‘.” (Mataio 6:9) ‘E reko ‘Ạitu ma ‘on fuạg ma‘oi na se ia, ka iạ ma as ‘eseat ma. ‘E te‘ ne kạinag fäega kat tatạu ra ‘oris ‘ea‘ea ne as ‘on ‘Ạitu. ‘E fäeag Rotuam ta, ‘on ‘ea‘ea ne as ta “Jihova.” Ka famör ‘e ‘on rerege ‘ea ‘on as ta “Yahweh.”​—Hat Salamo 83:18.

 As ‘on ‘Ạitu ‘ut‘ȧk vạhia ‘e Puk Ha‘ ma‘oi ma na vạhia fuạg ‘i, ‘Ạitu ne Gagaja la togia. ‘E avat ne Puk Ha‘ heta fạ‘i  e, as ‘on ‘Ạitu no‘ a‘ äf 7,000. Jisu fäeag‘ạkia as ‘on ‘Ạitu se famori la iris la ‘inea ‘e avat ne iạ rak‘ạki e ‘Ạitu se irisa.​—Hat Jone 17:26.

 Teka te a‘ru ne agtạu se famori ‘e ut tutu kel‘ȧk ne Jihova ia ‘Ạitut ne kat kokon‘ȧk ra ‘is? Famör ‘e ‘on rerege ‘ea ne iạ ho‘am te a‘ru la ạsạsia ‘is, ka te ta‘ag kat aier ra.​—Hat Jemesa 1:13.

 ‘Ạitu na vạhia se famori ‘oris noh sại la re pure. Teka ‘is kel‘ạk ‘os ‘uạ‘uạ‘ạkiga, ‘e ‘os noh sại la re‘ia ‘os hil te, la ‘is la titi‘ȧk se ‘Ạitu? (Josua 24:15) Ka ma‘oit hilia kikia la re‘ia te raksa‘a se iris ne tore, ma te a‘ru ‘ut ma kikia la ti‘. Huạg ‘on Jihova kokon ‘e avat ne iạ räe e se puer se nonoj tape‘i.​—Hat Kamataga 6:5, 6.

 Jihova iạ ‘Ạitut ne kokon‘ȧk te ne mou se ‘isa. Iạ pa ‘es la ‘os mạuri la ‘oaf‘oaf. ‘Elemea avat ne iạ täla a‘ofia te a‘ru ma te‘ ne iris ne a‘sokoa te ‘i. Ka iạ ma ‘on hün lelei het tä ‘on‘on ia va‘ön‘ạki e te a‘ru la sok ‘e laloag ne ta avat. ‘E Rösön 8 ta, ‘is täla rakoa ne tes tä ‘on fuạg heta.​—Hat 2 Pita 2:9; 3:7, 13.

 Jihova ‘ihia ‘is la ‘ut a‘el se iạ ‘e ‘os hạihạifäegagat ma iạ ‘e ro‘ạitu. Iạ kokon‘ȧk ‘is le‘et se le‘et. (Salamo 65:2; 145:18) Iạ pa ‘es la fạu‘ȧk ‘os ag sara. Iạ ‘inea ne ‘is nā ‘os vahia la a‘ofan iạ, ka ‘e av ‘on rerege ‘is vil. Ma te airet ‘is famör se ‘atakoa, ka ‘is pose ma la po aier hạikạinagag ‘elet ma ‘Ạitu.​—Hat Salamo 103:12-​14; Jemesa 4:8.

 ‘E reko Jihova tä na‘ia se ‘isa mạuri, ma nonoj la ‘os hanisi la ti‘ se‘ se ia ‘e ta le‘ hoi‘ạkit. (Mareko 12:30) ‘E av ne ‘äe kel‘ạkia ‘ou hanisi se ‘Ạitu ‘e ‘ou rakoag ma kikia te ne mou se ia ma re‘ia te ne iạ far‘ȧk se ‘äea la re, ma ‘äe la pola ‘ut la ‘el pạu se iạ.​—Hat 1 Timoti 2:4; 1 Jone 5:3.