Ma aier pạu, ne sạkior a‘luạk ne te ‘es‘av ne Puk Ha‘ heta rak‘ạki, ta a‘nene‘ạkia ‘ou hanisi se Jihova. ‘Is kop la garue fe‘en la re ‘os hanisit se Jihova la ne‘ne‘ ma kikia. (1 Pita 2:2) ‘Ou ‘ạiröt‘ạkiget se mȧür se ‘es gata‘aga, täe kikia ‘e ‘ou la ‘ut a‘el hạisokogat se ia ‘e rakoag ne ‘on Fäega.​—Hat Jone 17:3; Juta 21.

 ‘E avat ne ‘ou ‘ineag ne ‘Ạitu ‘ut ma kikia se muạ, ‘ou pilifi täla ‘ut la ne‘ne‘ ma kikia. Pilifi täla hạiasoagan ‘äe la a‘ofan ‘Ạitu. (Hiperiu 11:1, 6) Iạ täla rue‘ạkia ‘ou huga la ‘äe la huạha‘ ma jenea se mȧür lelei ka ‘es‘ao ne ‘äe la mȧür‘ạki.​—Hat Garue 3:19.

 ‘Äe täla pa ‘es la fäeag‘ạkia te ne ‘äe rako se iris ne tore​—‘is ‘atakoa ririạf la fäeag‘ạkia rog heg ta. ‘E avat ne ‘äe rak ma kikia Puk Ha‘ heta, ‘äe täla rak la a‘esav‘ạkia Puk Ha‘ heta la sui‘ạkia ‘ou pilifi hün se Jihova ma rog heg ta.​—Hat Roma 10:13-15.

 Famör ma‘oi kamat ‘e ‘oris fäeag‘ȧk ne rog heg ta se ‘oris kạumane‘aga ma kạinaga. Pot ‘e fäefäega. Ma ‘e reko ‘is la se ‘eakia se irisa ne te ne iris pilif sin ‘e ‘oris rotu kat aier ra, ka fäeag‘ạkia se irisa fäeag porȧk ‘atakoa ‘on ‘Ạitu ne na vạhia. Tape‘ma, a‘häe‘ȧk ne famori ‘oaf a‘ti‘ kikia se ‘ou kel‘ạkiạg ne ag mäeav hanisi,‘e te ne ‘äe ‘ea.​—Hat 2 Timoti 2:24, 25.

 Rakoag ne Fäeag ‘on ‘Ạitu la po la häiasoag se ‘äe la ‘ut fak‘at. Ma täla hele‘ la ‘äe la po ta hạikạinagag pumuạ  pạut ma Jihova. ‘Äe täla mou se iạ la le‘et ‘e ‘on kạunohoag ta.​—Hat 2 Korinita 6:18.

 ‘Äe la pola ‘ut fak‘at ma kikia ‘e ‘ou la rak hạisokoag ne Fäeag ‘on ‘Ạitu. (Hiperiu 5:13, 14) Far‘ȧk se le‘et ‘e iris Jihova Uetnes ta la rak Puk Ha‘ ma ‘äe ‘e ‘ou a‘esav‘ạkiạg ne puk hete‘ Ka Tes Tä Puk Ha‘a ‘Ea Aire? Ti‘ ne ‘ou rakoag ne Fäeag ‘on ‘Ạitu, ta ti‘ ne ‘on lelei se ‘ou mạuri.​—Hat Salamo 1:1-3; 73:27, 28.

 Rog heg ta leum ‘e Jihova, ‘Ạit ‘oaf‘ofat. ‘Äe la pola ‘ut a‘el se ia ‘e ‘ou ‘ut‘uạg la ‘el se ‘on famori. (Hiperiu 10:24, 25) ‘E ‘ou fe‘eni la a‘ofan Jihova, ‘äe täla hele‘uou ‘e mȧür aier ta​—mȧür se ‘es gata‘aga. ‘Ut‘uạg la ‘el se ‘Ạitu ta te pumuet ne ‘äe la pola re.​—Hat 1 Timoti 1:11; 6:19.