RESÖN 7
Tes ta Pure‘ag ‘on ‘Ạitu?
1. Ka tes ta Pure‘ag ‘on ‘Ạitu?
Ka tes tä rē Jisu la Sạut ne nonoj la pure?—MAREKO 1:40-42.
Pure‘ag ‘on ‘Ạitu ta matantu fakhevȧn ta. Iạ täla ‘ut‘ạkia matantu ‘atakoa ma täla fū la a‘sokoa ‘amn‘ȧk ‘on ‘Ạitu ‘e hevạni ma ‘e rȧnte‘. Rogrog ne mou se Pure‘ag ‘on ‘Ạitu a‘fạiag lelei pạu. Pure‘ag ‘on ‘Ạitu ‘el‘ia la a‘sokoa ‘amnȧk ‘on famori ‘e ‘oris pa ‘es ‘e ta matantu leleit. Iạ täla ‘op‘ạkia famör ‘atakoa ne noh ‘e rȧnte‘ la teag‘esea.—Hat Taniela 2:44; Mataio 6:9, 10; 24:14.
Pure‘ag ta kop la ma ‘on sạut. Jihova hil vạhia ‘on Le‘ ta, Jisu Karisto, la Sạu ne ‘On Pure‘ag ta.—Hat Kel‘ȧk Tē 11:15.
2. Hün se tese tä Jisu nonoj la puer fakSạu?
Le‘ ‘on ‘Ạitu nonoj la Sạu, ‘e reko iạ mäeav hanis ma iạ fumou se teet ne nonojo. (Jone 1:14) Tape‘ma, iạ ne‘ne‘ ma po la hạiasoagan famori, po ‘e ia täla purem ‘e hevạni se rȧnte‘. ‘E vạhiạg ne ‘on fu hoi‘ạkiạg ta, iạ leu sio se hevạni ma päe ma tȧrtȧr ‘e si‘ hap ‘atmại ‘on Jihova. (Hiperiu 10:12, 13) Vạhiạg ne te ‘og, ‘Ạitu na se ia ne‘ne‘i la kamatan ‘on pure.—Hat Taniela 7:13, 14.
3. Ka sei täla puer ag‘esea ma Jisu?
Kạuạg famorit ne he‘ “lelea‘ ma‘ma‘a” iris täla puer ag‘esea ma Jisu ‘e hevạni. (Taniela 7:27) Iris famör ma‘ma‘ ne hil mumuạ ta apostol huạg aier ‘on Jisu. Jihova hil ma kikia fa ma hạiạn ne huạg aire la famör ma‘ma‘ ka hele‘um se ‘on ‘i‘i. Fakse Jisu, iris fu hoi‘ȧk se‘, se for fak ‘ata.—Hat Jone 14:1-3; 1 Korinita 15:42-44.
Ka tapen ‘on ti‘ ne famör ne la la‘ se hevạni? Jisu he‘ iris la “hag sip mea‘mea‘ ” het. (Luke 12:32) Iris täla ‘atakoa‘ạkia nampa te‘is 144,000. Iris täla puer ag‘esea ma Jisu se rȧnte‘.—Hat Kel‘ȧk Tē 14:1.
4. Tes ta sok ‘e avat ne Jisu kamat la pure?
Pure‘ag ‘on ‘Ạitu kamatan ‘on pure ‘e 1914. * Garue fakSạu mumuet ne Jisu re, iạ kir‘ạkia Satan ta ma ‘on timonio se rȧnte‘. Satan ta hele‘ la fek ti‘ fakapau ma re te raksa‘a la sok ‘e rȧnte‘ ‘atakoa. (Kel‘ȧk Tē 12:7-10, 12) Kamat ‘e av heta‘ag, noh mamauạ ‘on famori ‘ut ma kikia la ti‘ fakapạu. Pelu, soge, masȧ‘ raksa‘a, ma ruerueag ne pear ta, te‘ ne ‘atakoa ‘i “faki‘oag” ne Pure‘ag ta ‘el‘ia la a‘sokoa ‘on pure se rȧnte‘ ‘atakoa.—Hat Luke 21:7, 10, 11, 31.
5. Tes ta Pure‘ag ‘on ‘Ạitu pola a‘sokoa?
‘E reko garue marag ta ne re ‘e rȧnte‘ ‘atakoa, Pure‘ag ‘on ‘Ạitu kamat vạhiạ la ‘op‘ạkim lelea‘ ma‘oi pạu ‘e te‘ ne hanuạ ‘atakoa. Famör miliön hisaghul ne huạg vạivại täe la ‘e fȧn puer ‘on Jisu. Pure‘ag ‘on ‘Ạitu täla pärea iris ka a‘raksa‘ạkia te‘ ne te raksa‘a ne av te‘is ‘e rȧnte‘. Ma te‘ ne lelea‘ ne pa ‘es la po ‘on ‘es‘av ne Pure‘ag ‘on ‘Ạitu, iris kop la rak la tovavhiạn se Jisu.—Hat Kel‘ȧk Tē 7:9, 14, 16, 17.
‘E laloag ne fạu 1,000 ta, Pure‘ag ta täla a‘sokoa te ne ‘Ạitu ‘amnȧk‘ȧk se ‘on famori ‘e ‘on kamataga. Rȧnte‘ ‘atakoa täla hele‘uena la parataisit. Ma ‘e vạhiạg ne te‘ ne te ‘atakoa ‘i, Jisu täla hö‘ạkia Purea‘g ta se ‘on Ö‘fa ta. (1Korinita 15:24-26) Teka ‘äe ‘inea ta le‘et ne ‘äe ‘oaf la fäeag‘ȧk se iạ Pure‘ag ‘on ‘Ạitu?—Hat Salamo 37:10, 11, 29.
