Yesaya 1:1-31
1 Ibi ni vyo Yesaya*+ mwene Amozi yeretswe ku vyerekeye Ubuyuda na Yeruzalemu mu gihe ca Uziya+, Yotamu+, Ahazi+ na Hezekiya+, abami b’Ubuyuda+:
2 Niwumve wa juru we, nawe si+ utege amatwi,kuko Yehova avuze ati:
«Narareze abana barakura+,mugabo barangararije+.
3 Impfizi irazi neza uwayiguze,n’indogobwa irazi ubwato nyeneyo ayigaburiramwo.Mugabo Abisirayeli ntibanzi*+,abantu banje bwite bigenza nk’abatagira ubwenge*.»
4 Riragowe ihanga ry’abacumuzi+,abantu baremerewe n’amakosa,uruvyaro rw’inkozi z’ikibi, abana bononekaye.
Barahevye Yehova+,bakengera wa Mweranda wa Isirayeli,bamutera ibitugu.
5 Ni hehe handi muzokubitwa ko muguma mugarariza+?
Umutwe wose urarwayen’umutima wose uri ku musego+.
6 Kuva mu kirenge gushika ku mutwe nta na hamwe hakomeye.
Hari ibikomere, ibirabagu vy’inkoni n’inguma nshasha.Nta wabivuye* canke ngo abitubike canke ngo abibombekeshe amavuta+.
7 Igihugu canyu ni umusaka.
Ibisagara vyanyu vyaturijwe umuriro.
Abanyamahanga barya igihugu canyu murorera+.
Gisigaye kimeze nk’agahinga kahonejwe n’abanyamahanga+.
8 Umukobwa wa Siyoni* asigaye ameze nk’akazu k’ubwugamo* mu murima w’imizabibu,nk’akaruri ko mu murima w’amakonkombure,nk’igisagara cugarijwe+.
9 Iyo Yehova Nyeningabo atadusigariza abarokotse na bakeyi,twari kuba nka Sodomu,tugasigara tumeze nka Gomora+.
10 Nimwumve ijambo rya Yehova, mwebwe ab’i Sodomu+ mutwaza igikenye*.
Nimutege amatwi amategeko* y’Imana yacu, mwa bantu b’i Gomora+.
11 «Ibimazi vyanyu vyinshi bimariye iki+?», ni ko Yehova avuze.
«Amashikanwa yanyu aturirwa y’impfizi z’intama+ n’ibinure vy’ibitungwa vyagaburiwe neza+ nabihaze.Kandi simpimbarwa n’amaraso+ y’amashuri+, ay’imyagazi y’intama n’ay’impene+.
12 Igihe murenguka imbere yanje+,ni nde aba yabasavyekuza guhonyanga mu bigo vyanje+?
13 Nimureke kuzana ayandi mashikanwa y’intete ata co amaze.
Imibavu yanyu iranshisha+.
Murubahiriza imboneko z’ukwezi+, amasabato+, mugatunganya n’amakoraniro+.Sinshobora kwihanganira amakoraniro yanyu adasanzwe kandi mukoresha amageza+.
14 Ndanka imboneko z’ukwezi muhimbaza n’imisi mikuru yanyu.
Vyambereye umuzigo.Nduhijwe no kuvyihanganira.
15 Iyo mudugije amaboko musenga,ndabahisha amaso yanje+.
Naho mutura amasengesho menshi+,sindabumviriza+.Amaboko yanyu yuzuyeko amaraso+.
16 Nimwiyoze, mwihumanure+.Nimunkure mu maso ibintu bibi mukora,mureke gukora ikibi+.
17 Nimwige gukora iciza, murondere ubutungane+.Nimukosore uwucinyiza abandi,murwanire agateka k’impfuvyi*,muburanire n’umupfakazi+.»
18 «Nimuze rero dutunganye ibibazo biri hagati yacu», ni ko Yehova avuze+.
«Naho ibicumuro vyanyu vyoba bisa n’agahama,bizosigara vyera derere*+.Naho vyoba bitukura nk’impuzu y’ibara ry’umutukutuku,bizosigara bisa n’ubwoya bwera.
19 Nimwagira umutima ukunze mukanyumviriza,muzorya ivyiza vyo muri iki gihugu+.
20 Mugabo nimwanka mukagarariza,inkota izobarya ibamare+kuko akanwa ka Yehova ari ko kabivuze.»
21 Mbega ukuntu igisagara cahora cizigirwa+ cahindutse maraya+!
Cahora cuzuyemwo ubutungane+,ubugororotsi ari yo bwibera+,ariko ubu cuzuyemwo abicanyi+.
22 Ifeza yawe isigaye ari umucafu+.Inzoga* yawe yasutswemwo amazi irajoboroka.
23 Abatware bawe ni intagondwa kandi bakorana n’ibisuma+.
Umwe wese muri bo akunda igiturire, akiruka inyuma abamuha ibintu+.
Ntibatunganiriza impfuvyi*canke ngo bemere kwakira urubanza rw’umupfakazi+.
24 Ni co gituma Umukama w’ukuri, Yehova Nyeningabo,wa Munyabubasha wa Isirayeli, avuze ati:
«Emwe, ngomba nikureko abandwanya,nihore abansi banje+.
25 Nzoguhana*.Nzoshongesha ibicafu* biri kuri wewe nk’aho noba nkoresheje umuti bamesuza*,nkureho imyanda yawe yose+.
26 Nzosubizaho abacamanza bimere nk’uko vyahora mu ntango,nkugarukanire n’abajanama nk’uko vyahora ubwa mbere+.
Uzoheza witwe igisagara c’ubugororotsi, igisagara cizigirwa+.
27 I Siyoni hazocungurwa+ biciye ku butungane,abagarutse bo mu bantu biwe bacungurwe biciye ku bugororotsi.
28 Abagarariji n’abacumuzi bazosenyukira rimwe+,abaheba Yehova bayogere+.
29 Abantu bazomaramazwa n’ibiti bikomeye mwipfuje+,muteterwe kubera imirima* mwahisemwo+.
30 Muzocika nk’igiti kinini c’amababi akabiranye+,mumere nk’umurima utagira amazi.
31 Umunyenkomezi azocika ubugwegwe*,ivyo akora bibe agasase k’umuriro.Vyompi bizorurumbira hamwe,ata n’umwe wo kubizimya.»
Utujambo tw'epfo
^ Iryo zina risobanura ngo «ubukiriro bwa Yehova.»
^ Canke «ntibazi shebuja.»
^ Canke «ugutegera.»
^ Mu giheburayo havuga ngo «nta wabifyondafyonze.»
^ Canke «nk’urusago.»
^ «Umukobwa wa Siyoni» ni amajambo ndyoshamvugo kenshi asigura igisagara ca Yeruzalemu canke abakibamwo.
^ Canke «mwebwe bategetsi b’i Sodomu.»
^ Canke «inyigisho.»
^ Canke «umwana atagira se.»
^ Canke «vyera nka shelegi.» Shelegi ni utuvunjivunji twera cane dukoragurika nk’imvura. Mu gifaransa batwita neige.
^ Canke «inzoga y’ingano.»
^ Canke «abana batagira ba se.»
^ Ni ubucafu busigara bahejeje gucisha ubutare mu muriro.
^ Canke «isabuni.»
^ Mu giheburayo havuga ngo «nzohindukiriza ukuboko kwanje kuri wewe.»
^ Biboneka ko vyari ibiti n’imirima bakoresha mu gusenga ibigirwamana.
^ Ni utunyuzi tunyaruka gufata umuriro.
