Misangani 13:1-25
13 Mwana waudziwisi asatawira kulangwa na pai wace,+Mbwenye nyakusingirira nee asabvesera angasandikwa.*+
2 Munthu anagumana udidi thangwi ya mafala adidi analonga iye,+Mbwenye ale anasandukira andzawo asafuna kakamwe kucita uphanga.
3 Munthu anacita mphole-mphole na mulomo wace* asatsidzikiza umaso wace.+Mbwenye ule anakhonda kufunga mulomo wace anadzafudzwa.+
4 Munthu wakupolola asafuna pinthu pizinji, ngakhale tenepo nkhabe ciri na iye,+Mbwenye munthu waphinga anadzakhala na pinthu pizinji.*+
5 Munthu wakulungama asaida uthambi,+Mbwenye pinthu pinacita nyakuipa pisampasa manyadzo, pontho pisampwazisa.
6 Ulungami usatsidzikiza munthu anafamba munjira yakulungama,+Mbwenye uipi usafudza nyakudawa.
7 Anthu anango asasangizira kukhala akupfuma, mbwenye iwo nkhabe pinthu;+Anango asasangizira kukhala akutcerenga, mbwenye ali na mpfuma zizinji.
8 Umaso wa munthu usaombolwa na mpfuma zace,+Mbwenye atcerengi nkhabe kuthuswa.+
9 Ceza ca anthu akulungama cisayetimira kakamwe,+Mbwenye nyale ya anyakuipa inadzathimiswa.+
10 Kudzikuza kusacitisa anthu kunentsana,+Mbwenye udziwisi uli na ale anasaka uphungu.*+
11 Mpfuma inawinwa mwakucimbiza inapunguka,+Mbwenye mpfuma ya ule anaigumanya mwapangʼono-pangʼono inathimizirika.
12 Cinthu cinadikhira munthu cingakhonda kucitika pa ndzidzi unacidikhira iye, ntima usapha;+Mbwenye pinthu pinafuna munthu pingacitika, pisakhala ninga muti wakupasa umaso.+
13 Ule anapwaza cipfundziso anadzatcunyuswa,+Mbwenye ule analemedza matongero anadzapaswa nkhombo.+
14 Cipfundziso ca* munthu waudziwisi cisapasa umaso,+Cisaphedza munthu toera acalire misampha ya kufa.
15 Munthu waluso yakubvesesa mwadidi, anthu asakomerwa naye,Mbwenye njira ya anyakusandukira ndi yakunentsa.
16 Munthu waudziwisi asacita pinthu mwandzeru,+Mbwenye dzemwa asapangiza pakweca udzemwa wace.+
17 Nyakubweresa mphangwa wakuipa asagwa mu nyatwa,+Mbwenye nyakutumwa wakukhulupirika asabweresa cibalangazo.+
18 Munthu anakhonda kulangwa asagwa mu utcerengi mbapwaziwa,Mbwenye ule anatawira kusandikwa anadzapaswa mbiri.+
19 Pinafuna munthu pingacitika, iye asakomerwa kakamwe,+Mbwenye munthu wakuipa asaida kucalira pinthu pyakuipa.+
20 Ule anafamba na anthu audziwisi, anadzakhalambo waudziwisi,+Mbwenye ule anafamba na madzemwa, anadzaona nyatwa.+
21 Nyatwa zisatowerera anyakudawa,+Mbwenye anthu akulungama asatambira pinthu pyadidi.+
22 Munthu wadidi asasiyira unthaka adzukulu ace,Mbwenye mpfuma za nyakudawa ziri kukoyerwa munthu wakulungama.+
23 Mʼmunda mwa nyakutcerenga musabuluka pyakudya pizinji,Mbwenye ipyo pinakwanisa kubvungwa thangwi ya macitiro akukhonda kulungama.
24 Munthu anakhonda kukwapula* mwanace, iye asamuida,+Mbwenye ule anafuna mwanace, nee asasiya kumulanga.*+
25 Munthu wakulungama asadya mbakhuta,+Mbwenye mimba za anyakuipa zisakhala na njala.+
Pidzindikiro Pyapantsi
^ Peno: “angalangwa.”
^ Peno: “Munthu anaonera mulomo wace.”
^ Fala na Fala: “munthu waphinga anadzakhuma.”
^ Peno: “uli na ale anabvundzisana.”
^ Peno: “Mwambo wa.”
^ Peno: “kulanga; kutcunyusa.”
^ Munjira inango: “asamulanga mwakukhonda dembuka.”
