Izaki akhali na pyaka 40 mudamanga iye banja na Rebheka. Izaki akhafuna kakamwe Rebheka. Mukupita kwa ndzidzi iwo adzakhala na ana amuna awiri amamphasa.

Adatoma balwa akhacemerwa Ezau, wang’ono akhacemerwa Yakobe. Ezau nee akhafuna khala panyumba, pontho iye akhali na luso yakusodza. Mbwenye Yakobe akhafuna khala panyumba.

Mu ntsiku zenezi, mwana wakutoma akhapaswa mbuto ikulu na kobiri izinji babace angafa. Pyenepi pikhacemerwa unthaka. M’banja ya Izaki, unthaka ukhaphataniza kucita khundu mu kukwaniriswa kwa mapikiro adacita Yahova kuna Abhrahamu. Ezau nee akhapasa ntengo mapikiro anewa, mbwenye Yakobe akhadziwa kuti mapikiro anewa akhali akufunika kakamwe.

Ntsiku inango, Ezau aenda kasodza mbabwerera panyumba wakuneta kakamwe. Iye abva kununkhira kwa cakudya cikaphika Yakobe, mbalonga: ‘Ndina njala! Ndipase pinthu pire pyakufwirira ndidye!’ Yakobe alonga: ‘Ndinakupasa, mbwenye pakutoma pikira kuti anadzatambira unthaka wako ndine.’ Ezau alonga: ‘Ndinapyonji ine na pya unthaka! Unakwata pyako. Ndisafuna kudya basi!’ Kodi musanyerezera kuti pidacita Ezau  pikhali pyandzeru? Nkhabe. Ezau apereka cinthu ca ntengo ukulu kakamwe basi ene toera kupaswa cakudya.

Pidakhala Izaki nkhalamba ukhali ndzidzi toera kupasa nkhombo mwanace wakutoma. Mbwenye Rebheka aphedza Yakobe, wakuti akhali mwana wawo wang’ono toera apaswe nkhombo. Mudadzindikira Ezau pyenepi, aipirwa kakamwe mbacita masasanyiro toera kupha m’bale wace. Izaki na Rebheka akhafuna kutsidzikiza Yakobe. Iwo ampanga: ‘Lamuka, mbuenda kakhala na m’bale wa mai wako, Labhani, mpaka m’bale wako Ezau akhurudzike.’ Yakobe abvera anyakubalace mbaenda toera kupulumusa umaso wace.