KUNA ANYAKUMANGA BANJA
3: Kulemedzana
PYENEPI PISABVEKANJI
Mamuna na nkazi akuti asalemedzana unango na ndzace, asatsalakanana mwadidi maseze akhale na maonero akusiyana mu pinthu pinango. Bukhu yakuti Pinthu Khumi Pyakuti Pinaphedza Banja Yanu (Ten Lessons to Transform Your Marriage) yalonga: “Banja yakuti mamuna na nkazi asalemedzana nkhabe anakakamira maonero ace, mbwenye iwo asacedza toera amalise mikandzo inaacitisa kukhonda kubverana. M’bodzi angalonga maonero ace, ndzace asambvesera mwacilemedzo mbagumana njira yadidi toera kumalisa nkandzo unoyu.”
PINALONGA BHIBHLYA: “Ufuni . . . nkhabe kucita pinafuna iwo basi.”—1 Akorinto 13:4, 5.
“Ine ndisaona kuti kulemedza nkazanga kusabveka kumuona ninga munthu wakufunika. Pontho ndisacalira kucita cinthu cakuti cinantsukwalisa peno cinacitisa banja yathu kukhonda kufamba mwadidi.”—Micah.
THANGWI YANJI CILEMEDZO M’BANJA NDI CAKUFUNIKA
Nkazi na mamuna angakhonda kulemedzana, iwo asapasana mulando, asapwazana peno kulongerana mafala akudzidzida. Anyakufufudza alonga kuti pyenepi ndi pidzindikiro pinapangiza kuti iwo anamalisira na kukhondana.
“Kulonga mwakupwaza, mafala akudzidzida, peno kuserusa nkazanu kunacitisa kuti akhonde kukunyindirani, peno kukukhulupirani. Pyenepi pinacitisa kuti banja yanu ikhonde kufamba mwadidi.”—Brian.
PINAFUNIKA IMWE KUCITA
BVUNDZIKANI
Nkati mwa sumana ibodzi, nyerezerani pinalonga imwe na pinacita imwe. Buluka penepo bvundzikani:
-
‘Kodi sumana ino ndasimba kangasi mamunanga peno nkazanga, pontho ndansumula kangasi mwakusowa cilemedzo?’
-
‘Ninji pidacita ine toera kupangiza kuti ndisalemedza mamunanga peno nkazanga?’
CEDZANI THANGWI YA MIBVUNDZO INATOWERA NA NDZANU WA M’BANJA
-
Musafuna kuti ndzanu alongenji peno acitenji toera mudzindikire kuti musalemedzwa?
-
Kodi imwe musaona kuti mamunanu peno nkazanu nee akulemedzani angacita pinthu pipi peno angalonga mafala api?
PINTHU PINAFUNA KUKUPHEDZANI
-
Lembani pinthu pitatu pinafuna imwe kuti ndzanu wa m’banja akucitireni toera mupibve kuti musalemedzwa. Mpangeni toera alembembo pinthu pinafuna iye kuti imwe muncitire. Mungamala, pasani ndzanu wa m’banja pidalemba imwe, pontho iye akupasenimbo pidalemba iye, buluka penepo wangisirani toera kucita pidalemba ndzanu wa m’banja iyembo awangisire kucita pidalemba imwe.
-
Lembani makhaliro a ndzanu wa m’banja akuti musakomerwa nawo kakamwe. Buluka penepo mpangeni kuti musapibva tani mungamuona mbakapangiza makhaliro anewa.
“Pinacitira ine mamunanga ndipyo pinapangiza kuti ndisamulemedza, pontho ndisafuna kuti akhale wakutsandzaya. Pyenepi nee pisabveka kuti ndzidzi onsene ndisafunika kuncitira pinthu pikulu. Ngakhale pinthu ping’ono pinacita ine peno pinalonga ine pinakwanisa kupangiza kuti mwandimomwene ndisamulemedza.” —Megan.
Mwacigwagwa tinakwanisa kulonga kuti simwe tayu anafunika kupanga ndzanu wa m’banja kuti musamulemedza, mbwenye iye asafunika kupibva ekhene kuti musamulemedza.
PINALONGA BHIBHLYA: “Khalani akubvera ntsisi kakamwe, akukoma ntima, akucepeseka, akupfulika na akupirira.”—Akolose 3:12.
