Kukhulupira nyenyezi ndi ntundu ubodzi wa kulotera. Anyakukhulupira nyenyezi asalonga kuti mwezi, nyenyezi na maplaneta pisakhuya umaso wa anthu pa dziko yapantsi. Iwo asalonga kuti munjira inakhala pinthu pyenepi kudzulu mu ndzidzi unabalwa munthu pisaaphedza toera kudziwa tsogolo na makhaliro a munthu unoyu.

Maseze kukhulupira nyenyezi kukhacitwa kakamwe ku Bhabhilonya, lero kusabvekerambo kakamwe. Mwakubverana na kufufudzwa kudacitwa ku Estados Unidos mu caka 2012, munthu m’bodzi mwa atatu adabvundziswa alonga kuti kukhulupira nyenyezi nee kusacita “maka khundu ya siyensiya,” pontho munthu m’bodzi mwa anthu khumi adabvundziswa alonga kuti kukhulupira nyenyezi kusacita “khundu ya siyensiya.” Kodi kukhulupira nyenyezi kusacitadi khundu ya siyensiya? Nkhabe. Onani mathangwi ace.

• Maplaneta na nyenyezi nee piri na mphambvu yakukhuya umaso wa anthu ninga pinalonga anyakukhulupira nyenyezi.

• Kazinji kene pinthu pinalonga iwo pinakwanisa kucitikira anthu onsene.

• Lero anyakukhulupira nyenyezi asalengesa ntsiku zawo mwakubverana na manyerezero a kale akuti maplaneta asazungulira dziko. Mbwenye undimomwene ndi wakuti maplaneta asazungulira dzuwa.

• Anyakukhulupira nyenyezi akusiyana-siyana anakwanisa kulonga pinthu pyakusiyana kuna munthu m’bodzi ene.

• Anyakukhulupira nyenyezi asagawa anthu m’misoka 12 na pidzindikiro pya kudzulu mwakubverana na ntsiku idabalwa munthu. Mbwenye mukupita kwa ndzidzi kuzungulira kwa dziko kusacinja. Natenepa ntsiku idabalwa munthu nee isabveranabve na nsoka wa nyenyezi zidaoneka pa ntsiku ineyi.

Anyakukhulupira nyenyezi asalonga kuti pidzindikiro pya kudzulu pisaaphedza toera kudziwa makhaliro a munthu. Mbwenye undimomwene ndi wakuti anthu adabalwa ntsiku ibodzi ene nee asakhala na makhaliro mabodzi ene. Natenepa, ntsiku idabalwa munthu nee isancitisa toera kukhala na makhaliro akupambulika. M’mbuto mwakuona makhaliro andimomwene a munthu, anyakukhulupira nyenyezi asatonga makhaliro a munthu mwakubverana na ntsiku idabalwa iye. Kodi kucita pyenepi nee ndi tsankhulo?

Kutomera kale anthu asaenda kuna anyakulotera toera kuaphedza kudziwa pya tsogolo yawo. Anyakulotera anewa asalonga kuti asakwanisa kudziwa pyenepi angaona macitiro a pinyama na a anthu. Anango asaphatisira mizera ya m’manja, kulira kwa mbalame na ndoto toera kulotera. Lero iwo asaphatisira matsamba a kulotera nawo, mavidhru, miyala na pinthu pinango toera adziwe pya ntsogolo. Kodi anthu anayesera kudziwa pya ntsogolo anakwanisadi kutiphedza toera kudziwa pya tsogolo yathu? Nkhabe. Tendeni tione mathangwi ace.

Pinthu pinalonga iwo nee ndi pibodzi pyene. Anyakulotera asaphatisira njira zakusiyana-siyana, mbwenye kazinji kene pinagumana iwo ndi pyakusiyana. Ngakhale angaphatisira njira zibodzi zene, pinagumana iwo ndi pyakusiyana. Mwacitsandzo munthu angacita mbvundzo ubodzi ene kuna anyakulotera awiri, iwo mbaphatisira matsamba mabodzi ene akulotera nawo ntawiro ukhafunika kukhala ubodzi ene, mbwenye kazinji kene ndi wakusiyana.

Anthu asapenula njira na pifuno pya anyakulotera. Anthu anango asalonga kuti matsamba akulotera nawo peno mavidhru ndi pinthu toera kubalikisa napyo. Anyakulotera anewa asaona pinthu pinacita munthu na njira inalonga iye, tayu pinthu pinaphatisira iwo. Nyakulotera waluso asacita mibvundzo kuna munthu mbabvesera mwadidi mitawiro, pontho asayang’ana mwadidi mu ndzidzi unatawira iye toera kudziwa pizinji. Buluka penepo nyakulotera asapanga munthu unoyu pinthu pyonsene pidancitikira. Munthu asaduwala kuti ndiye adampanga, pontho asanyerezera kuti nyakulotera unoyu ndi waluso kakamwe. Anthu asatoma kukhulupira nyakulotera unoyu, iye mbawina kobiri izinji kakamwe.

Kukhulupira nyenyezi na kulotera pisacitisa anthu kukhulupira kuti pinthu pinaacitikira mu umaso wawo pikhadalembwa kale. Kodi unoyu ndi undimomwene? Bhibhlya isalonga kuti munthu anakwanisa kusankhula pinthu pinafuna iye kukhulupira na pinafuna iye kucita. Pontho pisankhulo pyace pisakhuya tsogolo yace.​—Yoswa 24:15.

Atumiki a Mulungu ali na thangwi inango yakukhonda kukhulupira nyenyezi na kulotera. Mulungu asaida anthu anacita pinthu pyenepi. Bhibhlya isalonga: ‘Pakati panu mbapaleke kuoneka munthu anacita pyakulotera, pyaung’anga, munthu anasaka pidzindikiro, mpfiti, munthu analodza ndzace, munthu anaenda kwa ng’anga toera kudziwa pinthu, nyakulotera, peno munthu anasaka kulonga na anyakufa. Thangwi munthu anacita pinthu pyenepi ndi wakunyanyasa kuna Yahova.’ a​—Dheuteronomyo 18:10-12.