Mpaka pano, tapfundza pinthu pizinji pyakuti pinatiphedza kutawira mbvundzo uyu: Mulungu mbani? Pakutoma, taona kuti Bhibhlya isalonga kuti dzina ya Mulungu ndi Yahova, pontho ufuni ndi n’khaliro wace wakufunika kakamwe. Tapfundzambo pinthu pizinji pyadidi pidacita iye kale na pinafuna kucita iye toera kutiphindulisa. Ngakhale tenepo pana pizinji toera kupfundza thangwi ya Mulungu. Panango munabvundzika: Kodi kudziwa Mulungu kunandiphedza tani?

Yahova apikira kuti ‘mungansaka munadzan’gumana.’ (1 Pya dziko ya Israele 28:9) Pyenepi pisapangiza kuti mungasaka Mulungu mbamundziwa munakhala na muoni wakufunika kakamwe, kukhala ‘xamwali wapantima wa Yahova!’ (Masalmo 25:14) Kukhala xamwali wa Mulungu kunakuphedzani tani?

Kutsandzaya kwandimomwene. Bhibhlya isalonga kuti Yahova ndi “Mulungu wakutsandzaya.” (1 Timoti 1:11) Kukhala xamwali wapantima wa Mulungu kunakucitisani kukhala wakutsandzaya, pyenepi pinakuphedzani kukhala na manyerezero adidi na ungumi wadidi. (Masalmo 33:12) Munakwanisa kukhala wakutsandzaya mungacalira makhaliro akuipa, mungakulisa misambo yadidi, pontho mungabverana na anango. Mungacita pyenepi, munatawira pidalonga nyamasalmo kuti: ‘Kufendedzera Mulungu ndi kwadidi kwa ine.’—Masalmo 73:28.

Citsalakano ca Mulungu. Yahova apikira atumiki ace: “Ndinakupfundzisa mbandikuonera.” (Masalmo 32:8) Pyenepi pisabveka kuti Yahova asatsalakana m’bodzi na m’bodzi wa atumiki ace, pontho asaapasa pinafuna iwo. (Masalmo 139:1, 2) Mungakulisa uxamwali na Yahova, munadzaona kuti ndzidzi onsene iye anakuphedzani.

Tsogolo yadidi kakamwe. Kusiyapo kukudziwisani kuti munacitanji toera kukhala na umaso wakutsandzaya cincino, Yahova Mulungu asakuphedzani toera mukhale na tsogolo yadidi kakamwe. (Izaiya 48:17, 18) Bhibhlya isalonga: “Umaso wakukhonda mala ndi uyu: Anthu akudziweni imwe Mulungu m’bodzi basi wandimomwene, pontho adziwembo Yezu Kristu, ule adatuma imwe.” (Juwau 17:3) Mu ntsiku zino zakunentsa, cidikhiro cakukhala na umaso wakukhonda mala ndi ninga nangula yakuti isaticitisa kukhala ‘akuwanga.’—Ahebheri 6:19.

Anewa ndi mathangwi mangasi akufunika anaticitisa kufuna kudziwa mwadidi Mulungu na kukulisa uxamwali na iye. Mungafuna kudziwa pizinji longani na m’bodzi wa Mboni za Yahova peno pitani mu saiti jw.org.