Tongana zo anyon sämba alingbi na ni, a yeke sioni ape. Bible asara tënë ti vin tongana mbeni cadeau so alondo na Nzapa, so alingbi ti sara si gigi ti zo akiri anzere mingi (Psaume 104:14, 15; Zo-ti-fa-tene 3:13; 9:7). Bible afa nga so vin ayeke sara nzoni na seni ti zo.​—1 Timothée 5:23.

 Jésus anyon lani sämba na ngoi so lo yeke na sese (Matthieu 26:29; Luc 7:34). Mbeni oko ti amiracle ti lo so azo ahinga ni mingi ayeke so lo sara lani si ngu aga vin, na lo mû ni tongana cadeau na ngoi ti mbeni matanga ti mariage.​—Jean 2:1-10.

Akpale so zo ayeke wara tongana lo nyon sämba ahon ndö ni

 Bible afa aye ti nzoni so vin ayeke sara na zo, me lo fa so ayeke na lege ni ape ti nyon vin ahon ndö ni nga ti soulé. Me, tongana mbeni Chrétien aye ti nyon sämba, a lingbi lo nyon ni alingbi na ni (1 Timothée 3:8; Tite 2:2, 3). Bible afa gbâ ti araison so ndali ni a lingbi e kpe ti nyon sämba ahon ndö ni.

•   A yeke sara si zo agbu li ti lo nzoni ape nga lo hinga encore ti sara kangbi na popo ti ye ti nzoni na ye ti sioni ape (aProverbe 23:29-35). Mbeni zo so ayeke nyon sämba ahon ndö ni alingbi pëpe ti sara ye alingbi na commandement ti Bible so ahunda ti ‘mû terê ti e tongana sandaga so ayeke na fini, so ayeke nzoni-kue, so anzere na Nzapa, so ti tene mbeni kua so e sara na Nzapa, so e sara ni na hingango ndo ti e.’​—aRomain 12:1.

•   Ti nyon sämba ahon ndö ni ayeke sara si zo asara encore mbeto wala kamene ti ye oko ape nga lo yeke na “nzara ti sara ye na lege ni encore ape.”​—Osée 4:11; aÉphésien 5:18.

•   A yeke gue na zo ti tï na yâ ti yere nga ti wara akota kpale ti seni.​—aProverbe 23:21, 31, 32.

•   A nzere na Nzapa ape tongana e nyon sämba ahon ndö ni nga e soulé.​—aProverbe 23:20; aGalate 5:19-21.

Na ngoi wa la a lingbi ti tene so mbeni zo anyon sämba ahon ndö ni?

 Tongana a tene mbeni zo anyon sämba ahon ndö ni, a ye ti tene so nyongo sämba so lo nyon ni so alingbi ti zia lo wala amba ti lo na yâ ti kpale. Ti gue oko na tënë so Bible atene, a yeke hinga so mbeni zo anyon sämba ahon ndö ni, gï pëpe na ngoi so lo nyon lo évanouir si, me na ngoi so li ti lo aga kirikiri, lo tambela kirikiri, lo komanse ti sara ye ti ngangu wala lo sara tënë kirikiri (Job 12:25; Psaume 107:27; aProverbe 23:29, 30, 33). Même azo so akpe ti nyon sämba juska ti soulé apeut ti ga azo ti “nyongo sämba ahon ndö ni” nga ti wara asioni ye ti pekoni.​—Luc 21:34, 35.

Ti mû desizion ti nyon sämba ape

 Bible afa nga na yâ ti aye wa la aChrétien alingbi ti mû desizion ti nyon sämba ape:

•   Tongana ye ni so alingbi ti sara si amba ti ala asara faute.​—aRomain 14:21.

•   Tongana nyongo sämba ayeke mbeni ye so ndia ti kodro ti ala ake ni.​—aRomain 13:1.

•   Tongana a ga ngangu na ala ti gbanzi terê ti ala ti nyon sämba ni mingi. Ti azo so ayeke azo so anyon sämba ahon ndö ni wala ayeke bâ pasi na ambeni kobela ndali ti so ala yeke nyon sämba ahon ndö ni, a lingbi ala gi ti mû mbeni desizion na ndö ni.​—Matthieu 5:29, 30.