Azo so asara mariage apeut ti duti na ngia ape tongana ala yeke na confiance na mba ape. Tongaso, tongana nyen la ala peut ti kpe ti sara mbanda sân mbeni raison?

Na yâ ti article so e yeke bâ:

•  Mbanda ayeke nyen?

•  Nyen la asara si azo ayeke sara mbanda?

•  Tongana nyen la mo peut ti kpe sarango mbanda?

•  Tongana koli wala wali ti mo ayeke sara mbanda

•  Aquestion so acouple apeut ti gbu li na ndö ni

 Mbanda ayeke nyen?

 Tënë “mbanda” apeut ti ndu aye mingi. Na yâ ti article so, tënë ni aye ti sara tënë ti sentiment so e yeke na ni tongana e bâ so mbeni zo ayeke sara nzara ti koli wala wali ti e wala tongana e bâ so koli wala wali ti e ayeke sara nzara ti mbeni zo nde. E peut ti pensé so mariage ti e ayeke gue ti buba la. Tongana ayeke tongaso, gingo bê ni ayeke na lege ni. Girisa ape so, mariage ayeke mbeni kpengba songo so ayeke na popo ti azo use, nga mbeni couple adoit ti sara kue ti bata songo ni so.

 Mama-ndia ti Bible: “Ala yeke use mbeni pëpe, me terê oko. . . . Ye so Nzapa abungbi na gbe ti joug oko, zia zo akangbi yâ ni pëpe.”—Matthieu 19:6.

 “Tongana mbeni kpale ayeke na yâ ti mariage ti mo, a yeke mo bâ mo tene mbeni ye ayeke dekongo na mo atene wâ ayeke ge ti mû lege na mo ti hinga so mbeni kpale ayeke dä na apusu mo ti sara ye.”—Benjamin.

 Me, mbanda so ndani ayeke dä ape ayeke pusu mbeni zo ti gi bê senge senge wala ti sara mbeto sân raison. Tongana e ye vraiment koli wala wali ti e, e yeke kpe ti sara mara ti mbanda tongaso (1 aCorinthien 13:4, 7). Mbeni docteur so iri ti lo ayeke Robert Leahy atene: “Tongana mo yeke sara [mbanda sân raison], songo ti mariage ti mo so mo ye ti bata ni apeut ti buba.” a

 Nyen la asara si azo ayeke sara mbanda?

 Mbeni raison so apeut ti sara si mo yeke sara mbanda ayeke so zo so lani mo na lo asara mariage ayeke be-ta-zo na mo ape. Wala peut-être babâ na mama ti mo akangbi lani terê ndali ti so ala yeke be-ta-zo na mba ape na mo yeke sara mbeto ti tene mara ti ye ni so asi na mo.

 “Na temps so mbi ngbâ lani maseka, babâ ti mbi ayeke be-ta-zo na mama ti mbi ape, tongaso ayeke ngangu na mbi ti sara confiance na azo. Ye so asara mbi nzoni ape, a sara si parfois ayeke ngangu na mbi ti sara confiancce na koli ti mbi.”—Melissa.

 Mbeni raison ni nde: Tongana mo yeke gi ka bê ti mo na ndö ti koli wala wali ti mo, a peut ti duti facile ti tene mo pensé so mbeni zo ayeke gi ti buba yâ ti mariage ti mo. Mo peut même ti pensé so, tongana koli wala wali ti mo awara occasion ni, lo yeke dö mo ti zia.

 “Kamarade ti koli ti mbi atene na lo ti sara mbeni kua so ayeke spécial na temps ti mariage ti lo. Ye so aye ti tene so koli ti mbi na mbeni wali ayeke dodo. Anzere lani na mbi ape. A sara si koli ti mbi ake ti sara ni.”—Naomi.

 Afason ti sarango mariage na yâ ti akodro ayeke nde nde, na a lingbi aChrétien azia si amama-ndia ti Bible afa lege na ala. Eskê bango ndo ti Naomi ayeke na lege ni? Na ngoi so lo gbu li na ndö ti tënë ni so, lo bâ so lo yeke na raison ape ti sara mbanda. Lo tene: “Na temps ni so, mbi gi bê ti mbi lani mingi. Mbi pensé so koli ti mbi ayeke haka mbi na ambeni wali nde, me a yeke lani vrai ape.”

 Atâa raison ni ayeke so wa, mbanda apeut ti sara si mo yeke gi bê ti mo mingi wala mo yeke accusé koli wala wali ti mo so lo yeke be-ta-zo ape. Ye ti peko ni ayeke so, ye ni apeut ti buba songo ti mariage ti mo nga même apeut ti ga na kpale na seni ti mo.

 Amama-ndia ti Bible: “Sarango mbanda ayeke tongana mbeni sioni kobela so ayeke te zo na yâ ti bio.”—aProverbe 14:30, Mbeti ti Nzapa, Tënë so amu fini.

 Tongana nyen la mo peut ti kpe sarango mbanda?

 Gi ti duti na confiance. Ahon ti bâ aye so afa so koli wala wali ti mo ayeke be-ta-zo na mo ape, gbu li na ndö ti aye so afa so mo peut ti sara confiance na lo.

 “Mbi gbu li na ndö ti anzoni sarango ye ti koli ti mbi. Tongana lo yeke nduru na mbeni zo mingi, a yeke ndali ti so na nzoni bê lo yeke pensé na zo, me pëpe ndali ti so lo sara nzara ti zo ni. So mariage ti aparent ti mbi amarché ape, aye ti tene ape so ti mbi nga kue ayeke marché ape.”—Melissa.

 Duti na kite na ndö ti koli wala wali ti mo ape. Docteur Leahy, so e sara tënë ti lo fade, atene: “Parfois e tene so tongana e pensé na mbeni ye, ye ni adoit ti duti vrai. Gï ndali ti so e yeke sûr na mbeni tënë la ayeke preuve so afa so ye ni ayeke vrai. Me ti duti sûr na mbeni tënë aye ti tënë ape so tënë ni ayeke vrai, nga apensé ti e la ayeke preuve ni ape.” b

 “Tongana e bâ mbeni ye na e imaginé ye so ayeke na lege ni ape na ndö ni, a peut ti ga na akpale na yâ ti mariage ti e.”—Nadine.

 Fa agingo bê ti mo. Atâa ye so apusu mo ti sara mbanda ayeke so wa, sara lisoro na ndö ni na koli wala wali ti mo, tongaso si ala use kue azia limite na yâ ti asarango ye ti ala.

 “Tongana mo na koli wala wali ti mo ayeke sara mara ti lisoro tongaso, fa na lo so mo hinga so lo ye ti son bê ti mo ape nga so lo yeke sara ye na lege ni. Yeda so koli wala wali ti mo ayeke na nzoni bibe. Peut-être mo la mo yeke gi bê ti mo mingi wala aye so mo yeke ku ti tene koli wala wali ti mo asara ahon ndö ni. Wala peut-être mo bâ so koli wala wali ti mo apensé na mo mingi ape tongana ti so mo ye.”—Ciara.

 Mama-ndia ti Bible: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”—1 aCorinthien 10:24.