BIBLE asala tënë mingi pëpe ti créature ti yingo so iri ti lo ayeke Michel. Me na ando so asala tënë ti lo dä, a fa lo na salango mbeni kusala. Na yâ ti mbeti ti Daniel, a fa lo na tiringo ni na a-ange ti sioni; na yâ mbeti ti Jude, a fa lo na dengo gaba na Satan; na yâ mbeti ti Apocalypse, a fa lo na salango bira na Zabolo na ayingo sioni ti lo. Na tiringo ni tongaso na awato ti Nzapa nga teti komandema ti Jéhovah, Michel asala ye alingbi na nda ti iri ti lo so ayeke “Zo wa alingbi na Nzapa?” Ye so apusu e ti hunda tele ti e: Michel ni ayeke zo wa?

Ngoi na ngoi, ambeni zo ayeke ka na a-iri use wala ahon so. Na tapande,  a hinga nga Jacob na iri ti Israël. Nga, bazengele Pierre ayeke na mbeni iri nde so ayeke Simon (Genèse 49:1, 2; Matthieu 10:2). Michel nga ayeke tongaso; Bible afa so a yeke mbeni iri so Jésus Christ ayeke na ni kozoni si lo ga na sese nga na pekoni so lo kiri na yayu. Zia e bâ ambeni nda ti tënë na yâ ti Bible so apusu e ti tene tongaso.

Archange. Mbeti ti Nzapa ahiri Michel “archange”. (Jude 9). A ye ti tene “ange mokonzi”. Na yâ ti Bible, a sala tënë lâ oko pëpe ti “a-archange” me a tene gi “archange” awe. So aye ti fa so gi ange oko la ayeke archange ni. Na ndo ni, Bible afa Jésus tongana mbeni archange. Kozo mbeti ti aThessalonicien 4:16 asala tënë ti Seigneur Jésus Christ so a zingo lo na kuâ, na a tene tongaso na ndo ti lo: “Fade Seigneur mveni alondo na yayu azu na kongo, na yanga ti archange.” Na ndo so, a fa go ti Jésus tongana go ti mbeni archange. Versê ni aye ti fa so Jésus ni mveni la ayeke archange Michel.

Mokonzi ti aturugu. Bible atene so ‘Michel na a-ange ti lo atiri bira na kota ngbo na a-ange ti lo.’ (Apocalypse 12:7). Tongaso, Michel ayeke Mokonzi na ndo ti a-ange ti Nzapa so ayeke tongana aturugu. Mbeti ti Apocalypse afa nga Jésus tongana Mokonzi na ndo ti a-ange ti Nzapa mingi so ayeke tongana aturugu (Apocalypse 19:14-16). Nga, bazengele Paul asala tënë mbilimbili ti “Seigneur Jésus” na “a-ange ti ngangu ti Lo”. (2 aThessalonicien 1:7). E bâ na nda ni so Bible asala tënë ti Michel na “a-ange ti lo” nga ti Jésus na “a-ange ti Lo”. (Matthieu 13:41; 16:27; 24:31; 1 Pierre 3:22). Teti so na yâ Mbeti ti Nzapa, a tene lâ oko pëpe so yâ ti a-ange ti Nzapa na yayu akangbi use, ambeni na gbe ti komandema ti Michel na ambeni na gbe ti komandema ti Jésus, a yeke na lege ni ti tene so Michel ayeke tâ gi lo Jésus Christ tongana lo yeke na yayu. *