Teti mbeni ngoi, Jésus angbâ na sese ti Pérée, mbeni ndo so ayeke na mbage ti “Ngu ti Jourdain”. (Jean 10:40). Fadeso, lo yeke gue na Jérusalem na mbage ti sud.

Jésus ague lo oko ape. Na tere ti lo, a yeke wara adisciple ti lo nga na “gbâ ti azo” so na popo ni, a yeke wara azo ti rongo nginza ti impôt nga na awasiokpari (Luc 14:25; 15:1). A yeke wara nga ascribe na aFarizien so kua ti ala ayeke gi ti kasa aye kue so Jésus ayeke tënë na lo yeke sara. Ala yeke na gbâ ti aye so ala yeke gbu li dä na peko ti so Jésus afa na ala toli na ndo ti taba so agirisa, ti molenge so agirisa nga na ti zo ti mosoro na Lazare.—Luc 15:2; 16:14.

Âmanke, gi kasango ndo ti awato ni la asara si Jésus atourné na mbage ti adisciple ti lo ti sara tënë na ala na ndo ti ambeni ye so lo sara tënë ni kozo awe, tongana ala yeke lani na Galilée.

Na tapande, lo tene: “Nyen na nyen, aye ayeke sara si mabe ti zo atï. Me, mawa na zo so aye ni so aga na lege ti lo! . . . Ala sara hange. Tongana ita ti mo asara mbeni siokpari, suku na lo; na tongana lo changé bê ti lo, pardonné lo. Atâa tongana lâ oko oko lo sara siokpari na tere ti mo fani mbasambala, na lo kiri na mo fani mbasambala, lo tene: ‘Mbi hinga mbi sara faute,’ a lingbi mo pardonné lo.” (Luc 17:1-4). Tënë so adoit ti rappelé lani Pierre na hundango ndo so lo hunda lani ti gi ti hinga wala a lingbi a pardonné gi zo lege mbasambala awe.—Matthieu 18:21.

Eskê adisciple apeut ande ti sara ye alingbi na atënë ti Jésus so la? Na ngoi so ala tene na Jésus atene: “Sara si mabe ti e akiri akono,” Jésus adë bê ti ala atene: “Tongana mabe ti ala akono tongana ti lê ti keke ti moutarde, ka ala yeke tene na keke ti mûrier so: ‘Londo na gunda ti mo kue, mo gue mo lu tere ti mo na yâ ti ngu-ingo!’ na keke ni ayeke mä yanga ti ala.” (Luc 17:5, 6). Biani, même tongana zo ayeke gi na kete mabe, lo peut ti sara akota ye mingi na ni.

Na pekoni, Jésus afa nene ti dutingo na bibe ti sarango tere kete nga na ti dutingo na nzoni bango ndo na ndo ti zo lo wani. Lo tene na abazengele ni, lo tene: “Zo wa la na popo ti ala, tongana lo yeke na ngbâa so ayeke sara kua na yaka wala ayeke bata anyama, si ngbâa ni alondo na yaka akiri, lo yeke tene na lo: ‘Ga ge hio mo duti na tere ti table mo te kobe’? Ên-ën, me lo yeke tene ande na ngbâa ni: ‘Tö kobe na mbi si mbi te. Yü bongo ti kua na mo mû na mbi kobe. Tongana mbi hunzi ti te ye na ti nyon ye awe, mo lingbi ti te ye nga ti nyon ye.’ So ngbâa ni asara gi aye so a fa na lo ti sara so, eskê lo yeke gonda lo ndali ni? Ên-ën. Legeoko nga, tongana ala sara aye kue so a fa na ala ti sara, ala tene: ‘E yeke gi asenge ngbâa. Ye so e sara fade ayeke gi ye so a lingbi e sara ni.’”—Luc 17:7-10.

Wakua ti Nzapa oko oko adoit ti hinga nene ti ziango aye ti yingo na kozo ndo. Na ndo ni, zo oko oko adoit ti hinga so a yeke pasa la lo yeke na ni ti voro Nzapa na ti duti tongana mbeni membre ti yâ ti sewa ti lo.

Âmanke, a yeke kete na peko ti ye so la si mbeni zo aga na tokua na iri ti Marie na Marthe. Ala yeke aita ti Lazare ti wali, na ala lango na Béthanie ti Judée. Zo ni atene na Jésus: “Seigneur, lo so mo ye lo mingi so, tere ti lo ason.”—Jean 11:1-3.

Atâa so Jésus amä so tere ti kamarade ti lo ason mingi, vundu ahon ndo ti lo ape. Me, lo tene: “Songo tere so ayeke ti tene lo kui ape, me a yeke ti mû gloire na Nzapa, si na lege ni Molenge ti Nzapa awara gloire.” Na peko ti so lo sara lango use na ndo so lo yeke dä so, Jésus atene na adisciple ti lo atene: “E kiri e gue na Judée.” Adisciple ni ake, ala tene: “Rabbi, a ninga mingi ape la azo ti Judée aye ti bo mo na tênë, na mo ye ti kiri ti gue kâ?”—Jean 11:4, 7, 8.

Jésus akiri tënë na ala atene: “Kota lâ ayeke na l’heure 12 ape? Tongana mbeni zo atambela na kota lâ, lo yeke gu tere ti lo na mbeni ye ape, ngbanga ti so lo bâ lumière ti dunia so. Me tongana mbeni zo atambela na bï, lo yeke pika gere ti lo, ngbanga ti so lumière ayeke na yâ ti lo ape.” (Jean 11:9, 10). Lo ye peut-être ti fa na ala so ngoi so Nzapa amû na lo ti sara kua ti fango tënë ade ti hunzi ape. Ni la, juska ti si na ngoi ni so, Jésus aye ti sara ye kue so lo peut ti sara na yâ ti kete ngoi so angbâ na lo so.

Jésus akiri atene na ala atene: “Kamarade ti e Lazare alango, me mbi yeke gue kâ ti zingo lo.” Ndali ti so ala pensé ti ala atene Lazare angbâ gi ti wu tere ti lo wungo na so na pekoni lo yeke wara ande sava, adisciple atene: “Seigneur, tongana lo yeke lango, tere ti lo ayeke kaï.” Jésus angbâ atene na ala polele: “Lazare akui awe, . . . Me fadeso, e gue na tere ti lo.”—Jean 11:11-15.

So ala hinga so a peut ti fâ Jésus na Judée, nga ti fa so ala peut ti zia lo ape, Thomas atene na amba ti lo adisciple atene: “E nga e gue, si e na lo kue e kui.”—Jean 11:16.