Na Pérée, Jésus atene na azo so ayeke mä lo atene so “azo mingi so ayeke na li ni ayeke ga azo ti nda ni, na azo so ayeke na nda ni ayeke ga azo ti li ni.” (Matthieu 19:30). Lo kiri lo fa tënë ni so polele mingi na mungo mbeni tapande ti ambeni zo so asara kua na yâ ti yaka ti vigne.

Lo tene: “Royaume ti yayu ayeke tongana mbeni wa ti da so asigi na kota ndapre ti gi azo ti mû ala na kua ti yaka ti vigne ti lo. Tongana lo na azo ti kua ni amä tere awe ti tene lo futa ala denier oko na yâ ti lango oko, lo tokua ala na yâ ti yaka ni. A si nduru na ngbonga ota, lo sigi lo bâ ambeni zo so ayeke duti na gara, ala yeke na kua ti sarango ni ape. Lo tene na ala: ‘Ala nga kue, ala gue na yaka ti vigne ti mbi, na mbi yeke mû na ala ye so alingbi na ala.’ Tongaso, ala gue. A si nduru na ngbonga omene, nga na ngbonga gumbaya, lo kiri lo sara nga gi tongaso. Ti hunzi na ni, nduru na ngbonga 11, lo sigi, lo wara ambeni zo so ayeke luti senge, na lo tene na ala: ‘Ngbanga ti nyen, na yâ ti lango ni so kue, ala luti gi senge senge sân ti sara ye oko ape?’ Ala tene na lo: ‘Mbeni zo ti mû e na kua ayeke dä ape.’ Lo tene na ala: ‘Ala nga kue, ala gue na yaka ti vigne ti mbi.’”—Matthieu 20:1-7.

Peut-être, pensé ti azo so ayeke mä lani Jésus ague na ndo ti Jéhovah Nzapa, tongana ala mä Jésus asara atënë ti “Royaume ti yayu” nga na ti “wa ti da”. Bible afa Jéhovah tongana wa ti yaka ti vigne, so ayeke mara ti Israël (Psaume 80:8, 9; Ésaïe 5:3, 4). A haka azo so ayeke na gbe ti Ndia ti mbele na azo so ayeke sara kua na yâ ti yaka ti vigne. Me, Jésus angbâ ti sara lani pëpe tënë ti ye so asi ândö. Lo yeke sara tënë ti ye so ayeke passé lani na ngoi ti lo.

Amokonzi-nzapa nga na aFarizien, so atara Jésus ade ti ninga ape na ndo ti tënë ti divorce, la adoit fade ti ngbâ lakue ti sara kua ti Nzapa ngangu. Ala yeke tongana azo ti kua so asara kua na ngoi kue, na so aku ti tene a futa ala alingbi na nginza ti lango oko, so ti tene denier oko.

Aprêtre nga na ambeni zo ni abâ ti ala atanga ti aJuif tongana azo so aga na peko ti ala, so ti tene azo so asara kua gi teti kete ngoi na yâ ti yaka ti vigne ti Nzapa. Na yâ ti toli ti Jésus so, azo ni so ayeke ala so a mû ala na kua “nduru na ngbonga ota” (wala 9 h ti ndapre), wala na ambeni l’heure nde na pekoni na yâ ti lango ni: na l’heure 6, 9, nga na nda ni na l’heure 11 (wala na 17h).

A bâ lani akoli na awali so amû peko ti Jésus tongana “azo so a deba ala awe.” (Jean 7:49). Mingi ti ala ayeke lani azo ti gingo susu na ambeni ayeke azo ti fango yaka. Na pekoni, na septembre wala na octobre ti ngu 29, “wa ti da” ni atokua Jésus ti tene lo ga lo iri azo so ayeke na ye mingi ape, ti tene ala sara kua na Nzapa tongana adisciple ti Christ. Ala la Jésus asara tënë ti ala atene ala yeke azo ti “nda ni”, so aga ti sara kua na yâ ti yaka ti vigne ni na 17h.

Ti hunzi na tapande ni, Jésus afa ye so asi na nda ti l’heure ti kua ni, lo tene: “Na lakui, wa ti yaka ti vigne ni atene na zo so ayeke na ndo ti kua ni: ‘Iri azo ti kua ni, mo futa na ala nginza ti ala. Mo komanse na ala so mbi mû ala na kua na ndangba ni ti kiri na ala so mbi mû ala kozoni.’ Na ngoi so azo so lo mû ala na kua na ngbonga 11 ni aga, zo oko oko awara denier oko. Tongana azo so lo mû ala na kua kozoni aga, ala pensé so ala yeke wara ti ala nginza mingi. Me ala nga awara denier oko. Tongana ala wara nginza ni, ala to nda ti diko tënë na gbe ti go ti ala na tere ti wa ti yaka ni, ala tene: ‘Azo so aga na ndangba ni asara kua ngbonga oko. Me mo futa ala alingbi na e, e so e bâ pasi ti sara kua na yâ ti lango ni so kue nga na yâ ti ndowa!’ Me wa ti yaka ni atene na mbeni oko ti ala, lo tene: ‘Ita, mbi sara sioni na mo ape! Mbi na mo e mä tere fade ti futa mo denier oko ape? Mû ye ti mo, mo gue. Mbi ye ti mû na zo so mbi mû lo na kua na ndangba ni oko ye so mbi mû na mo. Mbi peut ti sara ye ti bê ti mbi na aye ti mbi wani ape? Wala bê asara mo ndali ti so mbi yeke nzoni zo?’ Legeoko nga, azo ti nda ni ayeke ga azo ti li ni, na azo ti li ni aga azo ti nda ni.”—Matthieu 20:8-16.

Adisciple ni adoit lani ti hunda tere ti ala na ndo ti ndangba mbage ti toli ti Jésus so. Tongana nyen la amokonzi-nzapa ti aJuif, so abâ tere ti ala tongana azo ti “li ni”, ayeke ga azo ti “nda ni”? Tongana nyen la adisciple ti Jésus ayeke ga ande azo ti “li ni”?

Adisciple ti Jésus, so aFarizien nga na ambeni zo abâ ala tongana azo ti “nda ni,” ayeke gue ti ga azo ti “li ni” na ti wara futa ti ala. Tongana Jésus akui, Nzapa ayeke ke azo ti Israël na lo yeke soro mbeni fini mara nde so ayeke ga “Israël ti Nzapa.” (aGalate 6:16; Matthieu 23:38). A yeke na azo ni so la si Jean ayeke sara tënë na ala lani, na ngoi so lo yeke sara tënë ti batême ti yingo vulu so ayeke si ande. Azo so ayeke lani na “nda ni” ayeke ga akozo zo so ayeke wara batême ni so na ala yeke wara pasa ti sara tënë ti témoin na ndo ti Jésus “juska na ambage ti sese so ayeke tâ yongoro.” (Kusala 1:5, 8; Matthieu 3:11). Tongana adisciple agbu nda ti kota changement so Jésus aye ti tene so, ala lingbi ti bâ kozoni awe tongana nyen la bê ti amokonzi-nzapa, so aga azo ti “nda ni”, ayeke son ande na tere ti ala.