Na peko ti so lo sara lango 40 na yâ ti benyama, nga kozoni si lo kiri na Galilée, Jésus akiri aga na mbage ti Jean, zo so abatize lo. Tongana Jésus angbâ ti ga, Jean afa lo na azo so ayeke dä, lo tene: “Ala bâ, so Kete taba ti Nzapa la, lo so azi siokpari ti dunia so! Lo la si mbi sara tënë ti lo, mbi tene: ‘Mbeni zo ayeke ga na peko ti mbi na lo hon kozo na mbi, ngbanga ti so lo bâ gigi kozo ti mbi.’” (Jean 1:29, 30). Atâa so Jean ayeke kota zo na Jésus kete, lo hinga so Jésus ayeke na fini kozoni na lo, ndali ti so Jésus ayeke lani na yayu, tongana mbeni yingo, kozoni si lo ga na sese.

Na ambeni yenga so ahon lani kâ, tongana Jésus aga ti wara batême, âmanke Jean ahinga lani kue ape so Jésus la ayeke duti ande Messie ni. Ni la lo tene: “Mbi kue mbi hinga lo ape, me ndani so mbi yeke batize azo na yâ ti ngu ayeke ti tene a fa lo polele na lê ti azo ti Israël.”—Jean 1:31.

Jean akomanse ti fa na azo, so ayeke mä lo, peko ti aye so apassé lani na ngoi so lo batize Jésus, lo tene: “Mbi bâ yingo alondo na yayu adescend tongana mbeni kolokoto aduti na ndo ti lo. Mbi kue mbi hinga lo ape, me Lo so atokua mbi ti batize azo na yâ ti ngu atene na mbi, atene: ‘Zo so mo bâ yingo ayeke descend aduti na ndo ti lo, lo la lo yeke batize azo na yingo vulu.’ Mbi bâ ni, na mbi sara tënë ni, mbi tene zo so ayeke Molenge ti Nzapa.”—Jean 1:32-34.

Na ndade ni, Jean ayeke lani na adisciple use na tere ti lo, na ngoi so Jésus akiri encore aga. Jean angbâ atene: “Ala bâ, so Kete taba ti Nzapa la!” (Jean 1:36). Gi na ndembe ni so, adisciple use ti Jean Baptiste ni angbâ amû peko ti Jésus. Iri ti mbeni oko ayeke André. Use ni ayeke peut-être zo so asû aye ni so na mbeti, so iri ti lo nga ayeke Jean. Âmanke Jean ni so ayeke mbeni fami ti Jésus, mbeni molenge ti Salomé. Peut-être Salomé ayeke ita ti Marie, na iri ti koli ti lo ayeke Zébédée.

Tongana Jésus atourné na lo bâ so André na Jean ayeke mû peko ti lo, lo hunda ala, lo tene: “Ala yeke gi nyen?”

Ala kue angbâ ahunda lo atene: “Rabbi, . . . mo lango na ndo wa?”

Jésus akiri tënë, lo tene: “Ala ga, ala bâ ni.”—Jean 1:37-39.

A yeke na l’heure osio na peko ti midi la, na André na Jean ahunzi tanga ti lango ni na tere ti Jésus. Tere ti André anzere mingi juska lo gue lo wara ita ti lo Simon, so a iri nga lo Pierre, na lo tene na lo: “E wara Messie ni awe!” (Jean 1:41). André ague na Pierre na Jésus. Na pekoni, ambeni ye so asi afa so Jean nga kue amû ita ti lo Jacques, lo ga na lo na Jésus. Ye oko, Jean afa pëpe mbage ti mbaï ni so na yâ ti buku so lo sû ni.

Na ndade ni, Jésus awara Philippe, so ayeke zo ti Bethsaïda. Bethsaïda ayeke mbeni kodro so ayeke na mbage ti nord ti yanga ti kota Ngu ti Galilée, nga a yeke kodro so André na Pierre akono dä la. Jésus atene na Philippe, lo tene: “Mû peko ti mbi.”—Jean 1:43.

Na pekoni, tongana Philippe awara Nathanaël, so mbeni iri ti lo ayeke Barthélemy, lo tene na lo: “E wara lo so Moïse asara tënë ti lo na yâ ti Ndia so awe, nga so ambeti ti aProphète asara tënë ti lo: A yeke Jésus, molenge ti Joseph, zo ti kodro ti Nazareth.” Me Nathanaël ayeke na kite na lo kiri tënë na Philippe, lo tene: “Mbeni nzoni ye alingbi ti sigi na Nazareth so?”

Me Philippe atene na lo: “Ga mo bâ si ma!” Tongana Jésus abâ Nathanaël na gango ni, lo tene: “Bâ, tâ zo ti Israël so ayeke sara ye na handa ape.”

Nathanaël ahunda lo atene: “Mo hinga mbi tongana nyen?”

Jésus akiri tënë na lo: “Kozoni si Philippe airi mo, so mo yeke fade na gbe ti keke ti figue so, mbi bâ mo.”

Li ti Nathanaël akpe kue, na lo tene: “Rabbi, mo yeke Molenge ti Nzapa, mo yeke Gbia ti Israël.”

Jésus ahunda lo atene: “Mo mä na bê ngbanga ti so mbi tene na mo so mbi bâ mo fade na gbe ti keke ti figue so? Mo yeke bâ ande aye so ayeke kota ahon so.” Na pekoni, Jésus amû na ala mbeni zendo, lo tene: “Ti tâ tënë ni, mbi tene na ala: Ala yeke bâ ande yayu azi na a-ange ti Nzapa so ayeke monté na ayeke descend na mbage ti Molenge ti zo.”—Jean 1:45-51.

Gi kete na pekoni, Jésus azia popo-hoto ti Jourdain na lo gue na Galilée, legeoko na afini disciple ti lo.