Mbeni mbeti atene: “Ti kanga bê na mba ayeke sara si azo aduti na siriri na popo ti ala.”—UNESCO Declaration of Principles on Tolerance, 1995.

 Na mbage, tongana azo akanga bê na amba ti ala ape apeut ti pusu ala ti ne amba ti ala ni ape nga même ti ke ala. Mingi ni, mara ti sarango ye tongaso ayeke pusu zo ti tene asioni tënë, ti ke zo nga ti sara ye ti ngangu na zo.

 Me, azo ayeke na abango ndo nde nde na ndö ti tënë ti kangango bê. Ambeni zo apensé so azo so ayeke kanga bê adoit ti yeda na aye kue so azo ayeke sara. Ti ambeni, so ayeke na même bango ndo ti Bible ayeda so azo so ayeke kanga bê na amba ti ala ayeke bâ na nene ni droit so azo ayeke na ni ti soro ye so ala ye ti sara wala ye so ala mä na bê na ni, atâa ye ni ague nde na ti ala.

 Eskê Bible apeut vraiment ti aidé azo laso ti kanga bê na mba?

Ndani so Bible awa e ti kanga bê na mba

 Bible awa e ti kanga bê. A tene: “Zia azo kue ahinga so ala yeke sara ye ahon ndö ni pëpe.” (aPhilippien 4:5). Bible awa e ti ne azo kue, ti sara ye na ala na nzoni bê nga na lege ni. Peut-être azo so asara ye alingbi na tënë so ayeke yeda ape na aye kue so azo ayeke sara, me ala yeke zia lege na zo oko oko ti soro ye so lo ye ti sara.

 Ye oko, Bible afa so Nzapa alu andia so azo adoit ti sara ye alingbi na ni. A tene: ‘[Nzapa] afa na mo ye so ayeke nzoni awe.’ (Michée 6:8). Aye so Nzapa afa ayeke mû lege na azo ti duti na ngia na yâ ti gigi ti ala.—Ésaïe 48:17, 18.

 Nzapa ahunda na e ti fâ ngbanga na li ti azo ape. Ti gue oko na ye so Bible atene: “Gï zo oko la si ayeke Zo ti lungo ndia nga Juge . . . Mo yeke zo wa ti fâ ngbanga na li ti mba ti mo?” (Jacques 4:12). Nzapa azia lege na zo oko oko ti soro ye so lo ye. —Deutéronome 30:19.

Bible atene nyen na ndö ti nengo zo?

 Bible atene so a lingbi e “ne azo kue.” (1 Pierre 2:17, Mbeti ti Nzapa, Tënë so amu fini). Tongaso, azo so asoro ti sara ye alingbi na andia ti Bible ayeke ne azo kue, atâa aye wa la ala mä na bê na ni wala aye so ala soro ti sara na yâ ti gigi ti ala (Luc 6:31). Ye so aye ti tene ape so azo so asara ye alingbi na ye so Bible afa ayeke yeda na aye kue so azo amä na bê na ni, abango ndo ti ala wala adesizion kue so ala mû. Me, ahon ti tene atënë ti mbana na azo ni nga ti ne ala ape, ala yeke sara kue ti mû peko ti fason so Jésus ayeke sara ye na azo.

 Na tapande, mbeni lâ Jésus atingbi na mbeni wali so asara mbeni bungbi ti nzapa so lo yeda na ni ape. Wali so ayeke vivre nga na mbeni koli so ayeke ti lo ape, a yeke mbeni sarango ye so Jésus aye ni ape. Me, lo sara tënë na wali ni na nengo zo.—Jean 4:9, 17-24.

 Tongana ti Jésus, aChrétien ayeke nduru ti fa tënë ti mabe ti ala na azo so aye ti mä tënë ni, me ala yeke sara ni na “nengo zo mingi.” (1 Pierre 3:15). Bible ahunda na aChrétien ape ti forcé azo ti yeda na bango ndo ti ala. A tene so mbeni disciple ti Christ ‘ayeke tiri pëpe, me lo duti zo so asara ye na ngangu pëpe na azo kue,’ andu nga azo so tënë ti mabe ti ala ayeke nde na ti lo.—2 Timothée 2:24.

Bible atene nyen na ndö ti kengo zo?

 Bible atene na e ti “duti na siriri na azo kue.” (aHébreu 12:14). Mbeni zo so ayeke gi ti duti na siriri na azo ayeke ke azo ape. Ahon ti gue nde na ye so lo mä na bê na ni, lo yeke sara effort ti duti na siriri na azo (Matthieu 5:9). Ti vrai ni, Bible a-encouragé nga aChrétien ti ye awato ti ala na lege so ala sara ye na nzoni bê na azo so ayeke sara ye ti sioni na ala.—Matthieu 5:44.

 A yeke vrai so, Bible atene so Nzapa “ake” asarango ye so abi nengo ti zo na sese wala so asara sioni na zo (aProverbe 6:16-19). Me, Bible asara kua ge na tënë “ke” ti sara tënë ti kengo asioni sarango ye na bê kue. Bible afa so Nzapa ayeke nduru ti pardonné azo nga ti aidé azo so aye ti changé asarango ye ti ala ti gue oko na andia ti lo.—Ésaïe 55:7.

Aversê ti Bible so asara tënë ti kangango bê nga na nengo zo

 Tite 3:2: Ala “sara ye na lege ni, ti fa so ala yeke sara ye biani na ngangu pëpe na azo kue.”

 Matthieu 7:12: “Tongaso, ye kue so ala ye azo asara na ala, ala sara ni na azo ni nga.”

 Josué 24:15: “Zia ala soro laso zo so ala ye ti voro lo.”

 Kusala 10:34: “Nzapa ayeke sara kangbi na popo ti azo pëpe.”

 Habakuk 1:12, 13: ‘Nzapa alingbi ti kanga lê na ndö ti ye ti sioni pëpe.’

 A-Romain 12:19: “Mbeti ti Nzapa atene: ‘Jéhovah atene: Mbi la mbi yeke kiri na zo peko ti sioni so lo sara, mbi la mbi yeke kiri na ni.’” a

 Jéhovah Nzapa amû lege na zo oko ape ti kiri na peko ti sioni so a sara na lo. Lo yeke bâ ande si a leke tënë ni na tâ ngoi ni. Ti hinga ye mingi na ndö ni, diko article “Y aura-t-il un jour la justice dans le monde ?”