Mo kue mo yeda na tënë ni so? Legeoko tongana Samantha, e kue a si na e awe ti tingbi na angangu kpale ngoi na ngoi. Me, lege so e yeke sara na ye na gbe ti akpale ni so la ayeke fa ye so agbu bê ti e. Na tapande, tongana e ye ti kpe ti tene kamene ti mbeni ye so e sara asara e, e peut ti pensé so ti sara ye na lege ni ape ayeke nzoni. Me, tongana amba ti e aga ti hinga tâ tënë ni, asioni ye ti pekoni ayeke ka lakue mingi. Zia e bâ ambeni sioni ye ti pekoni.

Confiance la ayeke sara si songo ti azo akpengba. Tongana azo use ayeke na confiance na mba, a yeke sara si ala gi bê na ndo ti mba ape. Me, a hunda ngoi ti tene zo aduti na confiance na mba ti lo. Azo ayeke komanse ti duti na confiance na amba ti ala gi na peko ti so ala na zo ni aduti place oko mingi, ala tene mvene na mba ape, nga ala yeke pensé gi na ala wani ape. Me, tongana mbeni oko ti ala asara ye na lege ni ape na mbage ti mba ti lo ni, yâ ti confiance ni apeut ti buba na a peut ti duti ngangu mingi ti leke ni.

A si na mo awe ti bâ so mbeni zo so mo pensé mo tene lo yeke nzoni kamarade ti mo ahanda mo? Tongana a yeke tongaso, a sara mo lani tongana nyen? Peut-être ye ni ason mo lani sioni, na a yeke na lege ni. Biani, kite oko ayeke dä ape so, ti sara ye na lege ni ape ayeke sara si songo ti e na amba ti e abuba.

Mbeni gingo nda ti ye ti Robert Innes, so ayeke fa mbeti na dasendagi ti Californie, afa so sarango ye na lege ni ape ayeke tongana kobela so zo ayeke wara na tere ti mba ti lo. Tongaso, a peut ti haka ni na makongo ti mbeni kobela. Tongana mo duti na tere ti mbeni zo so ayeke na mara ti sarango ye ni so, mo nga kue mo lingbi ti ga tongana lo.

Tongana nyen la mo peut ti kpe ti ga zo so ayeke sara ka ye na lege ni ape? Bible apeut ti mû maboko na mo. E wa mo ti bâ ambeni fango ye ti Bible so a sara tënë na ndo ni.