ÂNDÖ, a yeke kä nginza ti peko ti wali na asewa ti wali ni tongana asewa ni use kue ayeda na mariage ni. Ye ti peko ti wali apeut ti duti aye ti ngangu ngere, anyama wala nginza. Na ambeni ngoi, ye ti peko ti wali apeut ti duti ngangu kua so koli ni asara, na tapande ti Jacob so ayeda ti sara kua na babâ ti Rachel ngu mbasambala tongaso si lo peut ti sara mariage na Rachel (Gen. 29:17, 18, 20). A yeke sara lani aye ni so ngbanga ti nyen?

Carol Meyers, mbeni wandara ti Bible, atene: “A yeke futa lani sewa ti wali ni ndali akua so wali ni ayeke sara, so lo yeke sara ni encore ape; kua ni so ayeke lani kota mingi na yâ ti asewa so ayeke sara kua [ti yaka].” A yeke kä nga lani nginza na peko ti wali peut-être ti kpengba songo so ayeke na popo ti asewa use so. Asewa ni apeut ti aidé mba na angoi ti kpale. Na ndö ni, kango nginza na peko ti wali ni afa so koli aga na peko ti lo awe na so lo yeke gue na ndö ti koli ni so ayeke bâ lege ti lo nga ayeke bata lo, me a yeke babâ ti lo encore ape.

Kango nginza na peko ti wali aye ti tene ape so wali ni ayeke mbeni kungba so zo apeut ti vo ni wala ti kä ni. Mbeni buku (Ancient Israel—Its Life and Institutions) atene: “So koli adoit ti mû mbeni wungo ti nginza wala mbeni ye so alingbi na ni na afami ti wali, a fa polele so mariage na Israël ti ândö akpa mbeni vongo ye. Me na bango ni, a bâ lani nginza ti peko ti wali tongana ye so a mû ti kanga na dû ti wali ni me pëpe tongana ngere ti lo.”

Laso, na yâ ti akodro mingi, azo angbâ ti kä nginza na peko ti wali. Na ngoi so ababâ na amama so ayeke aChrétien ayeke hunda nginza ti peko ti molenge ti ala, ala yeke zia si azo “ahinga so ala yeke sara ye ahon ndö ni pëpe” na lege so ala hunda ye mingi ape (aPhil. 4:5; 1 aCor. 10:32, 33). Tongana ala sara tongaso, ala yeke fa so ala yeke pëpe “azo so andoye nginza” wala azo so asara bê ti ye (2 Tim. 3:2). Na ndö ni, tongana ala hunda ye mingi ape, a yeke sara si koli ni ayeke kiri pëpe na lango ti mariage ni na peko ti gue ti gi nginza ti kä na peko ti wali ni. Wala koli ni ayeke zia pëpe kua ti pionnier so lo yeke sara ti gue ti gi kua ti nginza ti sara ti kä kota nginza na peko ti wali ni.

Na ambeni kodro, ndia afa wungo ti nginza so a yeke kä na peko ti wali. Tongana a yeke tongaso, ababâ na amama so ayeke aChrétien ayeke sara ye alingbi na ndia ni. Ngbanga ti nyen? Ngbanga ti so Bible ahunda na aChrétien ti ‘woko terê na gbe ti akota zo ti komande’ nga ti sara ye alingbi na andia so ague nde na ti Nzapa ape.—aRom. 13:1; Kus. 5:29.