1. Nyen la a lingbi mbeni zo asara kozo ti komanse ti leke mbeni da?

IMAGINÉ so mbeni zo aye ti leke da. Lo hinga mara ti da wa la lo ye ti leke ni. Eskê lo yeke londo gï hio tongaso ti vo aye na ti komanse ti leke da ni? Ên-ën. Kozo ti komanse ni, mbeni kota ye ayeke dä so a lingbi lo sara ni. A lingbi lo hinga wungo ti nginza oke la lo bezoin ni ti sara na da ni. Ngbanga ti nyen? Ngbanga ti so a lingbi lo hinga wala lo yeke na nginza so alingbi ti tene lo sara na da ni juska ahunzi. Tongana lo hinga ni kozo, peut-être lo yeke leke da ni juska ahunzi.

2. Ti gue oko na Luc 14:27-30, nyen la a lingbi mo gbu li nzoni na ndö ni kozo ti tene mo wara batême?

² Eskê ndoye ti mo na mbage ti Jéhovah nga singila ti mo ndali ti aye so lo sara ndali ti mo apusu mo ti pensé na ndö ti warango batême? Tongana a yeke tongaso, mo bezoin ti mû mbeni desizion so akpa ti koli so aye ti leke da so. E tene tongaso ngbanga ti nyen? Gbu li na ndö ti atënë ti Jésus so ayeke na Luc 14:27-30. (Diko ni.) Jésus ayeke sara lani tënë na ndö ti ye so dutingo disciple ti lo aye ti tene. Tongana e ye ti duti disciple ti lo, a lingbi e duti nduru ti gbu ngangu na yâ ti akpale nga e zia ambeni ye (Luc 9:23-26; 12:51-53). Tongaso, kozo ti wara batême, a lingbi mo gbu li nzoni na ndö ti aye kue so andu ni. Na pekoni, mo yeke leke terê ti mo nzoni mingi ti ngbâ ti sara na Nzapa be-ta-zo na peko ti batême ti mo.

3. Nyen la e yeke bâ na yâ ti article so?

³ Eskê ti ga mbeni disciple ti Christ so awara batême awe ayeke nzoni mingi ahon akpale so mo doit ti gbu ngangu dä nga na aye so mo doit ti zia ni? A yeke biani tongaso. Mbeni zo so awara batême ayeke wara gbâ ti aye ti nzoni laso nga na yâ ti angoi so ayeke ga. Zia e bâ ambeni kota hundango ndo na ndö ti batême.  A yeke mû maboko na mo ti kiri tënë na hunda so: “Eskê mbi leke terê ti mbi nzoni awe ti wara batême?”

4. (a) Ti mû terê ti mo na Nzapa aye ti tene nyen? (b) Ti tene zo ‘ake’ terê ti lo wani, tongana ti so a fa na Matthieu 16:24, aye ti tene nyen?

⁴ Ti mû terê ti mo na Nzapa aye ti tene nyen? Kozo si mo lingbi ti wara batême, mo doit ti mû terê ti mo na Nzapa. Na ngoi so mo mû terê ti mo na Jéhovah, mo sambela lo na bê ti mo kue mo tene na lo so mo yeke mû fini ti mo ti sara na lo teti lakue lakue. Na ngoi so mo mû terê ti mo na Nzapa, mo “ke” terê ti mo wani. (Diko Matthieu 16:24.) Mo yeke fadeso ti Jéhovah, so ayeke mbeni kota pasa mingi (aRom. 14:8). Mo tene na lo so ti londo na lango ni so, ye so ayeke kota mingi na lê ti mo ayeke ti sara na lo, me pëpe ti sara ye so anzere na mo. Mungo terê ti mo na Jéhovah ayeke mbeni zendo so mo mû na Nzapa na ayeke ye ti ngia ape. Jéhovah aforcé e ape ti mû mara ti zendo so na lo. Me tongana e mû zendo ni, lo ye ti tene e sara ye alingbi na ni.—Ps. 116:12, 14.

5. Ti mû terê na Nzapa andu batême tongana nyen?

⁵ Ti mû terê na Nzapa andu batême tongana nyen? Na ngoi so mo mû terê ti mo na Jéhovah zo oko ahinga ni ape, a yeke gï na popo ti mo na lo awe. Ti batême mo yeke sara ni na lê ti azo, mingi ni na ngoi ti mbeni kota bungbi. Tongana mo wara batême, mo fa na azo so mo mû terê ti mo na Jéhovah awe. * Ni la, batême ti mo ayeke fa na azo so mo ye Jéhovah Nzapa ti mo na bê ti mo kue, na âme ti mo kue, na bibe ti mo kue, nga na ngangu ti mo kue nga so mo leke na bê ti mo awe ti sara na lo lakue lakue.—Marc 12:30.

6-7. Ti gue oko na 1 Pierre 3:18-22, araison use wa la afa so batême ayeke kota ye?

⁶ A yeke biani kota ye ti wara batême? Gbu li na ndö ti atënë so ayeke na 1 Pierre 3:18-22. (Diko ni.) Gï tongana ti so arche afa lani na azo so Noé ayeke na mabe na Nzapa, batême ti mo ayeke fa na azo so mo mû terê ti mo na Jéhovah awe. Me eskê batême ayeke biani kota ye? En a yeke kota ye. Pierre afa araison so ndali ni batême ayeke kota ye. Kozo ni, batême “ayeke sö ala”. Batême alingbi ti sö e tongana e fa na lege ti asarango ye ti e so e yeke na mabe na Jésus nga e yeda so lo kui ndali ti e, a zingo lo na kuâ ti gue na yayu, nga lo yeke fadeso “na terê ti Nzapa na mbage ti koli”.

⁷ Use ni, tongana e wara batême, e yeke duti na “nzoni conscience”. Tongana e mû terê ti e na Nzapa nga e wara batême, e lï na yâ ti mbeni songo so ayeke nde na lo. Nzapa ayeke pardonné asiokpari ti e ndali ti so e changé bê ti e biani nga e yeke na mabe na ye so a futa ti zi azo. Tongaso e lingbi ti duti na nzoni conscience na gbele lo.

8. Nyen la adoit ti pusu mo ti mû desizion ti wara batême?

⁸ Nyen la adoit ti pusu mo ti mû desizion ti wara batême? Na peko ti so mo manda ye nzoni na yâ ti Bible, mo hinga aye mingi na ndö ti Jéhovah, mo hinga aye so lo ye nga tongana nyen la lo yeke sara ye. Aye so mo hinga na ndö ti lo andu bê ti mo mingi na asara si mo ye lo mingi. Ndoye ti mo na mbage ti Jéhovah la adoit ti duti kozo ye so apusu mo ti mû desizion ti wara batême.

9. Ti wara batême na iri ti Babâ, ti Molenge na ti yingo vulu, tongana ti so a fa na Matthieu 28:19, 20, aye ti tene nyen?

⁹ Mbeni ye so mo mû desizion ti wara batême ndali ni ayeke so mo manda atâ tënë ti Bible na mo yeda na ni. Gbu li na ndö ti ye  so Jésus atene na ngoi so lo mû commandement so ayeke ti sarango adisciple. (Diko Matthieu 28:19, 20.) Jésus afa so a doit ti batize azo so awara batême “na iri ti Babâ, ti Molenge na ti yingo vulu.” Tënë so aye ti tene nyen? Mo doit ti yeda na bê ti mo kue na atâ tënë so Bible afa na ndö ti Jéhovah; na ndö ti Molenge ti lo, Jésus; nga na ndö ti yingo vulu. Atâ tënë so ayeke na ngangu mingi nga alingbi ti ndu bê ti mo mingi (aHéb. 4:12). Zia e kiri e bâ ambeni na popo ni.

10-11. Atâ tënë wa la mo manda na ndö ti Babâ ni na mo yeda na ni?

¹⁰ Gbu li na ndö ti ngoi so mo manda lani atâ tënë so na ndö ti Babâ ni: “Iri ti [lo] ayeke Jéhovah,” lo yeke “na nduzu na ndö ti aye kue, na ndö ti sese kue”, nga lo oko la lo yeke “tâ Nzapa”. (Ps. 83:18; És. 37:16). Lo la lo sara e, nga “Jéhovah la ayeke sö zo.” (Ps. 3:8; 36:9). Lo leke ti sö e na yâ ti siokpari nga na kuâ nga lo mû na e beku ti ngbâ na fini lakue lakue (Jean 17:3). Tongana mo mû terê ti mo na Nzapa nga mo wara batême mo yeke fa so mo yeke mbeni Témoin ti Jéhovah (És. 43:10-12). Mo yeke ga na yâ ti sewa ti aita so ayeke na yâ ti dunia so ayeke voro Jéhovah, so ayeke na ngia ti tene iri ti Nzapa ayeke na ndö ti ala nga ala yeke fa ni na azo.—Ps. 86:12.

¹¹ Ti hinga aye so Bible afa na ndö ti Babâ ni, a yeke mbeni kota pasa mingi! Tongana mo yeda na akpengba tâ tënë so, bê ti mo ayeke pusu mo ti mû terê ti mo na Jéhovah na ti wara batême.

12-13. Atâ tënë wa la mo manda na ndö ti Molenge ni na mo yeda na ni?

¹² Mo sara ye lani tongana nyen na ngoi so mo manda lani atâ tënë so na ndö ti Molenge ni? Na peko ti Jéhovah, Jésus la ayeke kota mingi na yâ ti dunia. Lo yeda na bê ti lo kue ti mû fini ti lo tongana ye so a futa ti zi e. Tongana e fa na lege ti asarango ye ti e so e mä na bê na ye so a futa ti zi azo, a lingbi ti pardonné siokpari ti e, e lingbi ti lë songo ti kamarade na Nzapa nga e lingbi ti wara fini ti lakue lakue (Jean 3:16). Jésus ayeke Kota Prêtre ti e. Lo ye ti mû maboko na e ti wara ye ti nzoni na lege ti ye so a futa ti zi azo nga ti duti na kpengba songo na Nzapa (aHéb. 4:15; 7:24, 25). So lo yeke Gbia ti Royaume ti Nzapa, Jéhovah ayeke sara kua na lo ti sara si iri ti Lo aga nzoni-kue, ti zi aye ti sioni nga ti ga na anzoni ye so ayeke ngbâ lakue lakue na yâ ti Paradis so ayeke ga (Mat. 6:9, 10; Apoc. 11:15). Jésus ayeke tapande so e doit ti mû peko ni (1 Pi. 2:21). Lo zia na e mbeni tapande na lege so lo mû fini ti lo ti sara ye so Nzapa aye.—Jean 4:34.

¹³ Tongana mo yeda na ye so Bible afa na ndö ti Jésus, mo yeke ye Molenge ti Nzapa so lo ye lo mingi so. Ndoye so ayeke pusu mo ti mû fini ti mo ti sara ye so Nzapa aye, tongana ti so Jésus asara lani. Ye so ayeke pusu mo ti mû terê ti mo na Jéhovah na ti wara batême.

14-15. Atâ tënë wa la mo manda na ndö ti yingo vulu na mo yeda na ni?

¹⁴ Mo pensé nyen na ngoi so mo manda lani atâ tënë so na ndö ti yingo vulu? Yingo vulu ayeke zo ape, me a yeke ngangu ti Nzapa. Jéhovah asara kua na yingo vulu ti fa na akoli so asû Bible aye so ala sû na yâ ni, nga yingo vulu ayeke mû maboko na e ti mä yâ ti aye so e diko na yâ ti Bible nga ti sara ye alingbi na ni (Jean 14:26; 2 Pi. 1:21). Na lege ti yingo ti Jéhovah, lo mû na e “ngangu so ahon ti so zo ayeke na ni”. (2 aCor. 4:7). Yingo ni amû na e ngangu ti fa nzoni tënë, ti luti na lê ti atara, ti gbu ngangu na ngoi so e découragé nga ti hon ndö ti akpale. A yeke mû maboko na e ti duti na anzoni sarango ye so ayeke mû lege na e ti lë “lengo ti yingo”. (aGal. 5:22). Nzapa amû yingo ti lo na bê kue na azo so ayeke na confiance na lo nga ahunda ni na lo na bê ti ala kue.—Luc 11:13.

 ¹⁵ A dë bê ti e mingi ti hinga so awakua ti Jéhovah alingbi ti zia bê ti ala na ndö ti yingo vulu ti mû maboko na ala ti sara na Nzapa. Tongana mo yeda na atâ tënë so mo manda na ndö ti yingo vulu, a yeke pusu mo ti mû terê ti mo na Nzapa nga ti wara batême.

16. Aye wa la e manda na ndö ti mungo terê na Nzapa nga na warango batême?

¹⁶ Desizion ti mungo terê ti mo na Nzapa nga na warango batême ayeke kota mingi. Tongana ti so e manda, mo doit ti duti nduru ti gbu ngangu na yâ ti akpale nga ti zia ambeni ye. Me aye ti nzoni so mo yeke wara ayeke kota mingi ahon aye so mo yeke zia. Batême alingbi ti sö mo nga ayeke sara si mo duti na nzoni conscience na gbele Nzapa. Ndoye ti mo na mbage ti Jéhovah la adoit ti duti kozo ye so apusu mo ti mû desizion ti wara batême. Mo doit nga ti yeda na bê ti mo kue na atâ tënë so mo manda na ndö ti Babâ ni, na ndö ti Molenge ni, nga na ndö ti yingo vulu. Na peko ti so e bâ aye so kue awe so, mo yeke kiri tënë tongana nyen na hunda so: “Eskê mbi leke terê ti mbi nzoni awe ti wara batême?”

17. Aye wa la mbeni zo adoit ti sara kozo na batême?

¹⁷ Tongana mo bâ so mo leke terê ti mo nzoni awe ti wara batême, kite ayeke dä ape so mo sara ambeni ye mingi awe ti duti na nzoni songo na Jéhovah. * Ndali ti so mo sara lakue étude ti mo ti Bible, mo hinga aye mingi na ndö ti Jéhovah nga na Jésus. Mo mä na bê (aHéb. 11:6). Mo zia bê ti mo kue na azendo so ayeke na yâ ti Bible nga mo yeda na bê ti mo kue so sandaga ti Jésus alingbi ti sö mo na yâ ti siokpari nga na kuâ. Mo changé bê ti mo ndali ti asiokpari so mo sara, so ti tene, mo sara vundu ndali ti afaute so mo sara lani, na mo hunda Jéhovah ti pardonné mo ndali ni. Mo changé lege ti mo, so ti tene, mo ke biani biani sioni lege so mo yeke vivre lani na ni na mo komanse ti duti na fini na mbeni lege so anzere na Nzapa (Kus. 3:19). Mo ye mingi ti fa na azo aye so mo mä na bê na ni. Mo sara aye so a hunda na mo ti ga wafango tënë so ade ti wara batême ape na mo komanse ti fa tënë legeoko na congrégation (Mat. 24:14). Jéhovah ayeke pika kate ndali ti mo teti so mo sara aye so, so mo doit ti sara. Mo zia kota ngia na bê ti lo.—aProv. 27:11.

18. Ambeni ye wa la mo doit ti sara kozo ti tene mo lingbi ti wara batême?

¹⁸ Kozo ti tene mo lingbi ti wara batême, ambeni ye nde ayeke dä so mo doit ti sara. Tongana ti so e bâ fade, mo doit ti mû terê ti mo na Nzapa. Mo sambela lo gï mo oko na bê ti mo kue, mo tene na lo so mo yeke mû fini ti mo ti sara ye so bê ti lo aye (1 Pi. 4:2). Na pekoni, mo tene na coordinateur ti bungbi ti a-ancien so mo ye ti wara batême. Lo yeke hunda na ambeni ancien ti wara terê na mo. Sara mbeto ape ti wara terê na ala. Girisa ape so aita so ayeke sara ye na nzoni bê so ahinga mo  kozo awe nga ala ye mo. Ala yeke kiri ti bâ legeoko na mo afango ye ti Bible so mo manda ni awe. Ala ye ti hinga biani wala mo mä yâ ti afango ye so nga mo hinga so mungo terê na Nzapa nga na batême ayeke kota ye mingi. Tongana ala bâ so mo lingbi ti wara batême, ala yeke tene na mo so mo lingbi ti wara batême na kota bungbi ti peko.

19-20. Aye wa la mo doit ti sara na peko ti batême ti mo? Mo lingbi ti sara ni tongana nyen?

¹⁹ Aye wa la mo doit ti sara na peko ti batême ti mo? * Girisa ape so mungo terê ti mo na Jéhovah ayeke zendo la mo mû na lo na lo ye ti tene mo sara ye alingbi na ni. Tongaso na peko ti batême ti mo, a lingbi mo sara ye alingbi na mungo terê ti mo na lo. Mo lingbi ti sara ni tongana nyen?

²⁰ Ngbâ nduru na congrégation ti mo. Teti so mo yeke Chrétien so awara batême awe, mo ga membre ti mbeni “sewa ti e ti aita”. (1 Pi. 2:17). Aita ti congrégation ayeke tongana sewa ti mo. Tongana mo yeke gue na abungbi lakue, songo ti mo na ala ayeke kpengba. Lâ na lâ, diko Bible nga gbu li na ndö ni (Ps. 1:1, 2). Tongana mo diko mbeni mbage ti Bible, mû ngoi ti gbu li nzoni na ndö ti ye so mo diko. Na pekoni, atënë ni ayeke ndu bê ti mo. “Ngbâ ti sambela lakue”. (Mat. 26:41). Asambela so mo sara na bê ti mo kue ayeke pusu mo nduru na Jéhovah. “Ngbâ ti gi kozoni Royaume ti Nzapa”. (Mat. 6:33). Mo lingbi ti sara ni na lege so mo zia kua ti fango tënë kozo na yâ ti fini ti mo. Tongana mo fa tënë lakue, mo yeke ngbâ ti kpengba mabe ti mo nga mo lingbi ti mû maboko na azo ti wara beku ti fini ti lakue lakue.—1 Tim. 4:16.

21. Batême ti mo ayeke zi lege na mo ti wara aye wa?

²¹ Desizion ti mo ti mungo terê ti mo na Jéhovah nga na warango batême ayeke desizion so ayeke kota mingi ahon adesizion kue so mo yeke mû. A yeke tâ tënë so a hunda ti tene mo zia ambeni ye. Eskê desizion ti mo so ayeke nzoni ahon aye so mo zia? En. Angangu kpale kue so mo lingbi ti wara na yâ dunia so “ayeke ye so aninga pëpe nga ye so ayapu”. (2 aCor. 4:17). Me batême ti mo ayeke zi lege na mo ti duti na ngia mingi na yâ ti fini ti mo laso nga ti wara ande “tâ fini ni biani.” (1 Tim. 6:19). Tongaso, gbu li ti mo nzoni nga sambela ti kiri tënë na hunda so: “Eskê mbi leke terê ti mbi nzoni awe ti wara batême?”