Ti zia ngia na bê ti Jéhovah, e doit ti duti na mabe. Me Bible atene so “mabe ayeke ye so azo kue la si ayeke na ni pëpe.” (2 aThes. 3:2). Na ngoi so bazengele Paul asara tënë so, lo yeke sara lani tënë ti “asioni zo so ayeke sara sioni na amba ti ala” so ayeke sara lani ye ti ngangu na lo. Me tënë so lo tene so angbâ gï na ndö ti ala ape. Ambeni zo asoro ti sara sanka ti aye so afa polele so Nzapa la acréé aye kue (aRom. 1:20). Ambeni apeut ti tene so ala mä na bê na mbeni ye wala mbeni zo so ayeke na ngangu mingi. Me so tâ mabe la ape.

E doit ti hinga biani so Jéhovah ayeke dä nga ‘lo yeke futa’ azo so ayeke na kpengba mabe na lo (aHéb. 11:6). Mabe ayeke mbeni mbage ti lengo ti yingo vulu ti lo. Ti wara yingo vulu, e bezoin ti sambela Jéhovah ti mû ni na e (Luc 11:​9, 10, 13). Mbeni kota ye so e peut ti sara ti wara yingo vulu ayeke ti diko Bible, so a sû ni na gbe ti yingo ti Jéhovah. Na pekoni, e gbu li na ndö ti ye so e diko nga e gi ti sara ye alingbi na ni. Tongana e sara tongaso, e yeke mû lege na yingo ti Jéhovah ti aidé e ti vivre na mbeni fason so afa so e yeke na mabe so azia ngia na bê ti lo.