Anzoni zo kue ayeke gue na yayu?

NA PEKO ti ndangba kobe so Jésus na abazengele ti lo ate so na ndade ni a fâ lo, Jésus atene ni yeke futa ala na mungo na ala mbeni ndo na yayu. Lo tene: “Na yâ ti da ti Babâ ti mbi, ando ti lango ayeke mingi. Tongana ndo ayeke dä pëpe, ka mbi sara tënë ni na ala awe, teti mbi yeke gue ti leke mbeni ndo ndali ti ala.” (Jean 14:2). Ngbanga ti nyen Jésus aleke ndo na ala na yayu? Nyen la ala yeke sara ande kâ?

Na li ti Jésus lo yeke na mbeni kusala so ayeke nde teti adisciple ti lo. Gi na oko bï ni so, lo tene na ala: “Ala yeke azo so angbâ na tere ti mbi na yâ ti atara so asi na mbi. Ni la mbi te mbele na ala, legeoko tongana Babâ ti mbi ate lani mbele na mbi, ndali ti mbeni royaume.” (Luc 22:28, 29). Nzapa amû zendo na Jésus so lo yeke duti Gbia so ayeke mû na azo ti sese kue tâ ye so ala yeke na bezoin ni: nzoni ngorogbia. Jésus ayeke sö ande azo na yâ ti pasi na lo yeke neka azo so asara ngangu na ala. Atâa so ande azo ti gbe ti komandema ni ayeke “gue juska na nda ti sese”, fade ngende ti lo ti gbia ayeke na yayu.​—Psaume 72:4, 8; Daniel 7:13, 14.

Ye oko, Jésus ayeke komande ande gi lo oko pëpe. Ni la, lo mû zendo na abazengele ti lo ti mû na ala ndo na yayu. Ala yeke akozo zo so a soro ala ti “komande tongana agbia na ndo ti sese.”​—Apocalypse 5:10.

Azo oke la ayeke gue na yayu? Tongana ti tanga ti angorogbia kue, azo so ayeke komande na yâ ti Royaume ti Nzapa na yayu ayeke mingi pëpe tongana a haka ala na tanga ti azo so ayeke na gbe ti komandema ti Royaume ni. Jésus atene na azo so ayeke komande legeoko na lo: “Kete kundu, ala sara mbeto pëpe, ngbanga ti so Babâ ti ala abâ so a yeke nzoni ti mû na ala royaume ni.” (Luc 12:32). Na nda ni wungo ti “kete kundu” so ayeke duti ande 144 000 (Apocalypse 14:1). Wungo ti azo so ayeke kete tongana a haka ni na azo kutu mingi so ayeke wara ande fini ti lakue lakue na ndo ti sese na gbe ti Royaume ni.​—Apocalypse 21:4.

Tongaso, a yeke pëpe anzoni zo kue si ayeke gue na yayu. Na ndo ti nzoni Gbia David, Pierre asara tene so polele: “David amontê na yayu pëpe.” (Kusala 2:34). Jean Baptiste ayeke lani zo ti nzoni. Me, Jésus afa so a yä lo ti komande tongana gbia na yayu pëpe. Jésus atene: “Na popo ti azo so awali adü ala, mbeni so abâ gigi na so ayeke kota ahon Jean Baptiste ayeke dä pëpe. Me mbeni zo so ayeke kete na yâ ti royaume ti yayu ayeke kota ahon lo.”​—Matthieu 11:11.

Mo yeke wara ande futa so anzoni zo ayeke wara?

Ti wara fini ti lakue lakue na ndo ti sese tongana futa, a lingbi zo asara nyen? Jésus atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Bâ so ndoye so Nzapa ayeke na ni teti dunia so ague na lo ti zia futa so ayeke fini ti lakue lakue na gbele ti azo kue, me biani gi azo so “amä na bê” si ayeke wara ni.

A lingbi mabe aluti na ndo ti tâ hingango ye (Jean 17:3). Mo lingbi ti fa so mo yeke nzoni zo na mandango ye mingi na ndo ti ye so Jéhovah aleke ti sara teti azo. Zia mabe apusu mo ti sara na Nzapa. Nga hinga so lege ti fini ti lakue lakue azi biani na mo.

 [Encadré na lembeti 7]

Bible atene ti lo nyen?

Hundango tënë:

Tongana anzoni zo akui, ye wa ayeke si na ala?

Kiringo tënë ni:

“Akinda ahinga ye oko pëpe.”​—ZO-TI-FA-TENE 9:5.

Hundango tënë:

Beku wa anzoni zo ayeke na ni teti kekereke?

Kiringo tënë ni:

“Teti ngbonga ni ayeke ga so ala kue so ayeke na yâ ti asende ti kuâ ayeke mä ande go ti lo [Jésus] na ala yeke sigigi.”​—JEAN 5:28, 29.

Hundango tënë:

Mingi ti anzoni zo ayeke duti ande na fini na ndo wa?

Kiringo tënë ni:

“Sese ni aga ye ti héritier ti azo ti mbilimbili, na fade ala duti dä lakue.”​—PSAUME 37:29.