Aye so ayeke sara si sewa aduti na ngia

Dutingo na nzoni songo na akogara

Jenny * atene: Mama ti Ryan ayeke tene ka na mbi sân kamene so lo ye tënë ti mbi pëpe. Babâ na mama ti mbi ayeke tene nga na Ryan tongaso. Me ti tâ tënë ni, lâ oko mbi bâ babâ na mama ti mbi asara tënë sioni sioni tongaso na mbeni zo pëpe. Ye so asara si ti gue ti bâ ababâ na amama ti e ayeke nzere ka na e pëpe.

Ryan atene: Mama ti mbi apensé so mbeni zo oko akpa ti mû amolenge ti lo pëpe. Tongaso, tâ gi na tongo nda ni lo tene so lo ye Jenny pëpe. Nga babâ na mama ti Jenny atene nga na mbi tongaso, lakue ala yeke tene so mbi lingbi na molenge ti ala pëpe. Kpale ni ayeke so, na peko ti aye so, na popo ti mbi na Jenny, zo oko oko ayeke gi gi ti mû mbage ti babâ na mama ti lo na e yeke diko tënë na tere ti mba.

MANGO tere pëpe na akogara alingbi ti duti ye so azo ti sarango angia ti ndara amû ni ti sara na ngia, me ti tâ tënë ni a yeke ye ti ngia pëpe. Reena, mbeni wali so asara mariage awe na so ayeke na Inde atene: “Teti angu mingi, mama ti koli ti mbi ayeke yôro lani tere ti lo na yâ ti sewa ti e. Mingi ni, mbi yeke kiri na ngonzo ni na tere ti koli ti mbi teti so mbi lingbi pëpe ti sara ni na mama ti lo. Mo bâ mo tene lakue a lingbi lo soro ti duti nzoni koli ti wali wala nzoni molenge ti mama.”

Ngbanga ti nyen ambeni babâ na mama ayeke yôro tere ti ala na yâ ti sewa ti amolenge ti ala so asara mariage awe? Jenny so e sara tënë ti lo fade afa mbeni raison ni, lo tene: “Peut-être a yeke ngangu na ala ti yeda ti tene mbeni zo so ade maseka na so ayeke na ndara mingi pëpe abâ lege ti molenge ti ala ti koli wala ti wali.” Dilip, koli ti Reena afa nga mbeni raison ni, lo tene: “Babâ na mama so adö ambeni ye azia ti bata molenge ti ala alingbi ti pensé so mbeni zo ayeke tara ti mû place ti ala. Ala lingbi nga ti gi bê ti ala mingi so molenge ti ala ti koli wala ti wali ayeke pëpe na ndara ti sara si mariage ti lo aduti na ngia.”

Ti tâ tënë ni, na ambeni ngoi amolenge ni ayeke tisa ababâ na amama ti ga ti leke ambeni tënë na yâ ti sewa ti ala. Bâ tapande ti Michael na wali ti lo Leanne so ayeke na kodoro ti Australie. Michael atene: “Leanne alondo na yâ ti mbeni sewa so azo ni aye tere mingi nga ala yeke sara tënë polele na popo ti ala. Na peko ti mariage ti e, lo yeke bâ lani babâ ti lo na ndo ti adesizion so abâ gi mbi  na lo. Babâ ti lo ayeke na ndara mingi, mê bê ti mbi ason teti so lo yeke gue ti bâ lo ahon ti tene lo bâ mbi.”

Biani, mango tere pëpe na akogara alingbi ti ga na vundu na yâ ti mariage. A yeke ye so asi na mo? Songo ti mo na akogara ti mo ayeke tongana nyen? Nga songo ti wali ti mo na akogara ti lo ayeke tongana nyen? Zia e bâ akpale use so alingbi ti londo nga na ye so mo lingbi ti sara ndali ni.

KOZO KPALE NI: Mo pensé so koli wala wali ti mo amû tere ti lo mingi na babâ na mama ti lo. Luis so asara mariage awe na so ayeke na kodoro ti Espagne atene: “Wali ti mbi apensé so tongana e lango nduru na babâ na mama ti lo pëpe, ala yeke bâ so lo ke ala awe. Nga na mbage, na ngoi so e dü molenge ti e ti koli, babâ na mama ti mbi aga lakue ti bâ e, ye so azia vundu na bê ti wali ti mbi. Ye so aga lani na akpale mingi na popo ti e.”

Ye so a lingbi mo hinga: Na ndo ti tënë ti mariage, Bible atene so na ngoi ni “fade zo azia babâ ti lo na mama ti lo, na lo duti na wali ti lo; fade ala ga mitele oko.” (Genèse 2:24). Ti ga “mitele oko” andu aye mingi ahon gi ti lango da oko. A ye biani ti tene so koli na wali ti lo aga mbeni fini sewa, sewa so ayeke kota mingi na lê ti ala ahon asewa so a dü ala dä (1 aCorinthien 11:3). Ti tâ tënë ni, koli na wali so asara mariage awe ayeke na bezoin ti ngbâ ti ne ababâ na amama ti ala, na ye so aye ti tene so ngoi na ngoi a bi bê na ala (aÉphésien 6:2). Ka tongana lege so koli wala wali ti mo ayeke bi bê na babâ na mama ti lo asara si mo bâ so lo girisa na ndo ti mo wala lo bi bê ti lo na mo pëpe?

Ye so mo lingbi ti sara: Gi ti bâ ye ni nzoni si. Koli wala wali ti mo amû tâ tere ti lo mingi na babâ na mama ti lo? Wala peut-être mo la mo yeke pëpe na mara ti songo so na babâ na mama ti mo? Tongana a yeke tongaso, dutingo ti sewa so mo kono na yâ ni asara si peut-être mo bâ ye ni tongaso? Peut-être mo la mo yeke sara mbanda pëpe?​—aProverbe 14:30; 1 aCorinthien 13:4; aGalate 5:26.

Ti kiri tënë na ahundango tënë so, a hunda ti tene zo agbu li ti lo nzoni na ndo ti asarango ye ti tere ti lo. Me a lingbi mo sara ni. Na ndo ni, tongana tënë ti akogara aga lakue na kpale na popo ti mo na koli wala wali ti mo, tâ kpale ni ayeke pëpe ti mo na akogara ti mo me a yeke biani na yâ ti mariage ti ala.

Mingi ti akpale ayeke londo na yâ ti mariage ndali ti so koli na wali ni ayeke na oko bango ndo na ndo ti tënë ni pëpe. Mo lingbi ti tara ti bâ aye tongana ti so koli wala wali ti mo ayeke bâ na ni? (aPhilippien 2:4; 4:5). A yeke ye so Adrián so ayeke na Mexique na so asara mariage awe asara. Lo tene: “Wali ti mbi akono na yâ ti mbeni sewa so sarango ye ti azo ni asara nzoni na ndo ti lo pëpe. Tongaso, mbi kpe ti ga nduru mingi na akogara ti mbi. Teti ngu mingi mbi ke même biani ti sara songo na ala. Ye so aga na kpale na yâ ti sewa ti e teti so wali ti mbi aye ti ngbâ lakue ti duti nduru na afami ti lo, mingi ni na mama ti lo.”

A si na mbeni ngoi, Adrián agi ti sara ye ahon ndo ni pëpe. Lo tene: “Mbi hinga so ti ga nduru mingi na babâ na mama ti lo ayeke sara ye ti nzoni na ndo ti lo pëpe, mbi hinga nga so ti kanga lege na lo ti gue ti bâ ala ayeke ga na akpale. Mbi sara kue ti kiri ti duti na nzoni songo na akogara ti mbi na ti ngbâ ti bata songo ni so.” *

TARA TI SARA YE SO: A yeke nzoni koli na wali ti lo, zo oko oko, asû na mbeti ye so ala bâ so ayeke kota ye ti sara teti akogara ti ala. Tongana lege ayeke dä, to nda ni na mbeni tënë tongana ti so: “Mbi pensé so . . . ” Na pekoni, zo oko oko amû mbeti ni na mba ti lo. Ala use kue, na yâ ti mango tere ala gbu li na ndo ti aye so ala lingbi ti sara ti leke na tënë ni.

USE KPALE NI: Akogara ti mo ayeke yôro tere ti ala lakue na yâ ti sewa ti mo ti mû wango sân ti tene mo na wali wala koli ti mo ahunda ni na ala. Nelya so ayeke na kodoro ti Kazakhstan na so asara mariage awe atene: “Na peko ti mariage ti e, e na afami ti koli ti mbi e lango ndo oko teti ngu mbasambala. Tënë ayeke londo lakue na ndo ti tënë ti batango amolenge, tongo kobe nga lekengo  yâ ti da. Mbi sara tënë ni na koli ti mbi nga na mama ti lo, me a kiri aga gi tënë.”

Ye so a lingbi mo hinga: Tongana mo sara mariage awe, mo yeke mbeni pëpe na gbe ti komandema ti babâ na mama ti mo. Ni la, Bible afa so “mokonzi ti akoli kue ayeke Christ, mokonzi ti wali ayeke koli”, so ti tene koli ti lo (1 aCorinthien 11:3). Ye oko, tongana ti so e bâ fade awe, a yeke nzoni koli na wali ti lo ane ababâ na amama ti ala. Na mbage, aProverbe 23:22 atene: “Mo mä babâ ti mo so adü mo, na mo ke mama ti mo pëpe tongana lo ga mbakoro.” Me ka tongana babâ na mama ti mo wala ti wali ti mo ake ti yeda so koli la ayeke mokonzi ti sewa ti lo, na ala ye si mo na wali ti mo asara ye alingbi gi na awango ti ala?

Ye so mo lingbi ti sara: Gi ti zia tere ti mo na place ti ababâ na amama ni na gi ti hinga ye so ayeke pusu ala ti yôro tere ti ala na yâ ti sewa ti mo. Ryan so e sara tënë ti lo na tongo nda ti article so atene: “Mbeni raison ni ayeke so, ababâ na amama aye ti hinga so ala yeke lakue na kota place na yâ ti fini ti amolenge ti ala.” Mara ti sarango ye tongaso ayeke peut-être na mbana pëpe nga a lingbi ti leke ni na mungo peko ti wango ti Bible. Wango so ahunda na azo ti “ngbâ ti kanga bê na amba ti ala na popo ti ala, na ti pardone mba na bê ti ala kue, tongana mbeni zo ayeke na tënë ti dema na tere ti mba ti lo.” (aColossien 3:13). Me ka tongana sarango ye ti akogara ti mo ni ahon ndo ni na aga na kpale na popo ti mo na wali wala koli ti mo?

Ambeni koli na wali so asara mariage awe atara ti zia akatikati na yâ ti sarango ye ti ala na mbage ti ababâ na amama ti ala. Me ti sara ni a lingbi mo diko pëpe na ala andia so mo lu ni. * Mingi ni a yeke gi ti tene mo fa na ala na yâ ti asarango ye ti mo so koli wala wali ti mo la ayeke kota mingi na yâ ti fini ti mo. Na tapande Masayuki, mbeni koli so asara mariage awe so ayeke na Japon atene: “Même tongana ababâ na amama afa abibe ti ala, yeda na ni hio pëpe. Girisa pëpe so mo na wali ti mo wala koli ti mo ayeke leke gere ti mbeni fini sewa. Tongaso gi ti hinga kozoni bibe ti koli wala wali ti mo na ndo ti wango ni so.”

TARA TI SARA YE SO: Sara lisoro na koli wala wali ti mo na ndo ti ambilimbili ye so ababâ na amama ayôro tere ti ala na yâ ni na so asara si aga na kpale na yâ ti mariage ti ala. Ala use kue ala sû na mbeti akatikati so ala zia ndali ti ababâ na amama ti ala na ala gi ti sara ye alingbi na ni. Nga na oko ngoi ni ala ngbâ lakue ti ne ababâ na amama ti ala.

Koli na wali alingbi ti sara si mingi ti akpale so ala wara na akogara ti ala akiri na peko. Ala yeke sara ni tongana ala gi ti hinga ye so apusu akogara ni ti yôro tere ti ala na yâ ti sewa ti ala nga ala zia pëpe si mango tere pëpe na akogara aga na tënë na popo ti ala. Na ndo ti tënë so, Jenny atene: “Na ambeni ngoi, lisoro so mbi na koli ti mbi e yeke sara na ndo ti ababâ na amama ti e ayeke ga na papa wala toto. E ga ti bâ so e lingbi ti son bê ti mba na kasango babâ na mama ti lo. Ye oko, yeke yeke e zia lege ti mû awokongo ti akogara ti e ti son na bê ti mba me e gi gi ti hon ndo ti kpale so e wara. Na nda ni, mbi na koli ti mbi e ye tere mingi.”

[Akete tënë na gbe ni]

HUNDA TERE TI MO . . .

▪ Anzoni sarango ye wa akogara ti mbi ayeke na ni?

▪ Na lege wa mbi lingbi ti ne babâ na mama ti mbi nga ti bi bê na koli wala wali ti mbi?