Yayu ayeke tongana nyen?

AMBENI zo abâ ti ala so a yeke ngangu na zo ti hinga tënë na ndo ti yayu teti so lâ oko mbeni zo alondo kâ aga asara tënë na e na ndo ni pëpe. Peut-être ala girisa awe so Jésus atene: “Mbi londo na yayu mbi zu.” (Jean 6:38). Lo tene nga na ambeni mokonzi-nzapa: “Ala yeke ti ala ti gbe ni, me mbi yeke ti mbi ti nduzu.” (Jean 8:23). Tënë ti nyen la Jésus atene lani na ndo ti tënë ti yayu?

Jésus atene biani so yayu ayeke ndo so Jéhovah aduti dä. Lo tene Nzapa ayeke “Babâ ti [ni] so ayeke na yayu”. (Matthieu 12:50). Me Jésus asara kusala na mbupa “yayu” ti sara tënë ti aye nde nde. Na tapande lo sara tënë ti yayu tongana lo tënë: “A kanga yayu teti ngu ota na nze omene”. (Luc 4:25). Ye oko, nduzu so lê abâ ayeke na gbe ti ndo so Jéhovah ayeke dä. Bible atene: “A yeke Lo so aduti na ndo cercle ti sese na nduzu.”​—Ésaïe 40:22.

Yayu so atongoro ayeke dä so la ‘Babâ so ayeke na yayu’ ayeke dä? Na yâ ti Mbeti ti Nzapa, a iri nga dunia so atongoro na lâ ayeke dä “yayu”. Na tapande, mbeni wasungo psaume atene: “Tongana mbi bâ ayayu ti Mo, ye so li tïtî Mo asara, nze na atongoro so Mo sara, Zo ayeke nyen, si Mo dabe Mo na lo?”​—Psaume 8:4, 5.

Biani, legeoko tongana ti so mbeni zo so asara armoire ayeke duti na yâ ni pëpe, tongaso nga Jéhovah Nzapa alingbi pëpe ti duti na yâ ti dunia so lo sara; so sese, atongoro nga na lâ ayeke na yâ ni. Ni la, na ngoi ti mungo temple so ayeke na Jérusalem na Jéhovah, Gbia Salomon atene: “Fade Nzapa aduti na sese so biani? Bâ, yayu na yayu ti ayayu alingbi na Mo pëpe; tongaso da so mbi sara awe, fade a lingbi na Mo tongana na nyen?” (1 aGbia 8:27). Tongana Jéhovah alingbi pëpe ti duti na yayu so lê ti zo abâ, ka yayu ni so lo yeke dä so ayeke na ndo wa?

Atâa so azo amanda ye na ndo ti nze na atongoro na lege ti angangu masini ti bango na ye, na ambeni ague même na lê ti nduzu yongoro, tënë so Bible atene angbâ lakue tâ tënë: “Mbeni zo ade abâ Nzapa lâ oko pëpe.” (Jean 1:18). Jésus afa nda ni tongana lo tene: “Nzapa ayeke mbeni Yingo.”​—Jean 4:24.

Yingo ayeke mara ti fini so ayeke kota mingi ahon ti zo. Zo so ayeke yingo ayeke na ye tongana mitele na mênë pëpe. Zo alingbi pëpe ti bâ lo wala ti ndu lo. Tongaso, tongana lani Jésus atene ni yeke na tere ti Babâ ândö na “yayu”, lo ye ti tene so lo yeke na yâ ti mbeni tere so ayeke na gloire mingi ahon fini kue so lê abâ (Jean 17:5; aPhilippien 3:20, 21). Ndo ti yingo so Jésus ayeke ândö dä na tere ti Babâ ti lo ayeke ye so Bible airi ni “yayu”. Yayu ni ayeke tongana nyen? Nyen la ayeke tambela kâ?

 Yayu: mbeni ndo ti kusala so amû ngia

Bible afa yayu tongana mbeni ndo so kusala ayeke dä mingi. Bible asara tënë ti acréature ti yingo be-ta-zo kutu ngbangbo mingi so ayeke kâ (Daniel 7:9, 10). Acréature ti yingo oko oko so sarango ye ti ala ayeke nde nde. E hinga ni tongana nyen? Na popo ti aye kue so Nzapa acréé na so lê abâ, a lingbi pëpe ti wara aye use so sarango ye ti ala ayeke gi legeoko; ni la e lingbi ti tene so a yeke nga legeoko tongaso na yayu. Ye so apika bê mingi ayeke so, acréature ti yingo so kue ayeke sara kusala na yâ ti mango tere. Tongaso pendere dutingo ti ala ayeke nde na ti azo ti sese laso, so a yeke ngangu na ala ti mä tere.

Bâ tongana nyen Bible afa tënë ti kua so ayeke tambela na yayu. “Sara tënë nzoni na L’Éternel, i a-ange ti Lo, i so i yeke na ngangu, i so i sara ye alingbi na tënë ti Lo, i so i mä tënë ti yanga ti Lo. Sara tënë nzoni na iri ti L’Éternel, i aturugu ti Lo kue, i awakua ti Lo, i so i sara ye so amû ngia na Lo.” (Psaume 103:20, 21). Tongaso, a yeke sara kua mingi na yayu na ndembe so. E hinga so a yeke kusala so amû ngia na bê.

A-ange ayeke na ngia na yâ ti kusala ti ala ngbene ye kozoni si a créé sese. Mbeti ti Nzapa atene so, na lâ ni so Jéhovah asara gere ti sese, amolenge ti Nzapa “asara bia” na “adekongo na ngia.” (Job 38:4, 7). Mbeni oko ti amolenge ti Nzapa ayeke na pasa ti sara kusala na tere ti Nzapa ti créé tanga ti aye kue (aColossien 1:15-17). Tënë na ndo ti pendere kusala so a yeke sara na yayu alingbi ti sara si ambeni hundango tënë aga na li ti mo na ndo ti azo ti yayu nga na ndo ti azo ti sese.

A sara azo ti tene na pekoni ala gue na yayu?

Teti so a-ange ayeke sara na Nzapa na yayu kâ kozoni si a zia gere ti sese, a yeke polele so Nzapa acréé kozo koli na kozo wali ti tene ala gue ala dü na yayu pëpe. Nde na so, Nzapa atene na ala: “I dü amolenge mingi, i wu, i si singo na sese.” (Genèse 1:28; Kusala 17:26). Fini ti Adam ayeke lani mbeni fini ye na popo ti aye so ayeke na ndo ti sese teti lo yeke na ngangu ti hinga Nzapa na ti sara na lo be-ta-zo. Adam la alingbi ti ga babâ ti azo kue so ayeke sara kodoro na ndo ti sese. “Ayayu ayeke ayayu ti L’Éternel; me Lo mû sese so na amolenge ti azo.”​—Psaume 115:16.

Ti bâ ni nzoni, azo aye ti kui pëpe; a sara zo ti kui pëpe. Nzapa atene na Adam so lo yeke kui gi tongana lo ke yanga ti ni. Tongana lani Adam amä yanga ti Nzapa ka lo kui pëpe.​—Genèse 2:17; aRomain 5:12.

Ni la, a yeke ye ti dongo bê pëpe so Nzapa asara pëpe tënë ti guengo na yayu na Adam. Tongaso, a sara sese pëpe ti tene a tara azo dä ti bâ wala ala lingbi ti gue ti duti na yayu. Me a sara zo ti duti na fini lakue lakue na ndo ti sese, na fade ye so Nzapa aleke awe so ayeke ga tâ tënë. Bible amû zendo so “sese ni aga ye ti héritier ti azo ti mbilimbili, na fade ala duti dä lakue.” (Psaume 37:29). A yeke polele so na tongo nda ni a sara azo ti gue na yayu pëpe. Tongaso, ngbanga ti nyen si Jésus amû zendo ti guengo na yayu na abazengele ti lo? Jésus aye ti tene so anzoni zo kue ayeke gue ande na yayu?