Fadeso mbi hinga Nzapa so mbi voro lo

TËNË TI MARIETA MANUEL BACUDIO

Mbeni évangéliste ti Eglize Pentécotiste so a tene lo yeke na “don de guérison” aga lani ti bâ e. Na ngoi so lo ndu mbi, “yingo amû mbi” abi mbi na sese si mbi hinga ye encore ape. Tongana yingo ti mbi akiri dä, mbi bâ so mbi wara “don de guérison,” mbeni ye so mbi yeke gi ni lani. Nyen la ague na mbi ngbii ti si na aye so kue? Aye ni so asara nyen na yâ ti fini ti mbi? Kozo ti tene mbi fa ni, mbi yeke fa na ala aye so mbi sara ândö.

A DÜ mbi na 10 décembre 1968 na Ilocos Norte, mbeni gbata ti Philippines. A dü e bale-oko, na mbi yeke mbasambala molenge ni. Tongana atanga ti azo ti Philippines kue, mbi kono na yâ ti sewa ti Catholique. Mbi hunzi mandango mbeti ti mbi na lycée na ngu 1986, na mbi ye lani ti ga infirmière. Me, mbi wara lege ni ape ndali ti mbeni sioni kobela so amû mbi. Na mbi, mbi tene mbi yeke kui gi kuingo. Vundu ahon ndo ti mbi, si mbi voro Nzapa ti mû maboko na mbi nga mbi tene na lo so tongana mbi wara santé, mbi yeke mû fini ti mbi kue ti sara gi na kua ti lo.

Mbi ninga na yâ ti kobela ni. Me tongana mbi wara santé awe, mbi girisa yanga so mbi mû na Nzapa so ape. Na juin ti ngu 1991, mbi zia iri ti mbi na École Biblique Pentécotiste. Na ekole ni kâ, a tene so zo ayeke wara “don de l’esprit.” Mbi ye lani ti wara “don de guérison.” A fa na e kâ a tene tongana zo aye ti wara ni a yeke gi na lege ti jeûne nga na sambela. Mbeni lâ na ngoi ti sambela, e kue e sara agenou e sambela. Me ti fa so mbi yeke na mbeni “don” ni, mbi hara yeke yeke mbi gue mbi mä sambela ti mbeni mba ti mbi élève ni. Tongana lo ga nduru ti hunzi awe mbi kiri hio na place ti mbi. Na pekoni, mbi fa na lo peko ti atënë kue so lo tene na yâ ti sambela ti lo ni. A sara si lo pensé so mbi wara “don” ni awe.

Na angoi so kue mbi ngbâ na ekole ni, mbi yeke na gbâ ti ahundango ndo. Na tapande, na Matthieu 6:9 a sara tënë ti “Babâ” nga na ti “iri” ti lo. Mbi yeke hunda ka, mbi tene “Babâ ni so Jésus asara tënë ti lo so ayeke zo wa?” nga “Iri ti zo wa la si a lingbi aga nzoni-kue so?” Awafango mbeti ni ayeke mû ka akiringo tënë so ayeke gi tongaso na alingbi na ti so mbi ye ape. Ala tene so tënë ti Trinité ayeke ka mbeni ye so zo ahinga li ti lo na ni ape. Li ti mbi aga kirikiri. Me so kue, mbi ngbâ gi ti sara ekole ti gango pasteur ni.

Mbi na aTémoin ti Jéhovah

Na ekole ni kâ, a fa na e so aTémoin ti Jéhovah ayeke tâ sioni mingi. A tene nga so ala hinga Jésus ape. Ye so asara si mbi ke ala na bê oko.

Na yâ ti use ngu ni so mbi sara na ekole ni, mbi mû congé mbi gue mbi bâ afami ti mbi. Carmen, mbeni yaya ti mbi ti wali, amä so mbi ga na lo ga nga. Lo yeke ti lo Témoin ti Jéhovah nga lo yeke pionnier, so ti tene lo yeke fa tënë angbonga mingi. Lo tara ti fa tënë ti Nzapa na mbi, me ngonzo agbu mbi, mbi tene na lo: “Mbi hinga Nzapa so mbi yeke sara  na lo so awe!” Mbi zonga lo ngangu, na pekoni mbi pusu lo si mbi zia même ngoi na lo ti sara tënë ape.

Tongana mbi kiri na ekole ni awe, Carmen atokua na mbi mbeti Doit-on croire à la Trinité? * Gi so mbi wara ni, mbi mû gi ni mbi froissé yâ ni, mbi bi na wâ. Ngonzo angbâ ti sara mbi na tere ti lo.

Mbi ga pasteur

Na ngoi so mbi de na ekole ni, mbi wara lege ti ga na ambeni zo na yâ ti Eglize Pentécotiste ni. Tere ti mbi anzere sioni so mama na yaya ti mbi ti koli alï na yâ ni nga.

Na mars ti ngu 1994, mbi wara diplôme ti mbi ti École Biblique Pentécotiste ni. Tongana ti so mbi tene na tongo nda ni fade, mbeni évangéliste aga na ngoi ni so. E kue so e wara diplôme ni e ye ti ngbâ gi na tere ti lo ndali ti so na e lo yeke na “don de guérison.” Tongaso, e montê na ndo ti estrade ni, e yeke huru, e yeke pika maboko na e yeke he bia. Na pekoni, zo kue so évangéliste ni ayeke ndu lo, “yingo ayeke mû lo” * na ayeke bi zo ni so na sese. Tongana lo ndu mbi, mbi nga kue mbi tï na sese, yingo ti mbi ahon. Tongana yingo ti mbi akiri dä awe, mbeto asara mbi, me mbi sentir so mbi wara “don de guérison” ni awe, na tere ti mbi anzere.

Kete na pekoni, mbi mû ngangu so mbi wara so ti sava na mbeni molenge so fièvre abi lo ngangu. Na ndembe so mbi yeke sambela, gbiki ato nda ti sara molenge ni na fièvre ti lo ni ahon kue. Enfin, mbi wara lege ti sara ye ague oko na yanga so mbi mû lani na Nzapa. Atâa so kue, mbeni ye amanke mbi. Na gbe ti bê ti mbi, mbi tene Nzapa ayeke gi oko, me mbi hinga lo nzoni ape. Nga, mbi yeke na kite na ndo ti gbâ ti aye so ayeke fa na eglize ni.

Ambeni ye so achangé bango ndo ti mbi

Na peko ti aye so asi na mbi so, mbi kiri mbi ke aTémoin ti Jéhovah na bê oko. Ambeti kue ti aTémoin so mbi wara ni, mbi yeke gbi ni gbingo. Me mbeni ye asi so mbi ku tere ti mbi na ni ape. Mama ti mbi aye encore ti ngbâ na yâ ti eglize ti e ni ape. Li ti mbi akpe kue. Andâ Carmen ayeke manda Bible na lo. Bê ti mbi ason sioni na tere ti ita ti mbi ni.

Mbeni lâ, mbi wara Réveillez-vous ! na da ti Mama. Ye so mbi yeke sara ka ayeke so mbi yeke gbi ka ambeti ni so. Me ti so ni so, mbi ye ti hinga ye so lo yeke diko ni so. Tongaso, mbi bi lê dä, na lê ti mbi atï na ndo ti mbeni mbage ni so asara tënë ti mbeni zo so amä na bê ândö ngangu na ye so a fa na lo na eglize ti lo. Me tongana lo yeke diko ambeti ti aTémoin ti Jéhovah na Bible na tere ti lo, lo bâ biani so tënë ti Trinité, ti enfer na ti âme so alingbi ti kui pëpe so ague nde na ye so Bible afa. Mbage so ge apika bê ti mbi teti tâ gi aye so mbi ye ti hinga ndani la. A komanse na ndo so, mbi ye mingi ti hinga tâ ye so Bible afa.

Mbi kiri mbi diko mbeni Réveillez-vous! ni. Ti so nga asara tënë ti mbeni zo so ândö ayeke ngbâa ti sämba nga so ayeke nyon ambangi. Me lo manda Bible na lo changé kue. Mbaï ni so asara si mbi kiri mbi diko ambeni mbeti ti aTémoin ni. Mbi wara mbeni mbeti so iri ni  ayeke Iri ti Nzapa so angbâ kpunakpu. * Na dikongo mbeti ni so, mbi manda so iri ti Nzapa ayeke Jéhovah. So nzerengo tere na mbi! so mbi hinga tâ tënë na ndo ti tâ Nzapa awe so!​—Deutéronome 4:39; Jérémie 10:10.

Mbi ngbâ ti diko lani ambeti ni me na hondengo ni, na mbi manda aye mingi dä. Na tapande, na ekole ti aPentécotiste ni lani, a fa na mbi so Jésus ayeke Nzapa, me mbi diko na yâ ti Bible a tene lo yeke “Molenge ti Nzapa so ayeke na fini.”​—Matthieu 16:15, 16.

Mbi changé bê ti mbi

Tongana mbi na Carmen e kiri e wara tere, mbi hunda na lo ti mû na mbi ti mbi mbeti Iri ti Nzapa so angbâ kpunakpu ni nga na ambeni mbeti ni. Li ti Carmen akpe kue. Mbi sara angu mingi na école Biblique ni, me a fa na mbi lani tâ tënë kâ ape; lê ti mbi avuko lani. Ti fadeso, bê ti mbi ayeke na ngia mingi ndali ti atâ tënë so mbi yeke manda na yâ ti Bible. Mbi bâ tongana nyen la tënë ti Jésus so lo tene na Jean 8:32 so aga tâ ye na ndo ti mbi, a tene: “Ala yeke hinga ande tâ tënë, na tâ tënë ayeke zi ala.” Atâ tënë so akomanse ti changé mbi.

Teti mbeni ngoi, mbi tene ti mbi mbi tene mbi lingbi ti sara na Jéhovah Nzapa na hondengo ni na ti ngbâ lakue pasteur. Me mbi ga ti bâ so gbâ ti ambeni fango ye ti eglize ni, mbi lingbi ti fa ni encore ape. Ye oko, mbeto asara mbi, teti mbi tene tongana mbi zia kua ti pasteur ni, mbi yeke sara tongana nyen ti vivre? Nga, tongana mbeni pasteur ti eglize ni aga Témoin ti Jéhovah, a yeke sara ande amembre ni nzoni ape. Tongaso mbi ngbâ lakue pasteur ni na ti fa ye na eglize ni, me afango ye ti wataka ni, mbi fa ni ape.

Tongana mbi kiri mbi bâ Carmen, lo wa mbi ti gue na bungbi ti aTémoin ti Jéhovah. Teti so lakue mbi yeke gue ka na kota eglize ni na gbata ti Laoag, kâ mbi gi na hondengo ni Da ti Royaume ti aTémoin ti Jéhovah, ndo so ala yeke sara ka abungbi ti ala dä, na mbi wara ni. Mbi tingbi na Alma Preciosa Villarin, so a hinga nga lo na iri ti “Precious”. Lo yeke pionnier na yâ ti congrégation ni. Lo hunda na mbi ti tene lo manda Bible na mbi, na mbi yeda na ni atâa so tënë ti aTémoin ti Jéhovah ade ti gbu bê ti mbi kue ape.

Yaya Carmen akanga bê lani na ngoi so lo yeke fa na mbi Bible. A yeke nga oko ye so mbi bâ na mbage ti Precious. Na ngoi so mbi na lo e yeke manda ye, tongana e manda mbeni ye ni si a gue nde na ye so a fa na mbi kozo, ngonzo ayeke sara mbi, mbi yeke gi ti papa na lo, mbi yeke yô go ti mbi même na ndo ti lo. So kue lo yeke zi yanga ape, lo yeke gi gi ti mû maboko na mbi ti hinga ye so Bible afa. Teti so  Precious na ambeni Témoin ni nde abi bê ti ala na mbi nga ala sara tere ti ala kete, ye so andu bê ti mbi mingi. A pusu mbi ti yeda ti voro Jéhovah.

Na juillet ti ngu 1995, mbi bâ so a lingbi mbi zia kua ti mbi ti pasteur ni. Ngbanga ti so na Apocalypse 18:4 a sara tënë ti abungbi ti vorongo nzapa ti wataka na lege ti fä, a tene: “Ala sigigi na yâ ti gbata so tongana ala ye ti yô mbage ti asiokpari ti lo pëpe, nga tongana ala ye ti wara mbage ti asioni ye so ayeke si na lo so pëpe.” Me mbi yeke wara nginza na ndo wa ti vivre na ni? A-Hébreu 13:5 afa na mbi so tongana mbi ye ti sara ye so Nzapa aye, lo Nzapa ni lo mû zendo, lo tene: “Mbi yeke zia mo lâ oko pëpe nga mbi yeke girisa mo lâ oko pëpe.”

Babâ ti mbi nga na ita ti mbi ti koli akanga lege na mbi ngangu. Me atâa so kue ayenga use kozo ti tene mbi mû batême ti ga Témoin, mbi zi mbeto na yâ ti mbi, mbi gue na yanga-da mbi zö aye kue so mbi sara na kua ti pasteur lani. Na pekoni, mbi sentir so ngangu so ayeke lani na yâ ti tere ti mbi ti sarango na aguérison ahon kue. Kozo, tongana mbi lango, mbi yeke sentir mbeni ye ayeke lango na ndo ti mbi si ayeke pete mbi lakue. Me fadeso ye ni so ahon awe. Lani mbi yeke bâ ka yingo ti mbeni zo na tere ti fenêtre ti chambre ti mbi. Fadeso a yeke dä encore ape. Na étude ti Bible so mbi sara, mbi manda so “adon” kue so azo ayeke wara ni laso, tongana “adon de guérison,” alondo na Nzapa ape me na asioni yingo. Mbi yeke na ngia mingi so mbi sigigi na gbe ti asioni yingo, tongana ti maseka-wali so Paul na Barnabas azi lo na gbe ti “sioni yingo ti bango mbadi”.​—Kusala 16:16-18.

So ngia si mbi na Mama e yeke na ni ti duti na tere ti tere na ngoi so e yeke gue ti mû batême ti ga aTémoin ti Jéhovah na septembre ti ngu 1996! Na peko ti batême, mbi mû kua ti pionnier na mbi wara ngia na yâ ni teti angu mingi.

Mbi mû koli fadeso awe. Iri ti lo ayeke Silver na e dü molenge ti wali. Mbi na lo, e yeke sara kue ti mû maboko na molenge ti e ni ti sara ye so Bible afa. Ambeni ita ti mbi nga aga aTémoin ti Jéhovah. Mbi regretté so mbi hinga Nzapa hio ape, me mbi yeke na ngia mingi so fadeso mbi hinga Nzapa so mbi voro lo.

[Akete tënë na gbe ni]

[Tënë na lembeti 27]

Mbi mû ngangu so mbi wara so ti sava na mbeni molenge so fièvre abi lo ngangu

[Tënë na lembeti 28]

Atâ tënë so akomanse ti changé mbi

[Tënë na lembeti 29]

So nzerengo tere na mbi! so mbi hinga tâ tënë na ndo ti tâ Nzapa awe so!

[Foto na lembeti 27]

Na ngoi so mbi sigigi pasteur

[Foto na lembeti 28, 29]

Precious angbâ ti manda Bible na mbi lani la

[Foto na lembeti 29]

Mbi na Mama, na lango ti batême ti e

[Foto na lembeti 29]

Na yâ ti kua ti mbi ti pionnier

[Foto na lembeti 29]

Mbi na koli ti mbi, na molenge ti e nga na afami ti e so ayeke voro nga Jéhovah