Bâ ye so Bible afa

Nyen la ayeke si ande na Lâ ti fango ngbanga, nyen?

Article so ayeke sigigi na ahundango tënë so mo lingbi ti hunda tere ti mo na ni nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Lâ ti fango ngbanga ayeke nyen?

Tongana ti so e bâ na lê ti foto so na mbage ti koli, azo mingi apensé so na Lâ ti fango ngbanga, âme ti gbâ ti azo so akui ayeke luti na gbele trône ti Nzapa. Lo yeke fâ ngbanga ti ala alingbi na aye so ala sara ândö. Ambeni ayeke wara fini na yayu, me ti ambeni, Nzapa ayeke bi ala na lê ti wâ. Ye oko, Bible afa so Lâ ti fango ngbanga ni ayeke ti zi azo na gbe ti sarango ye ti kirikiri (Psaume 96:13). Jésus la Nzapa asoro lo ti duti Juge ni ti kiri na sarango ye ti mbilimbili na ndo ti sese kue.​—Diko Ésaïe 11:1-5; Kusala 17:31.

2. A yeke kiri na sarango ye ti mbilimbili na Lâ ti fango ngbanga tongana nyen?

So lani Adam ake yanga ti Nzapa, lo ga na siokpari, pasi nga na kuâ na ndo ti amolenge ti lo kue (aRomain 5:12). Ti leke kpale ni so, Jésus ayeke kiri na azo gbani gbani na fini, so ti tene lo yeke zingo ala na kuâ. Mbeti ti Apocalypse afa so a yeke si ande na ngoi so Christ Jésus ayeke komande teti ngu saki oko.​—Diko Apocalypse 20:4, 11, 12.

Azo so ayeke zingo na kuâ, a yeke pëpe aye so ala sara ândö so la si a yeke mû ni ti fâ na ngbanga na ndo ti ala. Me a yeke fâ ande ngbanga na li ti ala alingbi na atënë ti yâ ti ‘ambeti so a rulê ni rulengo’, so Apocalypse chapitre 20 asara tënë ni (aRomain 6:7). Paul atene so a yeke zingo ande na kuâ “azo ti mbilimbili na azo ti mbilimbili pëpe.” Ala kue ayeke wara ande pasa ti manda ye na ndo ti Nzapa.​—Diko Kusala 24:15.

  3. Nyen la ayeke si ande na ngoi so Lâ ti fango ngbanga ayeke hunzi?

Azo so lani ahinga Jéhovah ape si ala sara na lo ape, tongana a zingo ala na kuâ, Nzapa ayeke zia ande lege na ala ti changé na ti sara ye so ayeke nzoni. Tongana ala mä yanga, “zingongo ti ala na kuâ [ni] ayeke ti wara fini”. Me ti ambeni so a zingo ala si ayeke ke ande ti sara ye so Jéhovah ahunda, “zingongo ti ala na kuâ [ni] ayeke ti wara ngbanga.”​—Diko Jean 5:28, 29; Ésaïe 26:10; 65:20.

Ti si na hunzingo ti Lâ ti fango ngbanga so aninga ngu saki oko, andâ Jéhovah asara si azo so amä yanga aga azo so siokpari ayeke na tere ti ala encore ape tongana ti Adam kozo si lo ke yanga (1 aCorinthien 15:24-28). So tâ pendere ye si ayeke ku azo kue so amä yanga! Na pekoni awe, Nzapa ayeke zi ande Satan Zabolo, lo so a kanga lo lani teti ngu saki oko, ti ga ti tara azo ti ndangba ni. Lo yeke gi ande ti gboto azo yongoro na Jéhovah, me ala so adö sese na lo ayeke ngbâ na fini lakue lakue na ndo ti sese.​—Diko Ésaïe 25:8; Apocalypse 20:7-9.

4. Mbeni lango ti ngbanga nde wa ayeke ga na aye ti nzoni na azo?

Bible asara nga tënë ti mbeni “lango ti ngbanga” ti fa na ye so ayeke si ande so na lege ni a yeke futi dunia so. Lango ti ngbanga so ayeke si gi gbagburu tongaso tongana ti kota ngu ti ngoi ti Noé so afuti lani azo ti sioni kue. Ti lango ti ngbanga so nga, so ayeke pusu nduru nduru, a yeke futi ande “azo so akpe Nzapa pëpe”, nga ayeke zi lege na mbeni fini dunia so “mbilimbili ayeke duti ande na yâ ni.”​—Diko 2 Pierre 3:6, 7, 13.

Ti hinga tënë mingi na ndo ni, bâ lembeti 213-215 ti buku so ge.

[Foto na lembeti 16]

“LÂ TI NGBANGA,” GUSTAVE DORÉ, 1832-1883

[Ndo so a mû foto ni dä]

Dessin so Doré asara