Peut-être mo hunda tere ti mo, mo tene: ‘Tongana Nzapa ahinga ye kue, même apensé ti mbi nga na abezoin ti mbi, nda ti sambelango lo encore ni ayeke so wa?’ Mo yeke na raison ti hunda ndo tongaso, ngbanga ti so Jésus wani atene so ‘Nzapa ahinga aye so zo ayeke na bezoin ni kozoni si lo hunda ni na lo.’ (Matthieu 6:8). Gbia David nga kue atene lani: “Même tënë so ade na yanga ti mbi, O L’Éternel, mo hinga tënë so kue.” (Psaume 139:4). Ka ngbanga ti nyen a yeke nzoni e sambela Nzapa? Ti kiri tënë na ni, zia e bâ ye so Bible atene na ndo ti asambela. *

Atâa so Bible atene Jéhovah * Nzapa ahinga aye kue, a tene nga so lo yeke nga na asango kue na ndo ti awakua ti lo, me lo ngbâ gi ge pëpe (Psaume 139:6; aRomain 11:33). Mongoli ti Nzapa ayeke pëpe tongana ti mbeni ordinateur so ayeke bata ti lo gi asango ti azo batango awe. Atâa asango kue so ayeke na yâ ti mongoli ti Nzapa, lo ye nga mingi ti hinga aye so ayeke na gbe ti bê ti e ndali ti so lo ye si e ga nduru na lo (Psaume 139:23, 24; Jacques 4:8). Ndani la Jésus awa lani adisciple ti lo ti sambela, atâa so Babâ ti lo ahinga aye so e yeke na bezoin ni awe (Matthieu 6:6-8). Tongana e yeke fa lakue apensé ti e na Nzapa, e yeke ga nga nduru na lo mingi.

Na ambeni ngoi, a lingbi ti duti ngangu na e ti hinga mbilimbili tënë so e lingbi ti tene na yâ ti sambela ti e. Na amara ngoi tongaso, Nzapa alingbi ti bâ ye so ayeke na yâ ti bê ti e kâ. Nga teti so lo hinga dutingo ti e tâ nzoni mingi, lo lingbi ti mû na e ye so e yeke na bezoin ni (aRomain 8:26, 27; aÉphésien 3:20). Tongana e bâ so Nzapa amû maboko na e na yâ ti gigi ti e wani, atâa na mbeni lege so zo abâ ni kue ape, a yeke sara si e ga nduru mingi na lo.

Bible adë bê ti e atene so Nzapa ti Ngangu Ahon Kue ayeke kiri tënë na asambela ti awakua ti lo so ayeke be-ta-zo na lo. Me, Bible ni afa nga na e araison so ndali ni Nzapa ayeke mä ambeni sambela ape. Na tapande, lani na ngoi so sarango ye ti sioni amû ndo na Israël ti ândö, Nzapa atokua prophète ti lo Ésaïe ti tene na azo ni, lo tene: “Biani, tongana i sambela lege mingi mingi, fade mbi mä pëpe; maboko ti i asi na mênë.” (Ésaïe 1:15). A yeke polele so azo so akpe andia ti Nzapa ape wala ala sambela na nzoni bibe ape, Nzapa ayeke mä sambela ti ala ni ape.—aProverbe 28:9; Jacques 4:3.

Na mbeni mbage, Bible atene: “Atâa ye wa e hunda, tongana a gue oko na ye so bê ti lo aye, lo yeke mä e.” (1 Jean 5:14). Tënë so aye ti fa so, tongana awakua ti Nzapa asambela lo, lo yeke kiri tënë hio na asambela ti ala ni oko na oko kue? A yeke tongaso ape. Bâ tapande ti bazengele Paul, so lani lo voro yanga na Nzapa lege ota ti zi “mbeni kî na yâ ti tere” ti lo (2 aCorinthien 12:7, 8). Peut-être kobela ti Paul ni lani ayeke ti lê, na a doit ti sara lo nzoni ape. Nzapa amû na lo lani ngangu ti zi kobela ti azo nga ti zingo même akuâ. Me so kue, lo wani lo bâ pasi na kobela (Kusala 19:11, 12; 20:9, 10). Atâa so Nzapa akiri tënë pëpe na sambela ti Paul ni na fason ti so lo Paul ni lo ye, Paul akiri singila na Nzapa ndali ti ngangu so lo mû na lo.—2 aCorinthien 12:9, 10.

Tâ tënë, na yâ ti Bible, Nzapa asara ândö amiracle ti fa so lo mä sambela ti azo ti lo (2 aGbia 20:1-7). Me amara ti ye ni so asi lani mingi ape. Ambeni wakua ti Nzapa abâ ti ala lani atene Nzapa akiri tënë na asambela ti ala ape, na ala gi li ti ala na ni gbä. Na tapande, Gbia David atene na Jéhovah: “O L’Éternel, Juska lâ nyen? Fade mo girisa mbi teti lakue?” (Psaume 13:2). Me, tongana kota wakua ti Nzapa so adabe ti lo na ngoi so Jéhovah azi lo na yâ ti aye mingi, na yâ ti oko sambela ni so, lo tene mbeni tënë ti fa mabe ti lo na mbage ti Nzapa, lo tene: “Mbi zia bê ti mbi na nzobe ti Mo.” (Psaume 13:6). Legeoko tongana ti David, peut-être a hunda na awakua ti Nzapa laso ti kanga bê, ti ngbâ lakue ti sambela juska ala bâ so Nzapa akiri tënë na asambela ti ala ni.—aRomain 12:12.

Nzapa ayeke mû na e aye so e yeke tâ na bezoin ni.

Anzoni babâ na mama ayeke mû gi lakue pëpe na amolenge ti ala ye kue so amolenge ni ahunda. Nga ala yeke mû ni gi lakue pëpe na ngoi so amolenge ni ahunda ni. Raison ni ayeke dä. Legeoko nga, a lingbi ti si so Nzapa akiri tënë pëpe na sambela ti e alingbi na fason ti so e ye wala alingbi na ngoi so e ku na ni. Me zia e hinga so legeoko tongana ti babâ so aye amolenge ti lo, Nzapa ayeke mû na e aye so e yeke tâ na bezoin ni na ngoi so alingbi na ni nga na mbeni lege so ayeke nzoni.—Luc 11:11-13.

Nzapa alingbi ti kiri tënë na mbeni lege so zo ayeke bâ ape.

Ka tongana e sambela ndali ti mbeni kpale ti e so aye ti hunzi ape? E yeke tene ande e tene, so Jéhovah asara mbeni miracle na e ape so, awe la? Nde na so, a yeke nzoni e gi ti bâ wala Nzapa asara ti lo déjà mbeni ye awe ti mû maboko na e, me e bâ ti e ni ape. Na tapande, peut-être mbeni kamarade amû fade maboko na e tâ gi na ngoi so alingbi na ni (aProverbe 17:17). Hinga ape Jéhovah la apusu kamarade ti e ni so. Me nga, Nzapa alingbi ti kiri tënë na sambela ti e na lege ti atënë so ayeke na yâ ti Bible, so ayeke mû na e ndara ti hon ndo ti kpale so e wara.—2 Timothée 3:16, 17.

Ahon ti zi gi akpale ti awakua ti lo, mingi ni ka, Nzapa ayeke mû na ala ngangu so ala bezoin ni ti hon ndo ti akpale ti ala ni (2 aCorinthien 4:7). Na tapande, lani na ngoi so Jésus avoro yanga na Babâ ti lo ti zi lo na yâ ti mbeni sioni ye so alingbi ti bi zonga na ndo ti iri ti Nzapa, Jéhovah atokua mbeni ange ti mû ngangu na Molenge ti lo ni (Luc 22:42, 43). Legeoko nga, Nzapa alingbi ti tokua mbeni kota kamarade ti e ti ga ti tene ambeni tënë ti kpengba e tâ gi na ngoi so e yeke na bezoin ni (aProverbe 12:25). Na mara ti ye tongaso, a yeke nzoni lê ti e akpengba ti hinga so Nzapa la ayeke na peko ti wango ni so.

Nzapa alingbi ti kiri tënë na ngoi so lo bâ alingbi na ni.

Bible atene so Nzapa ti Ngangu Ahon Kue ayeke mû ye na azo so asara tere ti ala kete gi “tongana ngoi ni alingbi”. (1 Pierre 5:6). Ye so aye ti fa na e so tongana e bâ so Nzapa akiri tënë na sambela ti e hio ape, a ye ti tene ape so Jéhovah ayeke pensé na e ape, ên-ën. Nde na so, teti so Nzapa ahinga ye mingi nga lo hinga ye so ayeke nzoni ndali ti e, lo yeke bâ wala a yeke nzoni lo kiri tënë na sambela ti e ni wala pëpe.

Bâ tapande so: Tara ti bâ so mbeni kete molenge ti mo ahunda na mo ti vo na lo vélo. Mo yeke vo gi ni hio tongaso na lo? Peut-être tongana mo bâ so ngu ti lo ade ti lingbi ti kpe na vélo ape, hinga ape mo yeke ku encore si. Mo yeke vo ni na lo gi na ngoi so mo bâ so lo lingbi awe tongaso si lo wara sioni ape. Nzapa nga kue ayeke mû “ye so bê ti [e] aye” gi na ngoi so lo bâ alingbi na ni, nga tongana e ngbâ ti hunda ni na lo.—Psaume 37:4.

Bible awa atâ Chrétien ti bata lakue na li ti ala so sambela ayeke kota ye mingi. Peut-être ambeni zo ayeke tene, ‘Ka mbi yeke sambela gbä so.’ Tâ tënë, tongana e yeke bâ pasi na mbeni kpale so angbâ gi ngbango wala ambeni zo asara ye na e na lege ni ape, e lingbi ti bâ so a yeke ngangu na e ti ku Nzapa. Me, a yeke nzoni e girisa pëpe tënë so Jésus afa na ndo ti tënë ti ngbango lakue ti sambela.

 Jésus amû lani tapande ti mbeni womua so ye ti lo ayeke dä ape. Womua ni so ague lege mingi na gbe ti mbeni juge ti mbana ti tene a fâ ngbanga ti lo na lege ni (Luc 18:1-3). Atâa so juge ni ake kozo ti mû maboko na lo, na nda ni lo tene na bê ti lo, lo tene: “Mbi yeke bâ si a fâ yâ ti ngbanga ni nzoni na lo, tongaso si lo ngbâ ti ga lakue pëpe ti son li ti mbi si mbi woko kue.” (Luc 18:4, 5). Na yanga ti kodoro so a sû na tënë so ândö, juge ni abâ tënë ti womua so tongaso si womua ni “apika gbe ti lê ti lo juge ni ape,” so ti tene “lo buba iri ti lo ape.” * A singana juge ti mbana so ayeda ti mû maboko na senge womua so si iri ti lo abuba ape, si Nzapa, so lo yeke sara ti lo ye mbilimbili, ayeke sara ye na lege ni na azo so “ayeke toto na lo bï na lâ” ape? Jésus atene so Nzapa ayeke “bâ si a fâ ngbanga nzoni na ala nga hio.”—Luc 18:6-8.

Tongana a si so e sambela Nzapa ti tene lo mû maboko na e, me e bâ ye ti pekoni ape, a yeke nzoni e nze ape. Tongana e ngbâ lakue ti sambela, e yeke fa so e ye biani ti tene Nzapa amû maboko na e na yâ ti gigi ti e. E yeke hinga nga ngoi wa la Nzapa akiri tënë na sambela ti e, na ye so asara si e ga nduru na lo. Biani, tongana e sambela Jéhovah alingbi na ye so lo ye, na e ngbâ lakue ti sara ni na mabe, lo yeke kiri tënë na sambela ti e ni.—Luc 11:9.