A dü mbi na Bakou, Azerbaïdjan. A dü e use, na mbi la mbi yeke use molenge ni. Babâ ti mbi ayeke Musulman na mama ti mbi ayeke Juif. Ababâ na mama ti mbi aye tere mingi nga ala yeda na atënë ti mabe ti ala so ayeke nde nde so. Mama ayeke mû ka maboko na babâ na ngoi so lo mû Ramandan, nga babâ kue ayeke mû ka maboko na mama na ngoi so lo yeke sara matanga ti Pâque. Na yanga-da ti e, e yeke na Coran, Torah nga na Bible.

Mbi bâ tere ti mbi lani tongana mbeni Musulman. Atâa so mbi hinga lani mbi tene Nzapa ayeke dä, ambeni ye asara si li ti mbi aga kirikiri. Mbi yeke hunda lani tere ti mbi, mbi tene, ‘Nzapa asara azo ngbanga ti nyen? Nga ndali ti nyen la a yeke sara pasi na azo, na yâ ti gigi ti ala, lakue lakue na yâ ti enfer?’ Teti so azo atene so aye kue so asi ayeke ye so Nzapa aye la, mbi hunda tere ti mbi, mbi tene, ‘Nzapa la ayeke tâ biani na gunda ti kpale ti azo? Nga a nzere na lo ti bâ ala na bango pasi?’

Na ngoi so mbi wara ngu 12, mbi komanse ti sambela namaz, so ayeke sambela so aMusulman ayeke tene ka ni fani oku na yâ ti lango oko. Na ngoi ni so, babâ atokua mbi na yaya ti mbi ti wali na ekole ti aJuif. Na popo ti aye so e manda lani, e manda Torah, so ayeke akozo buku oku so Moïse asû ni, nga e manda yanga ti Hébreu. Lakue, kozo ti tene e komanse ekole ni, e yeke sambela alingbi na ngobo ti aJuif. Me, na ndapre, mbi yeke sambela namaz na yanga-da, na tongana mbi gue na ekole kâ, mbi yeke tene sambela ti aJuif.

Mbi ye tâ gi ti wara kiringo tënë na ahunda ti mbi so. Mbi yeke hunda ka akota zo ti Nzapa ti aJuif ti ekole ni, mbi tene: “Nzapa asara azo ngbanga ti nyen? Nzapa abâ babâ ti mbi, so ayeke musulman so, tongana nyen? Tongana lo yeke nzoni zo, ka ngbanga ti nyen la a bâ lo tongana mbeni sioni zo? Nzapa asara lo ngbanga ti nyen?” Akiringo tënë so mbi wara agbu ngu ape nga zo ahinga li ti lo na ni ape.

Na ngu 2002, mbeni ye ayengi mabe ti mbi na Nzapa. Na ngoi so e gue e sara kodoro na Allemagne, gi yenga oko na pekoni, kobela ti tension abi babâ ti mbi nga lo lï na yâ ti coma. Depuis la mbi yeke sambela ka ndali ti seni ti afami ti mbi nga na nzoni duti ti ala. Teti  so mbi hinga biani so Nzapa ti ngangu ahon kue ayeke na ngangu na ndo ti fini nga na kuâ, mbi toto na lo lakue ndali ti seni ti babâ ti mbi ni. Mbi pensé na yâ ti bê ti mbi, mbi tene: ‘Ti tene Nzapa akiri tënë na sambela ti mbeni kete molenge-wali, a yeke ngangu na lo ape.’ Na mbi lani, lo yeke mä sambela ti mbi. Mawa ni ayeke so, babâ ti mbi ni akui.

Tongana mbi bâ so Nzapa akpa zo so ayeke bâ mawa ti zo ape, a son mbi mingi. Mbi tene, ‘Wala mbi la mbi sambela na lege ni ape, wala Nzapa ni la ayeke dä ape?’ Li ti mbi akpe kue nga mbi yeke même na ngangu ti sambela namaz ni encore ape. Atanga ti bungbi ti vorongo Nzapa ni kue anzere na mbi ape, a sara si mbi tene so Nzapa ayeke dä ape.

Nze omene na pekoni, aTémoin ti Jéhovah aga na yanga-da ti e. Teti so e yeke lani na sioni bango ndo na ndo ti aChrétien, mbi na ita ti mbi ti wali e ye lani ti fa na ala so bungbi ti vorongo ti ala ayeke na lege ni ape. E hunda ala, e tene: “Ngbanga ti nyen la aChrétien ayeke voro Jésus, croix, Marie nga na ambeni yanda, so acommandement bale-oko ake ni so?” Na lege ti Bible, aTémoin so afa na e aye so afa biani so a ke na atâ Chrétien ti voro yanda nga so a yeke nzoni e sambela gi oko tâ Nzapa. Ye so adö bê ti mbi mingi.

Na pekoni e kiri e hunda ala, e tene: “Ka ti tënë ti Trinité ayeke tongana nyen? Tongana Jésus ayeke Nzapa, a sara tongana nyen la si lo ga na sese ge nga si azo afâ lo lani so?” Ge nga kue, ala kiri tënë na e gi na lege ti Bible nga ala fa so Jésus ayeke Nzapa ape, na lo lingbi tere nga na Nzapa ape. A-Témoin ni afa na e so a yeke ndali ni la si ala nga kue amä na bê pëpe na tënë ti Trinité. Ye so adö bê ti mbi mingi, si mbi tene, ‘A-Chrétien ti so ni so ayeke bizarre mingi.’

Me, lakue mbi ye ti hinga ndani so azo ayeke kui nga ndani so Nzapa azia si azo ayeke bâ pasi. A-Témoin ni afa na mbi buku Hingango Ye So Ague na Fini ti Lakue Lakue, * so na yâ ni, a yeke wara achapitre so akiri tënë na ahundango ndo ti mbi ni. Hio, ala komanse ti manda Bible na mbi.

Na angoi ti mandango ye ni oko na oko, mbi wara atâ kiringo tënë na ahunda ti mbi ni na yâ ti Bible. Mbi ga ti hinga so iri ti Nzapa ayeke Jéhovah (Genèse 22:14). Kota ye so ahinga na lo ayeke ndoye (1 Jean 4:8). Lo créé azo ndali ti so lo ye si azo nga kue ahinga nzerengo ti gigi. Mbi ga ti hinga nga so atâa so Nzapa azia lege na sioni ye ti si, lo ke ni nga lo yeke ga ande ti zi ni biaku biaku. Mbi manda so kengo yanga ti Adam na Ève la aga na sioni ye na ndo ti azo (aRomain 5:12). Na popo ti asioni ye ni so, a yeke wara kuâ so afâ azo so e ye ala mingi, tongana ti babâ ti mbi so. Me, Nzapa ayeke zi amara ti kpale ni so na ngoi so lo yeke ga na mbeni fini dunia, so a yeke zingo ande azo so akui ti duti na yâ ni.—Kusala 24:15.

Atâ tënë ti Bible akiri tënë na ahunda ti mbi. Ye so asara si mbi kiri mbi mä na bê na Nzapa. Mbi ga ti hinga aTémoin ti Jéhovah nzoni, nga mbi bâ so ala yeke na yâ ti mbeni sewa ti aita ti dunia mobimba. Beoko nga na ndoye so ayeke na popo ti ala apika bê ti mbi mingi (Jean 13:34, 35). Aye so mbi manda na ndo ti Jéhovah apusu mbi ti yeda ti sara na lo, tongaso mbi mû desizion ti ga Témoin ti Jéhovah. Mbi wara batême na lango 8 ti janvier ngu 2005.

Atâ tënë ti yâ ti Bible achangé bango ndo ti mbi na ndo ti fini tâ nzoni mingi. Afango ye so mbi wara na yâ ti Mbeti ti Nzapa aga na mbi siriri ti bê. Beku so mbi yeke na ni ti kiri ti bâ babâ ti mbi, na ngoi so a yeke zingo ande azo so akui, a ga na mbi kota ngia nga na dengo bê.—Jean 5:28, 29.

Mbi na koli ti mbi Jonathan e sara mariage a sara angu omene awe. Lo yeke mbeni koli so ayeke na mbeto ti Nzapa, na e yeke na ngia na yâ ti mariage ti e. E manda so tâ tënë na ndo ti Nzapa ayeke polele nga akpengba ape, na so a yeke mbeni mosoro so ngere ni ayeke kota mingi. Ni la, e ye mingi ti fa tënë ti mabe ti e nga na pendere beku ti e so na azo. Laso, mbi hinga so aTémoin ti Jéhovah ayeke pëpe azo so ayeke “bizarre” me ala yeke atâ Chrétien.