Ngbene ye giriri la azo ayeke pensé so, tongana fade tere ti e ason ape nga e ga mbakoro lâ oko ape, ka fini ayeke duti fade pendere mingi. Mawa ni ayeke so, e kue e yeke kui. Atënë ti Job so na nduzu ge so, so lo sû ni a sara angu saki ota tongaso awe, angbâ lakue tâ tënë na ngoi ti e laso.

Azo kue na ndo ti sese aye gi ti ngbâ na fini lakue lakue. Bible atene na e so Nzapa azia na yâ ti bê ti azo nzara ti ngbâ na fini lakue lakue nga ti hinga aye kue so andu ni (Zo-ti-fa-tene 3:11). Na ndo ti tënë so, mo pensé a yeke duti ande na lege ni ti tene Nzapa, so aye e azo, azia nzara ti mbeni ye na yâ ti bê ti e, me so lo hinga so e lingbi ti wara ye ni so lâ oko ape? Tongana kiringo tënë ti mo ayeke Ên-ën, mo yeke na raison. Mbeti ti Nzapa atene so kuâ ayeke mbeni wato, nga lo mû zendo so “fade a yeke futi lo biaku biaku.”—1 aCorinthien 15:26.

Biani, kuâ ayeke mbeni wato. Mbeni vrai zo alingbi ti ye lo ape. Tongana mbeni sioni ye ayeke ga, e yeke kpe, e yeke honde tere ti e wala e yeke mû loro. Tongana tere ti e ason, e yeke gi alege kue ti soanyê tere ti e. E yeke sara kue ti kpe aye so alingbi ti sara si e kui.

Eskê mbeni raison ayeke dä ti mä na bê so a yeke futi ande ngbene wato so biaku biaku? En, a yeke dä. Jéhovah, Nzapa so asara aye kue, aleke lani azo pëpe ti tene ala duti na fini gi kete nga si na pekoni ala kui. Tënë ti kuâ ti azo ayeke pëpe na popo ti aye so Nzapa aye lani ti sara. Lo leke lani ti tene azo aduti na fini lakue lakue na ndo ti sese, na ye so lo leke ni so, lo yeke sara ni ande.—Ésaïe 55:11.

Ka tongana nyen la a yeke futi ande kuâ ni biaku biaku? Ândö, azo agi na alege nde nde kue ti wara yorö ti kuâ, me ala wara ni ape. Laso nga kue, ala ngbâ ti gi ni. Awandara aleke ayorö nga na avaccin so akiri na ngangu ti ambeni kobela na peko. Ala gi nga ye na yâ ti acellule ti aye kue so ayeke na fini. Laso, na ambeni ndo, azo ayeke ngbâ na fini aninga ahon azo so ayeke lani na fini na yâ ti angu ngbangbo oko so ahon. Atâa so kue, kuâ angbâ lakue ti mû azo. Legeoko tongana ti so Bible atene, azo “kue akiri na pupu-sese”.—Zo-ti-fa-tene 3:20.

Nzoni sango ni ayeke so, e bezoin pëpe ti zia bê ti e na awandara ti tene ala leke na e kpale ti tënë ti kuâ so aye ti hunzi ape so. Jéhovah Nzapa aleke aye kue awe ti tene a sö e na kuâ, na aye ni so Nzapa aleke so angoro kue gi na tere ti Jésus Christ.