Ti londo na Matthieu ti si na Apocalypse, a fa gbâ ti aversê na ndo ti aturugu ti kota kamba ti Rome. Turugu so abâ ndo lani na ndo ti tënë ti fango Jésus ayeke mbeni turugu ti kota kamba legeoko tongana Corneille, kozo Gentil so aga Chrétien. Turugu so ayeke luti lani na ngoi so a yeke pika Paul na zaza nga Julius so abâ ndo na ndo ti Paul si a gue na lo na Rome, ala use kue ayeke aturugu ti kota kamba.—Marc 15:39; Kusala 10:1; 22:25; 27:1.

Mingi ni ka, mbeni turugu ti kota kamba ayeke komande na ndo ti aturugu so wungo ti ala ayeke na popo ti 50 ti si na 100 tongaso. Kua ti lo ayeke ti fa ye na ala, ti bâ lege ti abongo ti ala nga na aye ti kua ti ala nga ti komande ala na ngoi so a tokua ala ti sara akua.

Turugu ti kota kamba ayeke lani kamba ti kua so ahon atanga ni kue so mbeni senge turugu apeut ti wara ni. Ala so ayeke sara lani kua ni so ayeke azo so aninga na yâ ti kua ti turugu nga so a hinga ti mû li ni nzoni. A yeke ala la asara si aturugu ti Rome ayeke lani angangu turugu nga ordre ayeke na popo ti ala. Mbeni mbeti atene so aturugu ti kota kamba ni “ayeke ka lani na kode mingi nga ala la ayeke wara asango mingi.”

Nde na atatara ti laso, a sara atatara ti ândö na mbeni ye so akpengba na so a kpaka tere ni pendere si aza zango. Mingi ni, a yeke ye tongana bronze, me a peut nga ti duti cuivre, argent, lor wala a mélangé lor na argent use kue. Kozo ndo so a sara tënë ti atatara dä na yâ ti Bible ayeke na ngoi so a ngbâ lani ti leke tabernacle, so ayeke kozo ndo so amolenge ti Israël ayeke voro lani Nzapa dä. Awali amû lani atatara, tongana offrande, ti leke na kota sembe ti nzoni-kue nga na ye ti ziango ni na ndo ni so a sara ni na cuivre (Exode 38:8). Âmanke, a tö atatara ni aga ngu awe si a sara na kua ni so.

Awandara ti gingo aye na gbe ti sese awara lani atatara na Israël nga na akodoro so ayeke na tere ti Israël ni, mingi ni, a wara atatara ni so legeoko na abijou nga na ambeni ye nde ti baba ti awali. Atatara ni so ayeke lani ronde ronde na aye ti baba so a zia na tere ni ayeke na keke, wen wala na pembe ti doli. Mingi ni, a yeke leke atatara ni ti tene akpa forme ti awali. Me, tongana lê ti atatara ni aza pendere ape, a yeke zia aye ti baba na tere ni ape.

Atatara ti ândö aza alingbi na atatara ti laso ape. Ye so afa ngbanga ti nyen la Paul amû lani tapande so na ngoi so lo tene lani, lo tene: “Fadeso, e yeke bâ ye na tatara ti wen, me ye ni asigigi polele pëpe.”—1 aCorinthien 13:12.