Mbi kono lani na Alicante, mbeni gbata so ayeke na mbage ti Est ti Espagne na tere ti Kota Ngu-ingo. Mango tere kete tongaso ayeke lani na yâ ti sewa ti mbi ape, ye so asara si mbi yeke duti ka mingi gi na yanga ti lege. Na tere ti da ti mbi, mbeni place ti garage ayeke dä. Mbi sara kamarade na José María, so asara kua na ndo ni so. Lo yeke lani bien mingi nga lo yeke pensé na mbi mingi, na a yeke ye so sewa ti mbi asara ka ni ape. Na ngoi ti akpale, lo yeke tongana mbeni tâ ita, mbeni tâ kamarade, atâa so lo hon mbi na ngu 20 tongaso.

A-Témoin ti Jéhovah akomanse lani ti manda Bible na José María awe. Mbi bâ so lo ye tënë ti Nzapa ngangu, nga lakue lo yeke causé ka na mbi na ndo ni. Mbi yeke mä ka atënë ti lo ni nzoni mingi, me ti vrai ni, atënë ti lo ni agbu bê ti mbi ape. Teti so mbi ngbâ maseka, mbi yeke na aye mingi ti sara. Andâ gigi ti mbi ayeke gue ti changé la mbi hinga ape so.

Mbi ye ka ti sara tënë mingi na ndo ti accident ni so ape. Me, ye so mbi peut ti tene ayeke so mbi yeke lani buba zo nga mbi sara ye gi tongaso sân ti gbu li. Gi na yâ ti lango oko, gigi ti mbi kue achangé. Tâ mbi so mbi yeke lani mbeni maseka so ayeke na ngangu mingi so, gi gbagburu tongaso, mbi paralysé kue nga mbi yeke gi place oko na yâ ti hôpital. A yeke lani ngangu na mbi mingi ti yeda na dutingo ti mbi ni so. Mbi yeke hunda lani tere ti mbi, mbi tene, ‘Mbi ngbâ na fini ngbanga ti nyen?’

José María aga abâ mbi, na hio, lo leke ti tene aTémoin ti Jéhovah, so ayeke na yâ ti congrégation ti ndo ni so, aga asara vizite na mbi na hôpital ni. Ala yeke ga ka lakue ti bâ mbi, na ye so andu lani bê ti mbi mingi. Gi na peko ti so a zi mbi na chambre ti réanimation ni awe, mbi komanse ti manda Bible. Mandango ye ni so amû lege na mbi ti hinga ndani so azo ayeke bâ pasi na ala yeke kui, nga ngbanga ti nyen la Nzapa azia lege na aye ti sioni ti si. Mbi hinga nga ye na ndo ti azendo ti Nzapa teti kekereke, so sese ayeke si singo ande na azo so siokpari ayeke na tere ti ala ape nga so mbeni zo oko ayeke tene ande pëpe: “Mbi yeke na kobela.” (Ésaïe 33:24). Kozo ti tene, na yâ ti gigi ti mbi, mbi wara mbeni tâ pendere beku la.

Na ngoi so mbi sigigi na hôpital, mbi gue na li ni hio na yâ ti mandango Bible ti mbi ni. Mbi yeke na mbeni puse ti azo ti bubango gere so ayeke tâ nde mingi, na ni la a-aidé mbi même ti gue na ambeni bungbi ti aTémoin ti Jéhovah nga ti mû mbage na kua ti fango tënë ti Nzapa legeoko na ala. Na lango 5 ti novembre ngu 1988, na ngoi so mbi yeke na ngu 20, a batize mbi na yâ ti mbeni baignoire so ayeke nde mingi. Jéhovah Nzapa asara si mbi wara mbeni nzoni bango ndo na ndo ti gigi. Me, nyen la mbi lingbi ti sara ti fa singila ti mbi na lo?

Mbi leke na bê ti mbi ti zia si duti ti mbi ni akanga lege na mbi pëpe ti sara ye kue so mbi peut ti sara ti voro Jéhovah. Mbi ye ti gue na li ni (1 Timothée 4:15). Kozoni kue, a yeke lani kete ye na mbi ape, ndali ti so sewa ti mbi ayeke sara ye ti ngangu na mbi ndali ti so mbi sara mbeni nzapa nde. Me, mbi yeke na amba ti mbi Chrétien, so ala ga tongana aita ti mbi. Ala yeke sara kue ti tene mbi manke bungbi lâ oko ape nga ti tene mbi mû mbage na kua ti fango tënë ti Nzapa.

Me tongana angoi ayeke hon, a ga ti bâ so mbi yeke tâ na bezoin ti tene a soigné mbi lakue. Mbi mû ngoi ti gi mbeni nzoni hôpital so ayeke bâ lege ti azo so mbeni ye ti tere ti ala abuba, na mbi wara ni na gbata ti Valencia, so ayo akilomètre 160 na mbage ti nord ti Alicante. Hôpital ni so aga da ti lango ti mbi.

Atâa so mbi yeke gi na gbogbo, mbi leke na bê ti mbi ti ngbâ ti voro Jéhovah. Mbi mû nginza so État ayeke mû ka na azo so ayeke na kota kpale ti seni mbi vo na ordinateur, na a zia ni nduru na gbogbo ti mbi. Mbi vo nga téléphone. Lakue na ndapre, zo so ayeke ga ti soigné mbi ayeke allumé ordinateur ti mbi nga na téléphone ni kue. Ti sara kua na ordinateur ni, mbi yeke sara kua na lege ti mbeni ye, so ayeke sara kua tongana souris ti ordinateur, so mbi yeke pete ni na gbe ti yanga ti mbi. Mbi yeke nga na mbeni kete keke ni so mbi yeke te ni na yanga ti mbi, na so ayeke mû lege na mbi ti sara na mbeti na ndo ti ordinateur ni nga ti pete na anumero na ndo ti téléphone ni.

Ordinateur so amû maboko na mbi tongana nyen? Kozoni kue, a mû lege na mbi ti gue na ndo ti site Internet jw.org nga ti gue na ndo ti BIBLIOTHÈQUE TI Watchtower NA NDO TI INTERNET. Mo bâ mo tene a sara apendere gbakuru ti kua so ndali ti mbi! Lakue mbi yeke mû angoi mingi ti manda ye nga ti sara arecherche na yâ ti ambeti ti e, tongaso si mbi lingbi ti hinga aye mingi na ndo ti Nzapa nga na apendere sarango ye ti lo. Nga lakue, tongana a si so mbi bâ so mbi yeke gi mbi oko wala mbi découragé kete, mbi hinga so mbi peut ti wara lakue ambeni ye so ayeke na ndo ti site ti e so apeut ti mû ngangu na mbi mingi.

Ordinateur ti mbi so amû nga lege na mbi ti mä aye so a yeke fa na bungbi so a yeke sara na congrégation nga ti mû mbage dä. Na sarango kua na ni, mbi peut ti kiri tënë, ti sambela, ti fa tënë ti Nzapa nga même ti diko Tour ti Ba Ndo, tongana a tene na mbi ti sara ni. Atâa so mbi lingbi ti gue na da ti bungbi ape, mbi bâ tere ti mbi tongana mbeni membre ti congrégation ti ndo ni so.

Téléphone nga na ordinateur so amû nga maboko na mbi ti mû mbage na kua ti fango tënë ti Nzapa. Tâ tënë, mbi lingbi pëpe ti gue da na da tongana ti so mingi ti aTémoin ti Jéhovah ayeke sara ka. Me, so kue akanga lege na mbi ape. Sarango kua na agbakuru so asara si mbi peut ti sara tënë ti Nzapa na ambeni zo. Ni la, teti so mbi ye mingi ti fa tënë ti Nzapa na téléphone, a-ancien ti congrégation ti mbi ahunda même na mbi ti mû li ni na yâ ti kapa ti fango tënë na téléphone. A leke kapa ni so ndali ti amembre ti congrégation so apeut ti sigigi na yâ ti da ti ala ape, ndali ti so ala yeke na kobela.

 Me, gigi ti mbi angoro gi pëpe na tere ti ordinateur nga na téléphone ni. Lakue, akamarade ti mbi ayeke ga ti bâ mbi. Ala yeke ga na asewa ti ala nga na azo so ala yeke manda Bible na ala. Fani mingi, ala yeke hunda même na mbi ti mû li ni na ngoi ti mandango ye ni. Na ambeni ngoi ni nde, asewa ayeke ga ti bâ mbi nga ala yeke hunda na mbi ti tene mbi na ala e voro Nzapa na sewa. Mbi ye ka mingi ti tene amolenge aduti na tere ti mbi na ndo ti gbogbo ni nga ala fa na mbi ngbanga ti nyen la ala ye Jéhovah.

A yeke nzere ka na mbi mingi ti tene gbâ ti azo aga abâ mbi. Chambre ti mbi ayeke mbeni place so asi singo na akamarade ti mbi so alango nduru na ndo so mbi yeke dä nga na ala so alango ayo. Mara ti yengo tere ni so apika bê ti azo so ayeke soigné mbi na yâ ti hôpital ni so. Lakue, mbi yeke kiri singila na Jéhovah ndali ti so lo sara si mbi yeke na yâ ti mbeni pendere sewa ti aita tongaso.

Lakue tongana mbeni zo abara mbi si lo hunda mbi lo tene “Tongana nyen?”, mbi yeke tene “Mbi la mbi ngbâ ti tiri so!” Tâ tënë, mbi hinga so a yeke gi mbi oko la mbi yeke na yâ ti tiri ni so ape. Me, atâa dutingo ti ala yeke tongana nyen, aChrétien kue la ayeke tiri “pendere bira ti mabe”. (1 Timothée 6:12). Nyen la amû maboko na mbi ti tiri bira so teti angu mingi so? A yeke sambela so mbi yeke sara ni lakue ti kiri singila na Jéhovah ndali ti so lo mû na mbi mbeni nzoni beku. Na ndo ni, mbi yeke sara ye kue so mbi peut ti sara ti duti na aye mingi ti sara na yâ ti kua ti Nzapa, na ziango lê ti mbi gi na ndo ti beku so ayeke na devant ti mbi.

Mbi yeke pensé ka mingi na ndo ti Paradis nga na ngia so mbi yeke wara ande tongana mbi yeke kiri ti kpe loro nga ti huru na nduzu. Na ambeni ngoi, mbi na kamarade ti mbi, José María, so ayeke bâ pasi na kobela ti polio, e yeke sara tënë ti ngia na popo ti e na ndo ti tënë ti sarango mbeni course ti loro. Mbi hunda lo, mbi tene: “Zo wa la ayeke sö ande benda?” Lo tene: “Ti hinga zo ni so la ayeke kota ye ape. Me, kota ye ni ayeke ti tene mbi na mo e duti ande na yâ ti Paradis ni kâ awe si e peut ti kpe loro ni so.”

A yeke lani ngangu na mbi mingi ti hon ndo ti kpale ti mbi ni so. Mbi hinga so ye ti buba la mbi sara lani na ngoi so mbi ngbâ maseka so, ni la si mbi wara sioni mingi na pekoni. Me, mbi kiri singila mingi na Jéhovah so lo zia mbi ape. Lo mû na mbi aye mingi, na tapande, kota sewa na lege ti yingo, nzara ti ngbâ na fini, ngia so mbi yeke wara na mungo maboko na ambeni zo nga na pendere beku ti gigi ti kekereke. Na nduru tënë mbi peut ti tene so, Jéhovah amû tâ na mbi gbâ ti aye ahon ti so mbi doit fade ti wara.