මතෙව් 17:1-27
17 දවස් හයකට පස්සේ යේසුස් පේතෘස්වයි, යාකොබ්වයි, යාකොබ්ගේ සහෝදරයා වුණ යොහන්වයි විතරක් එක්කගෙන උස කන්දකට ගියා.+
2 එහෙදී එයාලා ඉස්සරහා ඔහුගේ පෙනුම වෙනස් වුණා. ඔහුගේ මූණ සූර්යයා වගේ බැබළෙන්නත් ඔහුගේ ඇඳුම්වලින් දීප්තිමත්* එළියක් විහිදෙන්නත් පටන්ගත්තා.+
3 එතකොටම එයාලා දැක්කා මෝසෙස් සහ එලියා යේසුස් එක්ක කතා කරකර ඉන්නවා.
4 ඒක දැක්කාම පේතෘස් යේසුස්ට මෙහෙම කිව්වා. “ස්වාමීනි, අපිට මෙතන ඉන්න ලැබුණ එක ලොකු සතුටක්. අපි කූඩාරම් තුනක් ගහන්නද? එකක් ඔයාට. එකක් මෝසෙස්ට. අනිත් එක එලියාට.”
5 එයා කතා කරන අතරේ දීප්තිමත් වලාකුළකින් එයාලව වැහිලා ගියා. ඒ වලාකුළෙන් මෙහෙම කියන හඬක් ඇහුණා. “මේ මගේ ආදරණීය පුතා. මම එයා ගැන සතුටු වෙනවා.+ එයාට ඇහුම්කන් දෙන්න.”+
6 ඒක ඇහෙද්දී ගෝලයෝ හොඳටම බය වෙලා දණින් වැටිලා ඔළුව බිමටම පහත් කළා.
7 ඒත් යේසුස් එයාලා ළඟට ඇවිත් එයාලව අල්ලලා “නැඟිටින්න, බය වෙන්න එපා” කියලා කිව්වා.
8 ඔළුව උස්සලා බලද්දී එතන හිටියේ යේසුස් විතරයි කියලා එයාලා දැක්කා.
9 කන්දෙන් බැහැගෙන එද්දී යේසුස් එයාලට මෙහෙම අණ කළා. “මනුෂ්‍ය පුත්‍රයාව මරණයෙන් නැඟිට්ටවන කල් ඔයාලා දැක්ක දේ ගැන කාටවත් කියන්න එපා.”+
10 ඒත් ගෝලයෝ යේසුස්ගෙන් මෙහෙම ඇහුවා. “එහෙනම් එලියා මුලින්ම එන්න ඕනෙ කියලා නීතිය පිටපත් කරන අය කියන්නේ ඇයි?”+
11 ඔහු මෙහෙම උත්තර දුන්නා. “එලියා අනිවාර්යයෙන්ම එනවා. එයා ඇවිත් හැම දෙයක්ම සූදානම් කරයි.+
12 ඒත් මං ඔයාලට කියන්නේ, එලියා දැනටමත් ඇවිල්ලා ඉවරයි. හැබැයි එයාලා එයාව අඳුරගත්තේ නැහැ. ඒ අය එයාට සැලකුවේ තමන්ට ඕනෙ ඕනෙ විදිහට.+ එයාලා අතින් මනුෂ්‍ය පුත්‍රයාටත් ඒ විදිහටම පීඩා විඳින්න වෙයි.”+
13 එතකොට ගෝලයෝ තේරුම්ගත්තා ඔහු කතා කළේ යොහන් බව්තීස්ත ගැන කියලා.
14 එයාලා සෙනඟ ඉන්න තැනට ආවාම+ මිනිසෙක් යේසුස් ළඟට ඇවිත් ඔහු ඉස්සරහා දණින් වැටිලා මෙහෙම කිව්වා.
15 “ස්වාමීනි, මගේ පුතාට අනුකම්පා කරන්න.* එයා ගොඩක් අසනීපෙන් ඉන්නේ. එයා මීමැස්මොර රෝගියෙක්. එයා නිතරම වගේ ගින්දරටයි, වතුරටයි ගිහින් වැටෙනවා.+
16 මං පුතාව ඔබේ ගෝලයන් ගාවට එක්කගෙන ආවාට එයාව සුව කරන්න එයාලට බැරි වුණා.”
17 එතකොට යේසුස් මෙහෙම කිව්වා. “අනේ, විශ්වාසයක් නැති පව්කාර පරම්පරාව,+ මං තව කොච්චර කාලයක් ඔයාලා එක්ක ඉන්න ඕනෙද? තව කොච්චර කාලයක් ඔයාලා කරන දේවල් ඉවසන් ඉන්නද? දරුවාව මං ළඟට ගේන්න.”
18 යේසුස් දරුවාට වැහිලා හිටපු භූතයාට එළියට එන්න කියලා තදින්ම අණ කළා. එතකොට භූතයා දරුවාගෙන් පිට වෙලා ගියා. ඒ වෙලාවෙම දරුවා සුව වුණා.+
19 ඊටපස්සේ ගෝලයෝ විතරක් යේසුස් ළඟට ඇවිත් “අපිට ඒ භූතයාව එළවන්න බැරි වුණේ ඇයි” කියලා ඇහුවා.
20 එතකොට ඔහු එයාලට මෙහෙම කිව්වා. “ඒ, ඔයාලාගේ විශ්වාසය දුර්වල නිසයි. ඇත්තටම මං ඔයාලට කියන්නේ, අබ ඇටයක් තරම්වත් විශ්වාසයක් ඔයාලට තියෙනවා නම් මේ කන්දට ‘මෙතනින් අතනට යන්න’ කියලා කිව්වොත් ඒක එතනට යයි. විශ්වාසය තියෙනවා නම් ඔයාලට ඕනෙම දෙයක් කරන්න පුළුවන්.”*+
21 * ——
22 එයාලා ගලීලයේදී එකට රැස් වෙලා ඉද්දී යේසුස් ගෝලයන්ට මෙහෙම කිව්වා. “මනුෂ්‍ය පුත්‍රයාව ඔහුගේ සතුරන් අතට පාවලා දෙනවා.+
23 එයාලා ඔහුව මරලා දායි. ඒත් තුන්වෙනි දවසේ ඔහුව මරණයෙන් නැඟිට්ටවනවා.”+ ඒක අහලා එයාලා ගොඩක් දුක් වුණා.
24 එයාලා කපර්ණවුමට ආවාම දේවමාලිගාවට දෙන බද්ද* එකතු කරන මිනිස්සු පේතෘස් ළඟට ඇවිත් මෙහෙම ඇහුවා. “ඔයාලාගේ ගුරුතුමා දේවමාලිගාවේ බද්ද ගෙවන්නේ නැද්ද?”+
25 එතකොට පේතෘස් කිව්වා “ගෙවනවා” කියලා. පේතෘස් ගෙට ඇතුල් වුණ ගමන්ම එයා මුකුත් කියන්න කලින් යේසුස් එයාගෙන් මෙහෙම ඇහුවා. “සීමොන්, ඔයා හිතන්නේ මොකක්ද? පොළොවේ රජවරු තීරු බදු, ඇඟ බදු අය කරන්නේ කාගෙන්ද? එයාලාගේ පුතාලාගෙන්ද වෙන අයගෙන්ද?”
26 “වෙන අයගෙන්” කියලා පේතෘස් කියද්දී යේසුස් එයාට මෙහෙම කිව්වා. “එහෙනම් බදු ගෙවන එකෙන් පුතාලා ඇත්තටම නිදහස්.
27 ඒත් එයාලා එක්ක ප්‍රශ්න ඇති කරගන්න අපිට ඕනෙ නැහැ.+ ඔයා දැන් මුහුදට ගිහින් බිළී බාන්න. ඔයාට ඉස්සෙල්ලාම අහු වෙන මාළුවාගේ කට ඇරලා බලන්න. එතකොට ඔයාට රිදී කාසියක්* හම්බ වෙයි. ඒ කාසිය අරන් ගිහින් ඔයායි, මායි වෙනුවෙන් බද්ද ගෙවන්න.”
