ඔයාට දැනෙන විදිහ ඉස්පිල්ලක් පාපිල්ලක් නෑර යාච්ඤාවෙන් දෙවියන්ට කියන්න. (ගීතාවලිය 55:22) දෙවියන් ඔයා දිහා බලන්නේ නැහැ කියලා හිතන්න එපා. ඔයාගේ හිතේ තියෙන තුවාලය දෙවියන්ට පේනවා. ඒකේ වේදනාව ඔහුට දැනෙනවා. යාච්ඤා කරලා හිතේ සහ මනසේ සාමය අද්දකින්න කියලා දෙවියන් ඔයාට ආරාධනා කරනවා.—ෆිලිප්පි 4:6, 7.

මානසික රෝගයක් එක්ක පොරබදිද්දී අපේ ලෝකේ අපි තනි වෙනවා. ඒ ලෝකෙට අඩිය තියලා අපිට අත දෙන්න කාටවත් තේරෙන්නේ නැති වෙන්න පුළුවන්. (හිතෝපදේශ 14:10) ඒත් ඔයා දෙවියන්ට කතා කරද්දී ඔහු ඔයාගේ ළඟට එනවා. ඔයා මොන අඳුරක හිර වෙලා හිටියත් දෙවියන්ට ඔයාව පේනවා. ඔයා දිහාවට ඔහුගේ සවන් යොමු කරලා ඔයාගේ කටින් පිට වෙන වචන විතරක් නෙවෙයි ඒවායේ සැඟවිලා තියෙන හැඟීම් පවා දෙවියන් තේරුම්ගන්නවා.—2 ලේකම් 6:29, 30.

යාච්ඤා කරද්දී ඔයා ගැන සැලකිලිමත් කෙනෙක් ඔයාට ඉන්නවා කියන දේ ඔයාට දැනෙයි. එතකොට “මා විඳින දුක ඔබ දුටුවෙහිය. මා මේ ජීවිතය තුළ මුහුණ දෙන සියලු කරදර ඔබ දන්නෙහිය” කියලා ගීතිකාකරු වගේ ඔයාත් කියයි. (ගීතාවලිය 31:7) ඔයා ඉන්න තත්වය යෙහෝවා දෙවියන්ට තේරුම්ගන්න පුළුවන් කියලා දැනන් ඉන්න එකම සහනයක් නෙවෙයිද! ඒත් ඔහු ඒ දුක දිහා නිකම්ම බලාගෙන ඉන්නේ නැහැ. ඔහු ඔයාට අවශ්‍ය සහනය දිරිගැන්වීම දෙන්න ඔහුගේ වචනය වන බයිබලය පාවිච්චි කරනවා.