ඔයාත් ස්වාභාවික විපතකට මුහුණ දීලා තියෙනවාද? එහෙනම් ඒ වගේ අය අද්දකින දේවල් තේරුම්ගන්න ඔයාට පුළුවන් වෙයි. හුඟක් අයට ලොකු කම්පනයක්, කනස්සල්ලක්, අසරණකමක්, බයක් දැනෙනවා. හීනෙනුත් බය වෙනවා. සමහර වෙලාවට වෙච්ච දේ පිළිගන්න කැමතිත් නැහැ. ජීවිතේ අලුතින් පටන්ගන්න එක ගැන එයාලට හිතාගන්නවත් බැහැ.

ස්වාභාවික විපතක් නිසා ඔයා ලොකු පීඩනයක්, කනස්සල්ලක් අද්දකිනවා නම් සමහරවිට ඔයාට හිතෙනවා ඇති ජීවත් වෙලා වැඩක් නැහැ කියලා. හැබැයි ඔයාගේ ජීවිතය හුඟක් වටිනවා කියලත් ඔයාට සතුටින් ජීවත් වෙන්න පුළුවන් කාලයක් ළඟදීම එනවා කියලත් බයිබලයේ තියෙන තොරතුරුවලින් පැහැදිලි වෙනවා.

දේශනාකාරයා 7:8 කියන්නේ “පටන්ගැන්මට වඩා අවසානය හොඳය” කියලයි. ස්වාභාවික විපතකට මුහුණ දුන්න කෙනෙක්ට මුලදී හිතෙන්න පුළුවන් ජීවිතේ එතැනින් ඉවරයි කියලා. ඒත් ජීවිතය ගොඩනඟාගන්න ටිකෙන් ටික වෑයම් කරද්දී ආයෙත් සතුටින් ජීවත් වෙන්න පුළුවන් වෙනවා.

‘වැලපෙන හඬක්වත් වේදනාවෙන් කෑ මොර දෙන හඬක්වත් ඇසෙන්නේ නැති’ කාලයක් ගැන බයිබලයේ කියලා තියෙනවා. (යෙසායා 65:19) ඒ දේ ඉටු වෙන්නේ දෙවියන්ගේ රාජ්‍යයෙන් මුළු පොළොවම පාරාදීසයක් කරන කාලයේදීයි. (ගීතාවලිය 37:11, 29) එදාට ස්වාභාවික විපත් ඇති වෙන්නේ නැහැ. ඒ වගේ විපත් නිසා හිතට වධ දුන්න අමිහිරි මතකයන් පවා නැති වෙලා යයි. මොකද “පෙර කාලවලදී සිදු වූ දේවල් නැවත කිසි දිනක මතකයට නැඟෙන්නේ නැත” කියලා සියලු බලැති දෙවියන් පොරොන්දු වෙලා තියෙනවා.—යෙසායා 65:17.

ටිකකට හිතන්න. හැම දෙයක්ම නිර්මාණය කරපු දෙවියන් ඔයාට “සාමයෙන් පිරුණු ප්‍රීතිමත් ජීවිතයක්” දෙන්න සැලසුම් කරලයි තියෙන්නේ. (යෙරෙමියා 29:11) එහෙම බලද්දී ඔයාගේ ජීවිතේට වටිනාකමක් තියෙනවා කියලා ඔයාට හිතෙන්නේ නැද්ද? කලින් ලිපියේ සඳහන් වුණු සැලී ඒ ගැන මෙහෙම කියනවා. “දෙවියන්ගේ රාජ්‍යයෙන් ලැබෙන ආශීර්වාද ගැන කල්පනා කරන එක මට උදව් වෙනවා වෙච්ච දේවල් ගැන ළත වෙවී ඉන්නේ නැතුව ජීවිතේට හොඳින් මුහුණ දෙන්න.”

දෙවියන්ගේ රාජ්‍යයෙන් මිනිසුන්ට ලැබෙන තවත් ආශීර්වාද ගැන හොයලා බලන්න ඔයා කැමති නැද්ද? ස්වාභාවික විපතකින් පීඩා විඳලා තිබුණත් ඔයාගේ ජීවිතේ හුඟක් වටිනවා කියලා තේරුම්ගන්නත් විපත්ති නැති ඒ ලස්සන කාලය එන කල් සතුටින් ඉන්නත් ඒක ඔයාට උදව් වෙයි. විපතක් නිසා ඇති වෙන ප්‍රශ්නවලට හොඳින් මුහුණ දෙන්න උදව් වෙන මඟ පෙන්වීමුත් බයිබලයේ තියෙනවා. ඒ ගැන දැන් බලමු.