දරාගන්න බැරි තරම් පීඩනයක් ඇති වුණොත් ඒක ඔයාගේ සෞඛ්‍යයට බලපාන්නත් පුළුවන්. ඒක මේ උදාහරණයෙන් තේරුම්ගමු. ලොකු ට්‍රක් එකකට කන්ටේනරයක් පහසුවෙන් ඇදගෙන යන්න පුළුවන් වුණත් කාර් එකකට ඒක කරන්න බැහැ. මොකද කාර් එකේ එන්ජින් එකට ඒක දරන්න බැහැ. පීඩනයත් ඒ වගේ.

ඔයාට දරාගන්න බැරි තරම් පීඩනයක් දැනෙනවද? එහෙමනම් ඔයාට කරන්න පුළුවන් දේවල් දෙකක් තියෙනවා. එකක් ඔයාගේ වැඩ අඩු කරගන්න. අනිත් එක පීඩනයට ඔරොත්තු දෙන්න පුළුවන් විදිහට ඔයා ශක්තිමත් වෙන්න.

අභියෝගය: වැඩ වැඩියි.

“කවුරු හරි මගෙන් උදව්වක් ඉල්ලුවොත්, පාටියකට එන්න කියලා කිව්වොත් මට වැඩ තිබුණත් ඒගොල්ලන්ගේ හිත රිද්දන්න බැරි නිසා හැම දේටම මම හා කියනවා.”—කරීනා. *

විසඳුම: බැරි නම් බෑ කියන්න ඉගෙනගන්න.

බයිබලයේ කියලා තියෙනවා ‘නිහතමානී අය ප්‍රඥාවන්තයි’ කියලා. (හිතෝපදේශ 11:2) නිහතමානී කෙනෙක් තමන්ට කරන්න පුළුවන් ප්‍රමාණය තේරුම්ගෙන තමන්ට කරන්න බැරි දේට බැහැ කියනවා.

ඒ වුණාට හැම දේකටම බැහැ කියන්න බැහැ. උදාහරණයකට දෙමව්පියන් ඔයාට වැඩක් භාර දුන්නම ඒක කරන්නම ඕනනේ. ඒත් හැමෝම කියන හැමදේම කරන්න ගියොත් තමයි ඔයාට පීඩනයක් ඇති වෙන්නේ.

යෝජනාවක්: කාට හරි එකපාරටම බැහැ කියන්න බැරි නම් මම පස්සේ ඔයාට උත්තරයක් දෙන්නම් කියලා කියන්න. ඊටපස්සේ ඔයාගේ වැඩත් එක්ක ඒ දේ කරන්න පුළුවන්ද කියලා හොඳට හිතලා උත්තරයක් දෙන්න.

 අභියෝගය: වැඩේ කල් දාන පුරුද්ද.

“කරන්න තියෙන වැඩේ අමාරු නම් මම ඒක කල් දානවා. ඒත් ඒක කරන්නම ඕන එකක් නිසා පීඩනය වැඩි වෙනවා. අන්තිම මොහොතේ කරන්න යනකොට පීඩනය තවත් වැඩි වෙනවා.”—සෙරීනා.

විසඳුම: වැඩේ පටන්ගන්න.

බයිබලයේ උපදෙස් දෙන්නේ ‘කම්මැළි වෙන්න එපා’ කියලා. (රෝම 12:11) අමාරු වැඩක් කරන්න තියෙනකොට ඒක ඔළුවට ලොකු බරක්. ඒක කල් දාන්න, කල් දාන්න ඔළුවේ බර තවත් වැඩි වෙනවා. ඒ නිසා පුළුවන් ඉක්මනින් ඒක කරලා දාන්න.

වැඩ ටික ආසාවෙන් කරන්න නම් ඒ වැඩ ටික කොළයක ලියාගන්න. අමාරු වැඩක් නම් ඒක කරන්න පුළුවන් විදිහට වැඩේ කොටස්වලට බෙදාගන්න. කැරල් මෙහෙම දෙයක් කියනවා. “කරන්න ඕනේ වැඩ ටික මම ලියාගන්නවා. කරන්න ආස නැති වැඩ ටික තමයි මුලින්ම ලියාගන්නේ. ඒවා එකින් එක ඉවර කරද්දී දන්නෙම නැතුව අන්තිමට ඉතුරු වෙලා තියෙන්නේ මම කරන්න හුඟක්ම ආස දේවල්. එතකොම මම ඒවා ආසාවෙන් කරනවා.”

 යෝජනාවක්: ඔයාට වැඩක් කරන්න පටන්ගන්න අමාරු නම් මෙහෙම කරන්න. එලාම් ඔරලෝසුවක් අරන් විනාඩි 15කට විතර ඒක සෙට් කරන්න. ඒ එක්කම වැඩේ පටන්ගන්න. එලාම් එක වදිනකොට ඔයාට තේරෙයි විනාඩි 15ට ඔයා කොච්චර වැඩක් කරලද කියලා. එතකොට වැඩේ ඉතුරු ටික ඉවර කරන්න ඔයාට ආස හිතෙයි.

සෞඛ්‍යය ගැන හිතන්න.

යෞවනයන්ට උපදෙස් දෙන ප්‍රවීණයන් කියන්නේ පෝෂ්‍යදායී ආහාර, දිනපතා ව්‍යායාම් කිරීම සහ හොඳ නින්දක් ලබාගැනීම කෙනෙකුගේ ක්‍රියාශීලීකමට හේතු වෙනවා කියලා. * ඇත්තටම සෞඛ්‍යය ගැන සැලකිලිමත් වෙන එක අමාරු දෙයක් නෙවෙයි. කරන්න තියෙන්නේ පුංචි දේවල්. උදාහරණයකට හොඳ නින්දක් ලබාගන්න ඔයාට මොනවද කරන්න පුළුවන් කියලා බලන්න.

1. හොඳ නින්දක් ලබාගන්න. නිදාගන්නත් නැඟිටින්නත් නිශ්චිත වෙලාවක් තියාගන්න. අඩුම තරමින් සතියේ දවස්වලදීවත් ඒක කරන්න.

2. නිදාගන්න කලින් වැඩ ඉවර කරන්න. ව්‍යායාම් කරනවා නම් නිදාගන්න පැය තුනකටවත් කලින් කරන්න. නිදාගන්න කිට්ටු වෙලා බර ආහාර, තේ කෝපි වගේ දේවල් ගන්න එපා.

3. නිදාගන්න කාමරේ ගැන සැලකිලිමත් වෙන්න. අඳුරු, නිස්කලංක තැනක් නම් හොඳයි.

උදව් ලබාගන්න.

දෙමව්පියන්ගෙන්, යාළුවන්ගෙන් උදව් ගන්න අදිමදි කරන්න එපා. කෙනෙකුට ලැබෙන මානසික සහනය නිසා හෘද රෝග සහ ප්‍රතිශක්තිකරණය හීන වීම වලක්වාගන්න පුළුවන් කියලා හුඟක් අධ්‍යයනවලින් හොයාගෙන තියෙනවා.

ඒක ඇත්ත. බයිබලයෙත් මෙහෙම කියලා තියෙනවා. “මිනිසෙකු තම සිතේ ඇති කනස්සල්ල නිසා මානසිකව වැටෙයි. නමුත් දිරිගන්වනසුලු වචනයකින් ඔහුගේ සිත ප්‍රීතිමත් වෙයි.” (හිතෝපදේශ 12:25) ‘කනස්සල්ල නිසා මානසිකව වැටුණත්’ හොඳ යාළුවන්ගේ “දිරිගන්වනසුලු වචනයකින්” ඔයාට සහනයක් ලබාගන්න පුළුවන්.

තවත් ඔයාට මේ ගැන මඟ පෙන්වීම් ඕනේ නම් යෙහෝවා දෙවිගේ සාක්ෂිකරුවන්ගේ ප්‍රකාශන වන යොවුන් සිතේ ගැටලු 1වන සහ 2වන පොත්වල මේ පරිච්ඡේද බලන්න.

1වන පොත

• 18වෙනි පරිච්ඡේදය: ඉස්කෝලේදී දැනෙන පීඩනයට මම මුහුණ දෙන්නේ කොහොමද?

• 21වෙනි පරිච්ඡේදය: මම කාලය හොඳින් පාවිච්චි කරන්නේ කොහොමද?

2වන පොත

• 26වෙනි පරිච්ඡේදය: කේන්තිය, දුක පාලනය කරගන්නේ කොහොමද?

• 27වෙනි පරිච්ඡේදය: තිතටම දේවල් කරන්න ඕනේ කියලා හිතෙන්නේ ඇයි?