Fayyo noottohu hedeweelcho xiwamoottoni? Hatto ikkiro, dhiwanu mageeshshi geeshsha yaachishannoronna surre daafursannoro, hattono mageeshshi woxe gudannoro afootto yaate. Xissokki dandiite heeꞌratto gede kaaꞌlahera dandaannori maati? Minikki manni woy jaallakki giddo xiwaminohu nooha ikkiro, kaaꞌla dandaattohu hiittoonniiti? Qullaawu Maxaafi fayyimmate agarooshshi maxaafa ikka hoogirono, qarrakki dandiite heeꞌratto gede kaaꞌlitanno amaale aannohe.

•   Akimete kaaꞌlo afiꞌrate woꞌnaali

   Qullaawu Maxaafi yaannore: “Dhiwantinorira ikkinnina fayyaaleeyyete xagisaanchu dihasiisannonsa.”—Maatewoosi 9:12.

   Hatto yaa mayyaate? Hasiisannoha ikkiro, xagissanno ogeeyye kaaꞌlitannohe gede assiꞌrate woꞌnaali.

   Togo assate woꞌnaali: Dandaamihe deerrinni, dancha xagga afiꞌrate woꞌnaali. Mito woyite, addi addi akime amaaꞌla dancha ikkitara dandiitanno. (Lawishsha 14:15) Xagissanno ogeeyye ledo coye fante hasaawi; insa yitannore seekkite huwatate woꞌnaali; hattono xiwanikki gari leellinonsaronna teꞌee buuxi. (Lawishsha 15:22) Xiwanikki daafiranna xagisiꞌra dandaattote addi addi doogga daafira ledde afate woꞌnaali. Amadinohe xiwaninna xaginsanni doogga daafira seekkite afakki, qarrakki qeelate wodanaaꞌmite sharramatto gedenna fayyimmakki daafira danchare doodhatto gede kaaꞌlitannohe.

•   Fayyimmate kaaꞌlannore assa rosi

   Qullaawu Maxaafi yaannore: “Manninate kaajjishiꞌrate rosi . . . kaaꞌlanno.”—1 Ximootewoosi 4:8.

   Hatto yaa mayyaate? Fayyimmate kaaꞌlanno rosichi heeꞌrihero, lawishshaho ganyite ispoorte loosattoha ikkiro kaaꞌlitannohe.

   Togo assate woꞌnaali: Ganyite ispoorte loosi, fayyimmate kaaꞌlitanno sagale iti, hattono duushshanno goxicho goxi. Amadinohe dhibbi qarrisiherono, fayyimmate kaaꞌlanno rosichi heeꞌrihero hakku kaaꞌlannota fullahaano coyidhino. Kayinni assatto coyi fayyimmakki roore gawajjannoha ikkannokki gede qorophi; qoleno adhitanni nootto xagga ledo sumuu yaannore assi.

•   Woloota kaaꞌleꞌꞌe yii

   Qullaawu Maxaafi yaannore: “Jaalu woꞌmanka woyite jaalaholla; roduuno qarru barra iillanno.”—Lawishsha 17:17.

   Hatto yaa mayyaate? Jaallakki amadinohe qarra dandaatto gede kaaꞌlitahera dandiitanno.

   Togo assate woꞌnaali: Addaxxatto jaalira giddokkita fushshite hasaaphi. Hatto assakki beya afiꞌratto gedenna hisatatto gede kaaꞌlitahera dandiitanno. Jaallakkinna fiixikki wole dooggannino kaaꞌlahera hasiꞌrannoti egennantinote; kayinni ma garinni kaaꞌlannohero afa hoogara dandaanno. Hakko daafira, ma garinni kaaꞌlitahera dandiitannoro xawisse kulinsa. Lowore assitahera agadhitooti; qoleno assitannoherira woꞌmanka woyite galatattota leellishi. Ikkollana, jaallakki kaaꞌlitahera yite ikkirono mito woyite furro-fuuqqo hooltahera dandiitanno; hakko daafira, laꞌahera meꞌꞌe higge daa dandiitannoronna atewa mageeshshi saate keeshsha dandiitannoro badde kula hasiissannoheha ikkara dandaanno.

•   Dancha danchare hedi

   Qullaawu Maxaafi yaannore: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.”—Lawishsha 17:22.

   Hatto yaa mayyaate? Dancha danchare hedanna hexxo mudha hooga, wodanaaꞌmatto gedenna xiwana cincate kaaꞌlitanno jawaante afiꞌratto gede kaaꞌlitannohe.

   Togo assate woꞌnaali: Amadinohe dhibba qeelate woꞌnaalatto woyite, wolqakkira aleenni ikkinore agurte assa dandaattore illachishi. Ateneeto wolu manni ledo woy fayyu nootto waro assattori ledo heewisiissooti. (Galatiyu Sokka 6:4) Wonshiꞌra dandaatto mixo fushshiꞌri; hatto assakki albillittete yanna daafira dancha danchare hedatto gede kaaꞌlitannohe. (Lawishsha 24:10) Wolqakki assitu deerrinni, woloota kaaꞌlannore assi. Uyiniro afiꞌnanni hagiirri, qarrakki calla hedattokki gede kaaꞌlannohe.—Soqqamaasinete Looso 20:35.

 Qullaawu Maxaafi, Maganu Yihowa a xiwamino mancho xiwanasi dandee heeꞌranno gede kaaꞌlannota kulanno. Maganu maalaletenni hursannonke yine agadha didandiineemmo; ikkirono, isi magansidhannosire aante noo doogganni kaaꞌlannonsa:

 Keere. Yihowa, ‘Mannu hedora aleenni ikkinoha Maganu keere’ aannonke. (Filiphisiyusi Sokka 4:6, 7) Kuni keeri woy giddoyidi harshammo, mittu manchi quwa sae yaadannokki gede kaaꞌlitannosi. Maganu huuccattotenni yaaddonsa isira kuꞌlitannorira togoo keere aannonsa.—1 Pheexiroosi 5:7.

 Hayyo. Yihowa danchare doodha dandiineemmo gede hayyo aannonke. (Yaiqoobi 1:5) Mittu manchi Qullaawu Maxaafi giddo nooha woꞌmanka woyite kaaꞌlanno biddishsha huwate harunsiro, togoo hayyo afiꞌranno.

 Jawaachishshanno hexxo. Yihowa “Dhiwamoommo” yaannohu heeꞌrannokki yanna daggannota kule hexxo uyino. (Isayaasi 33:24) Tini hexxo, batinyu manni buuto dhiwame heeꞌre nafa sheshifatanno gede kaaꞌlitino.—Ermiyaasi 29:11, 12.