Onkoleessa 24, 2022 Ameerikaho Teksaasi, shiimu Yuuwaldi katamira biso shorodhi assannori kalaqamino. Ze Niwu Yoorki Taymisi gaazeexi kulanno garinni, “Roobi Umi Dirimi Rosi Mine . . . mittu qawwe qodhino manchi 19 qaaqquullenna lame rosiisaano shiino.”

 Hige ma assinanni, yannankera togoohu shagaggiꞌnanni coyi duucha hige ikkanno. Yuu-essi-ee Tudey yinanni gaazeexi odeessino garinni, Ameerikaho calla “sai diro rosu minna hoowe giddo 249 hinge qawwe gannoonni; 1970 kawa kageeshshi geya qawwe ganne cancinshoonnihu wolu diri dino.”

 Togoohu macca gibbanno coyi ikkannohu mayiraati? Togooha busha coye cincine heeꞌra dandiineemmohu hiittoonniiti? Finqille heedhannokki yanna dagganno yine hexxa dandiineemmo? Qullaawu Maxaafi kuri xaꞌmuwara dawaro qolanno.

•    Qullaawu Maxaafi ninke heeꞌnoommo diro “goofimarchu barra” yaanno; qoleno konni dirira batinyu manni “baxillu nookkiha” hattono “mararro afiꞌrinokkiha” ikkannota kulanno; hatto yaano mannu biso shorodhi assannorenna macca gibbannore assanno yaate. Togoo akati noonsa mannooti “bunshete aana bunshe leddanno.” (2 Ximootewoosi 3:1-5, 13) Tenne daafira ledde afate, “Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?” yaanno birxicho nabbawi.

 Batinyu manni, ‘Maganu togoohu bushu coyi ikkannota hoolannokkihu isi mayiraati?’ yee huluullamanno. Qullaawu Maxaafi tenne xaꞌmora qolanno dawaro afate, “Danchu Mannirano Bushu Coyi Iillanno—Mayira?” yaanno birxicho nabbawi.

•    “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.”—Roomu Sokka 15:4.

 Qullaawu Maxaafi biddishshi tenne kakkachu manni batiꞌrino alame cincite heeꞌratto gede kaaꞌlannohe. “Finqille Baꞌanno Yanna Dagga Ikka?” yaanno birxicho afidhinote Baqqi Yiiyye! yinanni metseetera wole kaaꞌlitanno mashalaqqe afiꞌratto.

 Annuwunna amuuwu qaaqquullinsa odoote kullanna laꞌꞌannonna macciishshanno coyinni bararraaqannokki gede kaaꞌla dandiitanno gara afate, “Yaachishshanno Odoonna Oosoꞌne” yaanno birxicho nabbawi.

•    “[Maganu] gadadaamma shettotewiinni fushshannonsa.”—Faarso 72:14.

•    “Bisensa heellakkote, urdensa haantote soorritanno. Gashshootu gashshootu aana ola dikayisanno. Kunni kaꞌa olu roso rosannohu diheeꞌranno.”—Mikiyaasi 4:3.

 Maganu mannu ooso assa dandiitinokkire assaraati. Isi gordu Mangistesi widoonni olu uduunne baalankanna finqille baalanta hunanno. Maganu Mangiste assitannore ledde afate, “Maganu Mangiste Hunda ‘Keeru Woꞌmanno’” yaanno birxicho nabbawi.