Hendeemmo gari Maganu hagiidhanno woy dadillanno gede assara dandaanno. (Ermiyaasi 17:10) Manna gimbeemmota leellishannore coyiˈra woy assa dihasiissannonke; kayinni tini calla diˈˈikkitanno. Mittu manchi woloota giwa hanafannohu balaxe surresinniitinna wodanisinniiti. Hakko daafira manna giwate hedo giddonkenni buqqinse hooˈla hasiissannonke. ‘Wodaninke haarooˈmannohunna’ manna giwa agura dandiineemmohu hatto assinummoro callaati.

Woloota hakko iso wole gaˈre wido woy gobbare ikkitinore ma garinni laˈˈattoro seekkite hedi. Ateneeto togo yite xaˈmi: ‘Insa ma garinni laeemmo? Insa daafira seekke afoommonso mulla kae giweemmo?’ Finqille nootanna manna gimbanni gede assitannota dagoomittete webisayite, filmenna boohaarsha laˈˈattokki gede qorophi.

Ninkeneeto layiˈra shota ikkitannonkekki woyiti no. Maganu Qaali kayinni, “Wodanu giddo noo hedonna yorto [fonqolle]” layiˈneemmo gede kaaˈlannonke. (Ibiraawoota 4:12) Konnira Qullaawa Maxaafa xiinxalla agurtooti. Hedattori Qullaawu Maxaafi rosiisannori ledo sumuu yaannoronna teˈee layiˈri; hattono hedattori Qullaawu Maxaafi rosiisannori ledo sumuu yaanno gede assiˈrate dandiittore baala assi. Maganu Qaali surrenkenna wodaninke giddo ‘qiishote’ gede ikkitinota manna giwate hedo qeeˈlineemmo gede kaaˈlannonke.— 2 Qorontoosi 10:4, 5.