ALBILLITTETE HEESHSHOKKI DAAFIRA ATI UMIKKI DOODHA DANDAATTOHA LAWANNOHE? Mitu manni heeꞌrannohu doodhino doorshi garinni ikkikkinni, kaayyonsa garinni ikkinohu gede asse hedanno. Konnira mitu coyi qinaa hoogannonsa woyite, ‘Wonanni anera diyiinoho’ yee facci asse aguranno.

Mitootu qolte tenne bunshenna gadadu woꞌmino alamenni fooliishshidhannowa hoogganno woyite higgannowi baꞌꞌannonsa. Insa heeshshonsa woyyeessiꞌrate sharrantannoha ikkirono, olu, jaddo, kalaqamu danonna xibbu mixidhino mixo hune aguranno. Konni daafira, ‘Mayira daafurranni qarrammeemmo’ yite heddanno.

Heeshshonke giddo hedeweelcho iillannonke coyi, fushshiꞌneemmo mixo wonshiꞌneemmokki gede guficho ikkankera dandaannoti egennantinote. (Rosiisaancho 9:11) Ikkirono konni kaꞌi heeshshonke daafira, uminke doorsha doodha dandiineemmo. Isinni, Qullaawu Maxaafi albillittete heeshshonke daafira, doorshu ninkeha ikkinota kulanno. Hanni Maganu Qaali mayyaannoro laꞌno.

Yihowa Israeele Hexxote Gobba ea rakke heedheenna Muse widoonni insara togo yiino: “Doodhitinanni gede heeshshonna reyo, maassonna rumo albaꞌneenni woroommo. . . . Lubbotenni heedhinanni gede heeshsho doodhe. Maganoꞌne Kaaliiqa baxxe; isira hajajamme; ammanantinoonnire ikke.”—Marro 30:15, 19, 20.

“Doodhitinanni gede heeshshonna reyo, maassonna rumo albaꞌneenni woroommo.”—Marro 30:19

Ee, Maganu Israeele Gibitsete borojjimmanni fushshe Hexxote Gobbara hagiidhitanni heedhanno hexxo uyinonsa. Ikkollana Israeele tenne hexxo afiꞌrate assa hasiissannonsari no. Insa konne atoote afiꞌrate ‘heeshsho doodha’ hasiissannonsa. Hiittoonni? Yihowa ‘baxa, isira hajajamanna ammanantinore ikka’ hasiissannonsa.

Xaa yannara Maganu aterano doorsha uyinohe; konnira atino albillittete heeshshokki daafira doodha dandaatto. Magano baxa, isira hajajamanna ammanama doodhittoro gannate ikkitino uullara hegerera heeꞌra dandaatto. Togo assa dandaattohu hiittoonniiti?

Maganunnihu qaru akati baxilleho. Soqqamaasinchu Yohaannisi qullaawu ayyaaninni “Maganu baxilleho” yee borreessino. (1 Yohaannisi 4:8) Konni daafira, Yesuusi baalanta roortanno hajajo hiittenneetiro xaꞌminisi yannara togo yee qolino: “Mooticha Maganokki woꞌmu wodanikkinni, woꞌma lubbokkinni, woꞌma hedokkinni baxi!” (Maatewoosi 22:37) Maganu Yihowa ledo addu jaalooma kalaqiꞌrate iso waajjine calla ikkikkinni banxe hajajama hasiissannonke. Ikkina Magano baxa hasiissannonkehu mayiraati?

Yihowara mannu oosora noosi baxilli, annunna ama oosonsara noonsa baxilli gedeeti. Annuwunna amuuwu guuntete xeꞌne noonsaha ikkirono, oosonsa hagiidhitanni heedhara hasidhanno daafira rosiissannonsa, jawaachishshannonsa, kaaꞌlitannonsa, hattono seejjitannonsa. Annunna ama oosonsa maa assitansara hasidhannoyya? Insa oosonsa baxxansaranna insa horora yite kultannonsare macciishshitara hasidhanno. Ikkina guuta ikkinohu iimi Anninkeno banxeemmosi gedenna assinonkere  baala naandeemmo gede hasiꞌrasi gara diꞌꞌikkitino?

Maganoho hajajamate isi kulannonkere macciishsha hasiissannonke. Maganu coyiꞌranna macciishsha didandiineemmo; ikkollana, Qaalisi Qullaawu Maxaafi giddo noore nabbambeemmohanna loosunni leellinsheemmoha ikkiro, iso macciishshinanni heeꞌnoommo.—1 Yohaannisi 5:3.

Yesuusi, Maganu kulannonkere macciishsha hasiissannonketa xawisanni togo yiino: “Mannu Maganu afiinni fulanno qaali baalunni ikkinnina, sagale callatenni diheeꞌranno.” (Maatewoosi 4:4) Heeshshotenni heeꞌrate sagaꞌla hasiissannonkente gede, Maganu daafira rosano lowo geeshsha hasiissannote. Mayira? Hayyichu Moote Selemooni togo yiino: ‘Egenno [woy, hayyo] egennaammu lubbo gargartanno.’ (Rosiisaancho 7:12) Maganuwiinni afiꞌneemmo egennonna hayyo xaa yannara agartannonke; qoleno hegere heeshsho afiꞌneemmo gede assannonke doorsha doodhate kaaꞌlitannonke.

Sai birxichira ronsummoha Yesuusi coyiꞌrino lawishsha qaagi; isi togo yiino: “Heeshshote widira massanno waalchi ruukkashshoho; doogono gurchote; ise afiꞌranno manni kiiro shiimaho.” (Maatewoosi 7:13, 14) Tenne doogo aana haꞌneemmo woyite, hayyichu massagaanchiwa gamba yine heeꞌranke hendoommowa iillate yaano hegere heeshsho afiꞌrate kaaꞌlitannonke. Konni daafira, hegere heeshsho afiꞌrate Maganunniwa gamba yine heeꞌra hasiissannonke. (Faarso 16:8) Ikkina togo assa dandiineemmohu hiittoonniiti?

Barru baala assa hasiissannonkehunna ninke assa hasiꞌneemmohu duuchu coyi no. Kuri coyibba, Maganu hasiꞌrannore assineemmo yanna hoongeemmo gede assitankera dandiitanno. Qullaawu Maxaafi togo yaanno: “Egennaammu gede ikkinnina gowwootu gede ikkitine heedhinoonte. Kuni diri bushahona, afidhinoonni yanna baalate giddo dancha looso loosse.” (Efesooni Sokka 5:15, 16) Maganu ledo noonke jaalooma baalunku coyinni roorsine laꞌneemmoha ikkiro, Maganunniwa gamba yine heeꞌra dandiineemmo.—Maatewoosi 6:33.

Konni albaanni ikkinore biddi assa dandaattokkiha ikkirono, atenna maatekki gedensi seyanno gede assiꞌra dandaatto. Qullaawu Maxaafi, iimi Anninke Maganu Yihowa lowo geeshsha baxannonketanna isi ninkewiinni maa hasiꞌrannoro kulinonketa xawisanno. Masaalaanchu Mikiyaasi togo yiino:

“Danchu coyi maatiro Kaaliiqi [“Yihowa,” NW] kulinohe. Isi ninkewiinni hasiꞌrannohu, taalo ikkino coye assinammora, danchumma woꞌmitino baxille leellinshammoranna Maganu ledo gudisamme joongillunni heeꞌnammoraati.”—Mikiyaasi 6:8.

Maganu isi jaala ikkatto gede koyisinohe koyishsha adhite, jaallasira qixxeessinoha hegere atoote afiꞌra hasiꞌratto? Doorshu ateho!