1. Heeꞌnoommo yanna baxxitinote yineemmohu mayiraati?

 TINI heeꞌneemmoti baxxitino yannaati. Qullaawu Maxaafira balanxe masaalloonni garinni, Yihowa “lowo manna . . . gosa baalatenni, gaꞌre baalatenni, fiixu fiixunkunninna addi addi afoo coyiꞌranno manni giddonni” gamba assanni no. Sette miliyoone saꞌannoti tini “wolqaataame gosa” “hashshanna barra” Maganoho hagiirrunni soqqantanni no. (Aju. 7:9, 15; Isa. 60:22) Maganonna ammanate roduuwansa baxannohu kageeshshi manni konni albaanni heeꞌre diegennino.

2. Maganuwiinni xeertiꞌrino mannira hiittoo baxilli noonsa? (Hanafote noo misile lai.)

² Qullaawu Maxaafi giddo yannankera Maganuwiinni xeertiꞌrinohu umonsa calla baxanno manni heeꞌrannotano masaalloonni. Soqqamaasinchu Phaawuloosi togo yee borreessino: “Goofimarchu barra . . . mannu umosi baxannoha, woxe baxannoha, . . . Maganunni roorse qiniitesi baxannoha ikkanno.” (2 Xim. 3:1-4) Umonsa baxanno manni leellishanno baxilli Kiristaanaho noonsa baxillinni baxxinoho. Umonsa baxanno manni afiꞌneemmo yee hedino hagiirre diafiꞌranno. Isinni togoo baxilli alamete aana umonsa baxanno manni  batiꞌrannonna alame ‘qarru’ woꞌminota ikkitanno gede assino.

3. Konni birxichira maa ronseemmo? Mayira?

³ Phaawuloosi umonsa calla baxanno manni batiꞌrannotanna tini Kiristaanaho qarra ikkitannonsata huwatino. Konni daafira isi, gara ikkinokki baxille leellishanno manniwiinni ‘xoonqeemmo’ gede amaalinonke. (2 Xim. 3:5) Ikkollana togoo manni ledo horo dixaandeemmo yine dianfeemmo. Ikkina alamete noo mannira noonsa hedowiinni xeertiꞌranna baxillu Magano ikkinoha Yihowa hagiirsiisa dandiineemmohu hiittoonniiti? Konninni aanchine Magano hagiirsiisanno baxillinna 2 Ximootewoosi 3:2-4 aana kulloonni baxilli mereero noo badooshshe laꞌneemmo. Togo assanke, addu baxille leellinshanni heeꞌnoommoronna teꞌee buuxiratenna addu hagiirre afiꞌnanni gede assanno baxille leellisha dandiineemmo gara afate kaaꞌlitannonke.

4. Uminkera quwa sainokki baxille leellisha soꞌro diꞌꞌikkitino yineemmohu mayiraati?

⁴ Soqqamaasinchu Phaawuloosi ayyaanunni “mannu umonsa baxannoha . . . ikkanno” yee borreessino. Umonke baxa soꞌroteni? Disoꞌrote; quwa saꞌnummokki ninkeneeto baxa bunshe diafidhino, qoleno togo assa hasiissannote. Yihowa kalaqinonkehu konni garinniiti. Yesuusi “Manna baala umikki gede assite baxi” yiino. (Maq. 12:31) Ninkeneeto baxa hoongummoro, wole manna baxa didandiineemmo. Qullaawu Maxaafi lede togo yaanno: “Minaannuwuno uminsa manninate baxxanno garinni, mininsa amuuwano baxa hasiissannonsa. Minaamasi baxannohu umosi baxannoho. . . . Mannimmasi itisannotanna towatannota ikkinnina, mannimmasi giwannohu horonta dino.” (Efe. 5:28, 29) Konni daafira uminkera quwa sainokki baxille leellisha soꞌro diꞌꞌikkitino.

5. Quwa sae umonsa baxanno manna ma garinni xawisa dandiineemmo?

⁵ Layinki Ximootewoosi 3:2te aana kulloonni baxilli garu baxille diꞌꞌikkino. Phaawuloosi coyiꞌrinohu quwa saꞌe umonsa baxxannori daafiraati. Quwa sae umonsa baxanno manni hasiisannohunni aleenni uminsa daafira hedanno. (Roomu Sokka 12:3 nabbawi.) Woꞌmanka wote heddannohu uminsara callaati. Insa wolu mannira diheddanno. Mite soꞌro loosanno wote, soꞌronsa ammana agurte wole manna busha assitanno. Mittu Qullaawu Maxaafi egennaami umonsa quwa sae baxanno manni “isiniitira shaqqadunna iibbadu fuutta lawannorichi giddo heeꞌre, gobbaanni noorira uttasi calla leellishanno xoichi gedeeti” yiino. Togoohu uminsara calla hedanno mannira addu hagiirri dinonsa.

6. Magano baxxannori maa afidhanno?

⁶ Phaawuloosi goofimarchu barra mannaho heedhannota busha akatta kuli wote umo qummi assinohu umo baxate akataati; mitu Qullaawu Maxaafi egennaammi, Phaawuloosi umo baxate akata balaxe qummi assinohu mittu manchira busha akatta heedhannosihu umosi baxannohura ikkino daafiraati yite coyidhanno. Magano baxanno mannira kayinni dancha akatta heedhannonsa. Qullaawu Maxaafi Magano hagiirsiisanno baxilli hagiirru, salaamete, cincate, shaqqillu, danchummate, ammanate, joongillunna meessaneeto qeeꞌlate ledo xaado afiꞌrinota kulanno. (Gal. 5:22, 23) Faarsaasinchu “Kaaliiqi Yihowa Maganonsa ikkino manni baꞌraaꞌrinoho” yee borreessino. (Far. 144:15) Yihowa hagiirraamo Maganooti; konni daafira mannisino hagiirraamma ikka dandaanno. Qoleno Yihowa soqqamaasine umonsa calla baxannonna adha ikkinninna aa baxannokki manni gede ikkitukkinni wolootaho aatenni hagiidhitanno.—Soq. 20:35.

7. Uminkenni roorsine Magano banxeemmotanna teꞌee afate hiikkuri xaꞌmuwa kaaꞌlitannonke?

⁷ Uminkenni roorsine Magano banxeemmotanna teꞌee afa dandiineemmohu hiittoonniiti? Soqqaamaasinchu Phaawuloosi Filiphisiyusi Sokka 2:3, 4 te aana togo yee  amaalinonke: “Umoꞌne roorsidhine haafu adawarshinni mittore nafa assitinoonte. Hatteentenni wolu manni kiꞌnenni roorinohu gede assitine hedde. Mittu mittunku woleho woyyannore hedo ikkinnina, umisira woyyannore calla laoonke.” Ninkeneeto togo yine xaꞌma dandiineemmo: ‘Heeshshoꞌya giddo tenne amaale harunsanni noommo? Maganu fajjo wonshate sharrameemmo? Songote giddonna soqqansho fuleemmo wote woloota kaaꞌleemmo faro hasiꞌreemmo?’ Yannankenna wolqanke woloota kaaꞌlate horoonsiꞌra, woꞌmanka wote shota ikka hooggara dandiitanno. Tenne assate sharramanna meessi horo agura hasiissanno. Kayinni kalqete alame giddo baalunkunni Rooriidiha hagiirsiinsanni heeꞌneemmota afanke lowo geeshsha tashshi assitannonke!

8. Mitoota Maganoho noonsa baxilli maa assitanno gede kakkayisinonsa?

⁸ Mitootu Yihowara albinni roore soqqamate yite lowo damooza afidhanno looso facci assite agurtino; togo assitinohu Magano baxxanno daafiraati. Hanni Ameerikaho heedhannota Eerika lawishsha laꞌno. Ise akimitte ikkiturono, konni loosinni lowo deerra iillate sharrama agurte woꞌma yanna suwisaancho ikkite minaannise ledo haammata gobbara soqqantino. Ise togo yitino: “Wole afoo coyiꞌnanniwa soqqammanni afiꞌnoommo woꞌnaalshinna jaalla heeshshonke hagiirraame ikkitanno gede assitino. Xaano akimitte ikke loosa diaguroomma; ikkollana roore yannanna wolqaꞌya horoonsiꞌreemmahu manna ayyaanaamittetenni xagisanniitinna songote giddo mitore assanniiti; tini lowo geeshsha hagiirsissannoe.”

9. Woxe baxa addu hagiirre afiꞌnanni gede assitannokkihu mayiraati?

⁹ Phaawuloosi mannu “woxe baxannoha” ikkanno yee borreessino. Shiimu diri albaanni, Ayerilaandete heeꞌranno suwisaanchi mittu manchira Maganunnire kulino. Hakkiinni manchu woxe wodhinanni borsi giddonni womaashsha fushshe rodooho leellishanni “Ane magani konneeti!” yee fenjeejje coyiꞌrino. Batinyu manni konni manchi gede hedonsa fane coyiꞌrannokkiha ikkirono, alamete aana woxenna woxunni hidhinannire baxanno manni woꞌmino. Qullaawu Maxaafi kayinni togo yee qorowisiisinonke: “Woxe baxannohura woxu diꞌꞌikkannosi; durooꞌmara hasiꞌrannohu diduuwanno.” (Ros. 5:10) Woxe baxanno manni woꞌmanka wote lexxa hasiꞌranno ikkinninna ikkinoe diyaanno; tini qolte lowo qarra abbitannonsa.—1 Xim. 6:9, 10.

10. Qullaawu Maxaafi jirotenna buximate daafira mayyaanno?

¹⁰ Baalunkura woxu hasiisannonketi egennantinote. Mito geeshsha ikkirono woxu agarooshshe ikkannonke. (Ros. 7:12) Kayinni mittu manchi heeshshote hasiisannosiri calla heeꞌrisiro hagiirraamo ikka dandaanno? Ee dandaanno! (Rosiisaancho 5:12 nabbawi.) Yaaqe beetti Aguuri “Hasiissanno sagale uyie; kayinnilla buxicho woy dureessa assitootie” yee huucciꞌrino. Aguuri buxicho ikka giwinohu mayiraatiro huwata dandiineemmo. Isi tenne xawisanni buxicho ikka mooranno gede assitannota coyiꞌrino; tini qolte Maganu suꞌma xonsiissanno. Ikkina isi ‘dureessa assitootie’ yee huucciꞌrinohu mayiraati? Isi “Duuwummoro ate haweemmo” yee borreessino. (Law. 30:8, 9) Atino Maganunni roorse jironsa addaxxanno manna afoottoha ikkara dandaanno.

11. Yesuusi woxu daafira mayyee amaalino?

¹¹ Woxe baxxannori Magano hagiirsiisa didandiitanno. Yesuusi togo yiino: “Mittu manchi lamu Mootichira soqqama didandaanno. Woy mitto giwe mitto baxanno; woy mitto ayirrise mitto mishanno. Hattonni mittu manchi Maganohonna woxeho borojjicho ikka didandaanno.” Yesuusi tenne amaale amaalara albaanni togo yee coyiꞌrino: “Daanillu qasannotera,  bile ittannoteranna mooraanchu ume adhannotera tenne baattora jiro duuꞌnitinoonte. Jiroꞌne daanillunna bile kissannokkiwa, mooraanono unte eꞌe moora dandiitannokkiwa gordoho duuꞌne.”—Mat. 6:19, 20, 24.

12. Bikku heeshsho heeꞌra Yihowara roore soqqammeemmo gede kaaꞌlitannonkehu hiittoonniiti? Lawishsha kuli.

¹² Batinyu roduuwi bikku heeshsho heeꞌra hagiirraamma assitinonsatanna Yihowara albinni roore soqqamate yanna afidhanno gede kaaꞌlitinonsata coyidhino. Lawishshaho, Ameerikaho heeꞌrannohu Jaaki yinanni rodii minaamasi ledo suwisaancho ikke soqqama hasiꞌrino daafira jawa minesinna dirijjitesi hirino. Isi togo yiino: “Minenkenna jajjanke hira shota diꞌꞌikkitinonke. Alba ani lowo diro loosunniwa iillannoe qarrinni kainohunni minira higeemmohu caaccaawanniiti. Woꞌma yanna suwisaancho ikkitino minaamaꞌya kayinni woꞌmanka wote hagiirraamete. Konni daafira, ise ‘Anera baalunkunni roorino loosiisaanchi nooe!’ yitanno. Xa anino suwisaancho ikkoommo daafira lamunku loonseemmohu Yihowaraati.”

13. Woxeho noonke lao afa dandiineemmohu hiittoonniiti?

¹³ Woxeho noonke lao afate ninkeneeto aante noo xaꞌmuwa xaꞌma dandiineemmo: ‘Qullaawu Maxaafi woxu daafira kulannore ammaneemmo? Heeꞌreemmo heeshsho tenne leellishshanno? Heeshshoꞌya giddo balaxisiiseemmohu woxeho? Woxe Yihowanna mannu ledo nooe jaaloominni roorse laeemmo? Yihowa hasiisannoere wonshannoeta ammaneemmo?’ Yihowa iso hexxitannore horo dituganno.—Mat. 6:33.

14. Hagiirsiisannonkere assa lainohunni hiittoo lao hasiissannonke?

¹⁴ Qullaawu Maxaafi giddo masaalloonninte gede yannankera mannu ‘qiniite baxannoha’ ikkino. Quwa saꞌnummokki umonke baxanna woxu daafira heda soꞌro ikkitinokkinte gede hagiirsiisannore assinanni boohaarano soꞌro diꞌꞌikkitino. Yihowa ninkeneeto coqqonnammora woy hagiirsiisanno coyiwiinni umonke agambammora dihasiꞌranno. Qullaawu Maxaafi “Hadhe, yaadittokkinni sagalekki ittanninna woyinekki agganni hagiidhi” yee jawaachishannonke.—Ros. 9:7.

15. ‘Qiniite baxxannore’ yitanno yaatto maa leellishshanno?

¹⁵ Layinki Ximootewoosi 3:4 kultannohu  maalaamittete hagiirre calla shorranni Magano hawanno manni daafiraati. Qummeeshshu mannu “Maganunni roorse qiniitesi baxannoha” ikkannota kulanno; hatto yaa kayinni, insa mito geeshsha Magano baxanno yaa diꞌꞌikkino. Mittu egennaami togo yiino: “Kuni [qummeeshshi] kuni manni mito geeshsha Magano baxannota leellishannoha diꞌꞌikkino. Hatteentenni qummeeshshu togoo manni Magano horo baxannokkita leellishanno.” Tini hedo quwa saꞌe maalaamittete coye baxxannorira qorowishsha ikkitannonsa! ‘Qiniite baxxannore’ yaanno xawishshi ‘tenne alame yortonni’ amadamino manna leellishanno.—Luq. 8:14.

16, 17. Yesuusi maalaamittete hagiirre lainohunni dancha lawishsha ikkinonkehu hiittoonniiti?

¹⁶ Yesuusira maalaamittete hagiirrira gara ikkitino lao noosi. Isi ‘adhanna adhamate jila’ hattono mitto ‘lowo jiliwa’ haꞌrino. (Yoh. 2:1-10; Luq. 5:29) Sargenniwa woyine gooffuta maalaletenni waa woyinete soorrino. Wole yannara qole Yesuusi umonsa bokkeessitannori sagaletenni kainohunni mishshusi yannara, hedonsa biddi assidhanno gede kulinonsa.—Luq. 7:33-36.

¹⁷ Hatto yaa kayinni Yesuusi maalaamittete hagiirre shorranni heeꞌrino yaa diꞌꞌikkino. Isi heeshshosi giddo Yihowa balaxisiisino, hattono manna kaaꞌlate dandaamisire baala assino. Isi wolootu heeshsho afidhara yee qarru haqqi aana sutame qarrame reyino. Yesuusi harunsaanosi togo yiino: “Ane daafira mannu xoniꞌneꞌro, xiiwiꞌneronna kaphunni suꞌma huniꞌnero tashshi yooꞌne. Gordu gashshootira lowo waaga afidhinanni daafira tashshi yooꞌne.”—Mat. 5:11, 12.

18. Maalaamittete hagiirrira noonke lao afate ninkeneeto hiikkuri xaꞌmuwa xaꞌma dandiineemmo?

¹⁸ Maalaamittete hagiirrira noonke lao hiittootero afa dandiineemmohu ma garinniiti? Ninkeneeto togo yine xaꞌma dandiineemmo: ‘Gambooshshunna soqqanshotenni roore boohaarsha balaxisiiseemmo? Magano hagiirsiisate yee mito baxisannoe coye facci asse agureemmo? Mitto boohaarsha doodhammora albaanni tenne lainohunni Yihowa hedo afate woꞌnaaleemmo?’ Yihowa giddonkenni banxeemmoha ikkiro, iso dadillisannota anfoommo coyiwiinni calla ikkikkinni iso dadillisara dandaanno yine hendeemmo coyiwiinni xeertiꞌra hasiissannonke.—Maatewoosi 22:37, 38 nabbawi.

19. Hagiirraamo ikkannohu hiittoo manchooti?

¹⁹ Mannu ooso Sheexaanu alame giddo 6,000 meddi yaanno diro qarrantanni keeshshitino; Sheexaanu alame baꞌꞌa yanna rakkino. Uullate aana quwa sae umonsanna woxe baxannohu, hattono maalaamittete hagiirre calla hasiꞌranno manni woꞌmino. Kuni manni afiꞌranno coyi daafira calla hedanno, hattono uminsa hasatto calla wonshiꞌra hasiꞌranno. Togoo manni horonta hagiirraamma ikka didandaanno. Faarsaasinchu yiino garinni, hagiirraamo ikkannohu ‘Yaiqoobi Magani kaaꞌlaanchosi ikkinohonna Maganosi Yihowa’ hexxanno manchooti.—Far. 146:5.

20. Magano baxakki hagiirraamo ikkatto gede assitinohehu hiittoonniiti?

²⁰ Yihowa dagara Isira noonsa baxilli yannate kiiro lexxanni no; qoleno Yihowa magansiꞌranno manni kiiro lexxitanni no. Tini qolte Maganu Mangiste gashshite nootanna muli yanna giddo mannu oosora dhagge ikkanno atoote abbitannota leellishshanno. Yihowa fajjo assanna iso hagiirsiisa geedannohanna addu hagiirre afiꞌneemmo gede assitannonke. Yihowa baxxannori hegere geeshsha hagiirraamma ikkitanno! Aane noo birxichira quwa sae umonsa baxanno mannira noonsata mite busha akatta laꞌneemmo, hattono Yihowa soqqamaanora noonsata dancha akatta ronseemmo.