Silviyaana yinanniti 27 diro ikkannose suwisaancho togo yitino: “Suwisaano roore hasiissannowa hadhe soqqantino jaallaꞌya afidhino hagiirre macciishshummati, anino togoo hagiirre afiꞌrate halchoomma. Ikkollana sabbakkannori roore hasiissannowa haꞌre soqqama didandeemma yee waajjoomma.”

Aterano Silviyaana gede macciishshaminohe? Sabbakkannori roore hasiissannowa hadhe soqqamate hasidhe heedhe tenne mixo wonshiꞌra dandaattokkiha lawinohe? Hatto ikkiro hexxo mudhitooti! Lowo kume ikkanno roduuwi Yihowa kaaꞌlonni soqqanshonsara guficho ikkannoha babbaxxino qarra qeelte albinni roore soqqama dandiitino. Yihowa mitootaho doogo faninonsahu hiittoonniitiro afate alamete noo giddichuwa giddo halaꞌlinyunni shoolkita ikkitinota Madagaskaari giddicho daaꞌꞌanto.

Saihu tonnu diri giddo, 70 saꞌannori diinaggaabbe soqqantanno halashshaanonna suwisaano 11 gobbanni a soqqamate Madagaskaari daggino; tenne giddichora batinyu manni Qullaawa Maxaafa ayirrisanno. Qoleno hatte giddichora heedhannori batinye halashshaano Maganu Mangiste sokka tenne giddichora halaꞌlitanno gede assate noo qooxeessinni wolewa hadhino. Hanni kuri giddo mitu roduuwi woꞌnaalsha laꞌno.

Luwisinna Peeriini yinanniri 30 diro saꞌꞌannonsa minaanninna minaama Faransayetenni Madagaskaari haꞌrino. Insa wole gobba haꞌre soqqanshonsa halashshiꞌranno doogo hedanni keeshshino; ikkollana Peeriini wole gobba haꞌra waajjitino. Ise togo yitino: “Afoommakki gobba haꞌra waajjishinoe. Maatenke, songonke, minenke, ronsoommo qooxeessanna duucha wote assineemmore agure haꞌra waajjoomma. Soqqanshoꞌya halashshiꞌrate togoo waajja qeeꞌla hasiissinoe.” Gedensaanni Peeriini waajja qeeꞌliteenna 2012 Luuwisi ledo wolewa soqqamate haꞌri. Ise doodhitino doorshi daafira mayi macciishshaminose? Ise togo yitino: “Hakkawarita qaageemma wote heeshshonke giddo Yihowa kaaꞌlannanke laoomma; tini ammana jawaachishshannote.” Luuwisi togo yiino: “Madagaskaarira umo Qaagooshshu Ayyaana ayirrinsummo wote, Qullaawa  Maxaafa xiinxallinseemmo manni giddo tonnu konne ayyaana ayirrisate dayino!”

Kuri minaanninna minaama qarru iillinsarono soqqanshonsa agurannokki gede kaaꞌlinonsari maati? Insa cinca dandaanno gede Yihowa wolqa aannonsa gede huuccatto assiꞌrino. (Far. 46:1) Luuwisi togo yiino: “Yihowa huucciꞌnoommo huuccatto macciishshe ‘keeresi’ uyinonke. Soqqanshonkenni afiꞌneemmo hagiirri aana illachisha dandiinoommo. Qoleno Faransayete gobbara heedhanno jaallanke sokkannonke iimeelenna sokkate borro hexxo mudhineemmokki gede jawaachishshinonke.”—Fil. 4:6, 7; 2 Qor. 4:7.

Yihowa, Luwisinna Peeriini cincinotera kiisinonsa. Luwiisi togo yiino: “Birra 2014nni Faransayete Adhamino Kiristaanira Qixxaawinoha Qullaawu Maxaafi Rosi Mine b eꞌne ronsummo. Kuni rosi Yihowawiinni afiꞌnoommoho hambannikki aamamooshsheeti.” Kuri minaanninna minaama maassami gedensaanni wirro Madagaskaarira soqqamanno gede sonkinsata lowo geeshsha hagiidhino.

Didiyerinna Naadiini yinanni minaanninna minaama 2010nni Faransayetenni Madagaskaari haꞌri wote, 50 diro saꞌꞌannonsareeti. Didiyeri togo yiino: “Ninke wedellu heeꞌnoommo waro suwisaano ikkine soqqammoommo; gedensaanni sase ooso ille lossiꞌnoommo. Insa wedella ikkituta wole gobba haꞌne soqqama dandiineemmoronna teꞌee hendummo.” Naadiini togo yitino: “Oosoꞌyawiinni baxxe haꞌra qarra ikkitinoe; ikkollana insa ‘Sabbakkannori roore hasiissannowa hadhiniro lowo geeshsha hagiidhineemmo!’ yitinonke. Insa coyidhinori wole gobba haꞌne soqqammeemmo gede jawaachishinonke. Xa oosonkewiinni xeertiꞌne heeꞌneemmoha ikkirono silketenninna interneetete widoonni hasaambeemmo daafira tashshi yaannonke.”

Didiyerinna Naadiinira Malagasiyi Afoo rosa qarra ikkitinonsa. Naadiini muushshi yite “Ninke manni qaale ranke ronseemmokki gede wedella diꞌꞌikkinoommo” yite coyidhino. Ikkina kaaꞌlinonsari maatiyya? Umihunni, Faransayete Afiinni massanganni songo haꞌri. Yannate gedensaanni qole, Malagasiyi Afoo rosa hasiꞌrino daafira konni afiinni massanganni songo harino. Naadiini togo yitino: “Sabbankanni xaandoommo manni giddo rooru Qullaawa Maxaafa xiinxalla hasiꞌrannoho. Duucha wote insa mininsara marre hasaawinsoommonsa daafira galattannonke. Umi qara, mannu konni garinni macciishshannonkeha dilawinoe. Konni qooxeessiꞌra suwisaancho ikke soqqamaꞌyanni tashshi yiinoe. Soodo goxoommawiinni kaeemma wote wodaniꞌyanni, ‘Magano galatami, techono farciꞌrammaraati?’ yeemma.”

Didiyeri Malagasiyi Afoo rosa hanafi yanna qaaganno wote dhagge assiꞌranno. Isi togo yiino: “Songote gambooshshe massageemmoha ikkirono, roduuwu dawaro qoltanno wote mayitannoro dileellannoe. Dawaro qoltanno wote ‘Galateemmohe’ yaalla rosoommo. Mitte rodoo dawaro qolteenna galateemmohe yuummo gedensaanni isera badheenni ofoltinori qoltino dawaro gara ikkitinokkita malaatunni kultue. Hakkawotenni  mitto rodoo garu dawaro qolanno gede xaꞌmummo, isi garunni dawarino yee hexxeemmo.”

Tiyeerinna minaamasi Naadiya 2005nni mittu jawu gambooshshiwa “Maganu Ayirranno Gede Assitanno Mixo Fushshidhe” yaanno diraama laino. Ximootewoosi daafira kulannohu kuni Qullaawu Maxaafi diraami lowo geeshsha hagiirsiisinonsa; hattono sabbakkannori roore hasiissannowa hadhe soqqamate noonsa hasatto lexxitanno gede assinonsa. Tiyeerini togo yiino: “Diraamu goofita anga gannanni heeꞌneenna, alba galteꞌyawa hige ‘Hiikkira haꞌne soqqammo?’ yee xaꞌmummo. Iseno tenne daafira heddanni noota kultue.” Mulenni insa wolewa haꞌre soqqamate mitore assa hanafi. Naadiya togo yitino: “Noonke uduunne baala ajinsheenna shoole borsa ikkannohu callu gatino.”

Insa 2006nni Madagaskaari haꞌranni heeꞌre soqqanshonsanni hagiirre afiꞌrino. Naadiya “Hakkiicho mannu kulleemmo sokka macciishshanno gari lowo geeshsha hagiirsiisinonke” yitino.

Tiyeeriranna Naadiyara lewu agani gedensaanni mittu qarra ikkanno coyi tuncu yiinsa. Faransayete heedhannoti Naadiya ama Maariye-Madeliyeni ubbe anga hiiqqidhino hattono umo gaꞌnite raantidhino. Insa Naadiya ama akkamanno dokitericha amaaꞌli gedensaanni, insawa Madagaskaari dagganno gede assi. Isera hakkawaro 80 diro ikke nooseha ikkirono hadhe ledonsa heeꞌrate hakkira haꞌrate sumuu yitino. Ise wole gobba haꞌre heeꞌrate daafira mayi macciishshaminose? Togo yitino: “Haaro gobba rosa shota diꞌꞌikkitanno; ikkollana wolqaꞌya garita ikkano hoogguro songote kaaꞌla dandeemma. Oosoꞌya ledo mitteenni heeꞌrate assinoonni qixxaawo insa hatte giddichora soqqama agurtannokki gede kaaꞌlitinonsa; tini lowo geeshsha hagiirsiissinoe.”

Riyaana 22 diro ikkannosi rodooti. Isi lophinohu Alaootira Mangoro yinanniwa aliyye Madagaskaariraati; kuni qooxeessi gibirinnu loosiꞌra injaannoho. Isi dancha guma abbe kaffi yiino roso rosa hasiꞌranno. Ikkollana, isi Qullaawa Maxaafa xiinxalliti hedosi soorriri. Isi togo yiino: “Layinki dirimi roso gudummo gedensaanni, Yihowara ‘Jeefote fonqolo saummoro suwisaancho ikkeemmo’ yee qaale eoommo.” Riyaana roso gudi gedensaanni eino qaale wonshino. Isi mittu suwisaanchu rodii ledo heeꞌranni gama yanna umisi looso loosanni suwisaancho ikke soqqama hanafi. Riyaana togo yiino: “Heeshshoꞌya giddo doodhoommo doorshi baalu giddo kuni rooreho.”

Ikkollana, Riyaana fiixi isi kaffi yiino roso rosa hasiꞌrinokkihu mayiraatiro dibuuxino. Isi togo yiino: “Anniꞌya, wosiiliꞌyanna anniꞌya laꞌlama kaffi yiino roso roseemmo gede jawaachishie. Ikkollana mittu coyino suwisaancho ikkeemmokki gede guficho ikkaera dihasiꞌroommo.” Mulenni Riyaana sawaakootu roore hasiisannowa haꞌre soqqama hasiꞌrino. Isira togoo hasatto heedhannosi gede assinosiri maati? Isi togo yiino: “Mooraano galleemmo mine hiiqqite eꞌe lowo uduunne moortunke. Tini, Yesuusi ‘jiroꞌne gordoho duuꞌne’ yee rosiisino roso qaageemmo gede assitinoe. Konni daafira ayyaanaamittete jiro duuꞌnate murciꞌrummo.” (Mat. 6:19, 20) Isi heeꞌranno qooxeessinni 1,300 km xeertidhe noote wodiidi qacce haꞌri; hakko qooxeessira moolle batidhanno. Kuni qoqqowi Antandiroyi yinanni manni heeꞌrannowaati. Isi hakka haꞌrinohu mayiraati?

Mooraano mine hiiqqite eꞌara mittu agani albaanni Riyaana lamu Antadiroyi mannira Qullaawa Maxaafa xiinxallisa hanafino. Isi insa afiinni mitore coyira dandiino; qoleno Antadiroyi qoqqowira Maganu Mangiste sokka iillitinokkita huwatino. Isi togo yiino: “Tandiroyi Afoo coyiꞌranno manni noo qoqqowo haꞌre soqqama dandeemmo gede Yihowa huucciꞌrummo.”

Riyaana hakka haꞌranni heeꞌreenna mittu qarra ikkanno coyi tuncu yiisi. Isi hakko looso diafiꞌrino. Mittu manchi, “Mannu looso hasiꞌranni kiꞌne qooxeessa daanni heeꞌreenna ati kawira mayira dayootto?” yiinosi. Lame lamala gedensaanni Riyaana maa assummoro woyyanno yaanni hedanni gari saante noosikkiha qoqqowu gambooshshira wolewa haꞌri. Gambooshshunnihu jeefote barra mittu rodii Riyaana koote kiisera mitore wori. Roduu kiisete worinori woxeho; kuni woxi Riyaana, Antandiroyi qolannosi geeshshiho; hakkiinni isi gatino woxinni geinto daddaꞌla hanafino. Riyaana togo yiino: “Kaaꞌlo hasiisse nooe yannara Yihowa anga kaaꞌlitannae laoommo. Hakko qooxeessira Yihowa daafira macciishshate tunceenya afiꞌrinokki manna kaaꞌla dandoommo!” Qoleno songote giddo loonsannihu lowo loosi no. Riyaana lede togo yiino: “Lame lamala  giddo mitte hige lallawo shiqisheemmo gede assinie. Yihowa dirijjitesi widoonni qajeelsanni nooe.” Xaa yannara, Riyaana Maganu Mangiste sokka Yihowa daafira afa hasiꞌrannohu Tandiroyi afoo coyiꞌranno mannira sabbakanni no.

Yihowa togo yee buuxisinonke: ‘Maasso hasiꞌrannoha baala halaalaanchu Magani ani Yihowa maassiꞌreemmo.’ (Isa. 65:16) Soqqanshonke halashshiꞌrate guficho ikkannonke coye qeelate sharrammeemmoha ikkiro Yihowa maassiꞌrannonke. Hanni konni birxichi hanafora kullita Silviyaana qaagi. Ise sabbakkannori roore hasiissannowa haꞌre soqqama wolqasera aleenni ikkitinota hedde waajjitinota qaagi. Ise hatto yite heddinohu mayiraati? Ise togo yite xawissino: “Guracho lekkaꞌya qiniiticho lekkaꞌyanni 9 seenti meetire ajjanno. Haꞌreemmahu dinanni ikkino daafira mulenni daafursannoe.”

Silviyaana 2014nni mitte songosete wedellitte suwisaancho Siyilivi Ani ledo heeꞌrannowiinni 85 km xeertire noowa shiima qoqqowo haꞌri. Guficho ikkannori heeꞌrirono Silviyaana hasatto woꞌmitino; ise lowo atoote afidhino! Ise togo yitino: “Mitto diro soqqamumma gedensaanni Qullaawa Maxaafa xiinxallisoommati Dooraatini yinanniti woradu gambooshshiwa cuuantino.”

Sabbakkannori roore hasiissannowa hadhe sabbakkinori lawishshi leellishannonte gede, soqqanshonke halashshiꞌrate guficho ikkannonke coye qeelate sharrammeemmo wote, Yihowa soqqamaanosira “Ani jawaachisheemmohe, kaaꞌleemmohe” yee eino qaali adda ikkinota uminke heeshshonni laꞌneemmo. (Isa. 41:10) Tini Yihowa ledo noonke jaaloomi kaajjanno gede assitanno. Hattono, heeꞌneemmo gobbara ikko wole gobbara meessaneeto uminke fajjonni shiqinsheemmoha ikkiro haaro alamera loonseemmohu tiokiraasete loosira qixxaambeemmo gede kaaꞌlannonke. Aleenni qummi assinihu Didiyeri togo yiino: “Sabbakkannori roore hasiissannowa haꞌre soqqama albillittete dancha qajeelsha afiꞌnanni gede assitanno!” Wolootu haammatu roduuwi insaneeto uminsa fajjonni shiqishshe qajeeltanno yine hendeemmo!