WEDELLOOTAHO
9: Ayimmakki Afa
HATTO YAA MAYYAATE?
Ayimmakki suꞌmakkinna danakki calla diꞌꞌikkitino. Hatteentenni harunsattohu amanyootu seeri, ammanattorinna akatikkino ayimmakki xawisanno. Addanko, mannaho leellannorino leellannokkirino mitteenni ate ayimma kulanno.
HASIISSANNOHU MAYIRAATI?
Ayimmakki seekkite afittoro, ammanoottore seekkite cuꞌmiꞌratto ikkinnina sammi yite darawokki hoode dihaꞌratto.
“Duuchu manni suuqete uduunne suntanni kankichi gedeeti. Kankichu uddiꞌranno uduunne doodha didandaanno; isira mannu doorella uddisiisanno.”—Adiriyani.
“Gara ikkinore assa qarra ikkitannoe woyite nafa hatto assa dandeemma gara rosoomma. Anera addu jaallaati yeemmari harunseemma amanyoote ayirrissannoreeti; togoo manniwa aana baxeemma.”—Koortinii.
QULLAAWU MAXAAFI BIDDISHSHA: “Wodaniꞌne haarooꞌmo ikkinnina tenne gobba [alame] mannita busha doogo hadhinoonte.”—Roomu Sokka 12:2.
MAA ASSA DANDIITINANNI?
Jawaantekkinna laanfekki hattono ammanoottore badde affe xa hiittoo manchootironna albillitte hiittoo mancho ikka hasiꞌrattoro hedi. Aante noo xaꞌmuwa xiinxallakki tennera kaaꞌlitannohe.
Jawaantekki: Hiitti ogimmanna dandoo nooe? Danchu akatiꞌya hiikkonneeti? (Lawishshaho: Barrisiꞌrummokki iillate rosichi nooe? Aneneeto qeeꞌleemmo? Chaachaaraho? Shaqqadoho?) Assanni noommohu danchu coyi maati?
KAAꞌLITANNO AMAALE: Dancha akatakkinna jawaantekki badde afa qarra ikkitinohe? Hatto ikkiro, annakkinna amakki woy ammaꞌnatto jaalakki jawaantekki maatironna hatto yee hedinohu mayiraatiro xaꞌmi.
QULLAAWU MAXAAFI BIDDISHSHA: “Mittu mittunku umisi looso fonqole lao! Assino coyi dancha ikkiro, isonoo wolu manni ledo taashsha agure, umisi kuꞌlannore afiꞌranno.”—Galatiyu Sokka 6:4.
Laanfekki: Roore biddi assiꞌra hasiissannoe akati hiikkonneeti? Bushare assate roore doogameemmohu hiittoo woyiteeti? Aneneeto roore qeeꞌla hasiissannoehu hiittoo coyiraati?
QULLAAWU MAXAAFI BIDDISHSHA: “‘Cubbu dinonke’ yinummoro umonke dongeemmo; halaaluno giddonke dino.”—1 Yohaannisi 1:8.
Ammanootto coye: Galeemmo seeri hiittooho? Mayira? Maganu noota ammaneemmo? Noota ammaneemmo gede assinoeri maati? Taashsho xeꞌinoreeti yeemmohu hiittoo coyeeti? Mayira? Albillitte ikkanno yee ammaneemmo coyi maa maati?
QULLAAWU MAXAAFI BIDDISHSHA: “Buuxe afa towattannohe; buuxa bushu coyiwiinni agartannohe.”—Lawishsha 2:11.
Kurino Lai
WEDELLU XAꞌMANNOTE 10 XAꞌMORA QOLLOONNI DAWARO
Isi Ani Ayeti?
Akattakki, jawaantekki, laanfekkinna mixokki badde afakki, mannu gara ikkinokkire assatto gede xixxiiwannohe yannara dancha doorsha doodhatto gede kaaꞌlitannohe.
